افریقہ ڈے مشترکہ تاریخ تے امنگاں دی یاد دہانی اے، افریقہ عالمی معیشت دے متحرک ترین خطیاں اچ شامل تھیندا پئے، عطاء اللہ تارڑ دا ”ہیپی افریقہ ڈے“ دی تقریب توں خطاب

اسلام آباد۔13 جون (اے پی پی) وفاقی وزیر اطلاعات تے نشریات عطاء اللہ تارڑ ”ہیپی افریقہ ڈے“ دے موقع تے افریقی ثقافت، افریقی موسیقی تے افریقی ورثے دی نمائندگی کرݨ آلی روایات تے اقدار دے فروغ کیتے مشترکہ فورم بݨاوݨ دی تجویز پیش کریندیں ہوئیں آکھیا جو پاکستان کیتے افریقہ ڈے مشترکہ تاریخ تے مشترکہ امنگاں دی یاد دہانی اے، افریقہ اڄ آپݨی تاریخ دے ہک تبدیلی دے مرحلے توں گزردا پئے، افریقہ عالمی معیشت دے سب توں متحرک خطے دے طور تے ابھردا پئے، ہیپی افریقہ ڈے تے ایں سال کوں پاݨی دے پائیدار استعمال دا سال قرار ݙیوݨا خوش آئند اے، پاݨی ای زندگی اے اتے پاݨی دی اہمیت کوں اساں توں بہتر شاید کوئی سمجھ سڳدا ہووے۔ اے ڳالھیں انھاں اتھاں مقامی ہوٹل اچ ”ہیپی افریقہ ڈے“ دی تقریب توں خطاب کریندیں ہوئیں کیتا۔ وفاقی وزیر اطلاعات آکھیا جو افریقہ ڈے دے موقع تے آپݨی حکومت ولوں نمائندگی میݙے کیتے باعثِ اعزاز اے، اے ݙینھ تنوع، ثقافتی ہم آہنگی تے افریقی براعظم دی عظیم روایات تے اقدار دے اعتراف تے جشن دا ݙینھ اے جیڑھا افریقی اقوام دے چیلنجز تے قابو پاوݨ دے عزم دی عکاسی کریندے۔ وفاقی وزیر پاکستان کیتے افریقہ ڈے کوں مشترکہ تاریخ تے مشترکہ امنگاں دی یاد دہانی قرار ݙیندیں ہوئیں آکھیا جو افریقی ممالک وانگوں پاکستان وی نوآبادیاتی دور دے تجربے توں گزریے، اے مشترکہ تاریخی تجربہ پاکستان تے افریقہ دے درمیان دیرینہ دوستی تے یکجہتی دی بنیاد اے۔ وفاقی وزیر اطلاعات انگیج افریقہ پالیسی کوں افریقی ممالک دے نال سیاسی، اقتصادی تے ثقافتی تعلقات کوں پائیدار بنیاداں تے مضبوط تے وسیع کرݨ دے عزم دی عکاس قرار ݙیندیں ہوئیں آکھیا جو پاکستان افریقہ کوں نہ صرف سفارتی شراکت داری دے طور تے ݙیکھدے بلکہ ایں کوں آپݨی وسیع تر خارجہ پالیسی رسائی دا ہک مرکزی ستون وی تصور کریندے۔وفاقی وزیر اطلاعات ݙوہیں فریقین وچال انھاں شعبیاں اچ تعاون کوں فروغ ݙیوݨ دے عزم دا اظہار کیتا جیڑھے افریقہ تے پاکستان دے مثبت تشخص دی بہتر عکاسی اچ مددگار ثابت ہوون۔ وفاقی وزیر اطلاعات ایں موقع تے تمام افریقی اقوام کوں افریقہ ڈے دی مبارکباد پیش کیتی اتے آکھیا جو پاکستان تے افریقہ دی دوستی ہمیشہ قائم و دائم رہسی۔