آئندہ مالی سال دے بجٹ اچ 125 ارب روپے زرعی شعبے دے قرضیاں کیتے رکھیے ڳئن، وفاقی وزیر خزانہ

اسلام آباد۔13 جون (اے پی پی) وفاقی وزیر خزانہ سینیٹر محمد اورنگزیب آکھیا جو حکومت آئندہ مالی سال 27-2026 دے بجٹ اچ وزیراعظم دے قرض پروگرام کیتے 262 ارب روپے مختص کیتن۔ ہفتہ کوں پوسٹ بجٹ پریس کانفرنس اچ انھاں ݙسایا جو ایں رقم اچوں 125 ارب روپے خصوصی طور تے زرعی شعبے دے قرضیاں کیتے رکھیے ڳئ تانجو کساناں کوں آسان مالی سہولیات فراہم کیتی ونڄ سڳن۔ وزیر خزانہ آکھیا جو زرعی قرضیاں کیتے فنڈز دی فراہمی دا مقصد کاشتکاراں دی پیداواری صلاحیت اچ ودھارے، جدید زرعی طریقیاں دے فروغ تے زرعی شعبے دی مجموعی ترقی کوں یقینی بݨاوݨ اے۔ انھاں آکھیا جو حکومت زرعی معیشت کوں مستحکم بݨاوݨ تے کساناں کوں درپیش مالی مشکلات گھٹ کرݨ کیتے عملی اقدامات کریندی پئی اے جئیں نال نہ صرف زرعی پیداوار اچ ودھارا تھیسی بلکہ دیہی معیشت وی مضبوط تھیسی۔ انھاں ایں عزم دا اظہار کیتا جو حکومت کسان دوست پالیسیاں دے ذریعے خوراک دے تحفظ، برآمدات اچ ودھارے تے پائیدار معاشی ترقی دے اہداف حاصل کرݨ کیتے زرعی شعبے دی بھرپور معاونت جاری رکھیسی۔