سکیورٹی فورسز دی انٹیلی جنس تے مبنی کارروائیاں، میران شاہ تے نیڑے دے علاقیاں اچ 21 خوارج جہنم واصل تھی ڳئے، آئی ایس پی آر

راولپنڈی۔13 جون (اے پی پی) سکیورٹی فورسز ولوں خیبر پختونخوا دے ضلع شمالی وزیرستان دے عمومی علاقے میران شاہ تے گردونواح اچ خوارج دے کئی ٹکاݨیاں تے انٹیلی جنس تے مبنی کارروائیاں کیتی ڳئں جنھاں اچ 21 خارجی جہنم واصل تھی ڳئن۔ ہفتے کوں پاک فوج دے شعبہ تعلقات عامہ (ISPR) ولوں جاری پریس ریلیز دے مطابق گزشتہ 72 گھنٹیاں اچ شدید فائرنگ دے تبادلے اچ ہندوستان ولوں فتنہ الخوارج توں تعلق رکھݨ آلے ٻئے 21 خوارج بشمول چار خارجی رِنگ لیڈرز (خارجی خالد رضا عرف سالار، خارجی مفتون، خارجی موسیٰ تے خارجی عمران عرف عیان) کوں جہنم واصل کر ݙتا ڳئے جیڑھے ہک اہم نیٹ ورک دے تحت علاقے اچ کام کریندے پئے ہن۔ مارے ڳئے خارجیاں دے رہنما سکیورٹی فورسز دے اہلکاراں تے بے گناہ شہریاں دے قتل سمیت متعدد دہشت گردانہ سرگرمیاں اچ ملوث ہووݨ دی وجہ توں انتہائی مطلوب ہن۔ انتہائی ماہرانہ تے درست آپریشنز اچ ہݨ تئیں مجموعی طور تے 48 خوارج مارے ڳئن۔ آئی ایس پی آر آکھیا جو جہنم واصل کیتے ڳئے ہندوستانی سپانسرڈ خوارج جیڑھے متعدد دہشت گردانہ سرگرمیاں تے معصوم شہریاں دے قتل اچ سرگرم ہن، انھاں توں اسلحہ تے گولہ بارود وی برآمد تھئے ۔ آئی ایس پی آر ایں عزم دا اعادہ کیتے جو پاکستان دی سکیورٹی فورسز تے قانون نافذ کرݨ آلے اداریاں ولوں ویژن ’’عزمِ استحکام‘‘ (جیڑھا جو نیشنل ایکشن پلان تے وفاقی سپریم کمیٹی ولوں منظور شدہ اے) دے تحت انسدادِ دہشت گردی دی انتھک مہم اچ انھاں علاقیاں اچ بچ ونڄݨ آلے خوارج کوں ختم کرݨ کیتے سینی ٹائزیشن دی کارروائیاں پوری رفتار نال جاری رہسن۔