ایکسپورٹ لیڈ گروتھ توں پوری معیشت کوں فائدہ تھیندا پئے، جی ڈی پی گروتھ 3.7 توں 4 فیصد تئیں پڄدی پئی اے، آندے مالی سال دا بجٹ گزریل ݙو سالیں دی محنت تے جامع اصلاحاتی اقدامات دا نتیجہ اے، عطاء اللہ تارڑ

اسلام آباد۔13 جون (اے پی پی) وفاقی وزیر اطلاعات تے نشریات عطاء اللہ تارڑ آکھیا جو ایکسپورٹ لیڈ گروتھ توں پوری معیشت کوں فائدہ تھیندا پئے، پچھلی حکومت 0.2 فیصد جی ڈی پی گروتھ چھوڑ کراہیں ڳئی ہئی، اساݙی حکومت اچ جی ڈی پی گروتھ 3.7 توں 4 فیصد دی سطح تے پڄدی پئی اے، آئندہ مالی سال دا بجٹ گزشتہ ݙو سالیں دی محنت تے جامع اصلاحاتی اقدامات دا نتیجہ اے جئیں دا بنیادی مقصد عوام کوں ریلیف فراہم کرݨ تے معیشت کوں پائیدار استحکام دے راہ تے ٹورݨ اے۔ حکومت نے شفافیت تے ایف بی آر اصلاحات دے ذریعے مالی گنجائش پیدا کیتی، مختلف طبقات کوں ریلیف فراہم کیتا، اے بجٹ مزدور، کسان، تنخواہ دار طبقے، ایکسپورٹرز تے متوسط طبقے سمیت معاشرے دے سارے طبقات دا بجٹ اے۔ ہفتہ کوں وزیر خزانہ سینیٹر محمد اورنگزیب تے وزیر مملکت برائے خزانہ بلال اظہر کیانی دے نال پوسٹ بجٹ پریس بریفنگ دے دوران ڳالھ مہاڑ کریندے ہوئیں وفاقی وزیر اطلاعات آکھیا جو مالی گنجائش پیدا تھیوݨ دے بعد حکومت عوام کوں ریلیف فراہم کرݨ دے وعدے کوں عملی جامہ پوایا جڈانجو ریلیف تے مبنی بجٹ دی تیاری کیتے گزشتہ ݙو سالیں اچ بھرپور محنت تے عرق ریزی کیتی ڳئی۔ انھاں آکھیا جو وزیراعظم دا بارہا اے وعدہ رہیے جو جیویں ای معاشی گنجائش پیدا تھیسی، عوام کوں ہر ممکن ریلیف فراہم کیتا ویسی اتے آئندہ مالی سال دا بجٹ ایں عزم دی عکاسی کریندے۔ وفاقی وزیر آکھیا جو حکومت دی اصلاحاتی کوششاں اچ سرِفہرست ایف بی آر اصلاحات ہن تے ملکی تاریخ اچ ایں نوعیت دی وسیع تے مؤثر اصلاحات دی مثال نئی ملدی۔ انھاں آکھیا جو ایں وقت ایف بی آر دا پورا ڈھانچہ سفارش تے سیاسی مداخلت توں پاک بݨایا ڳئے۔ انھاں آکھیا جو جے اڄ او کہیں افسر دی سفارش کرن جو ایں کوں کسٹمز دی کہیں مخصوص پوسٹ تے تعینات کیتا ونڄے تاں شام تئیں متعلقہ افسر دی معطلی دا حکم میݙی ٹیبل تے ہوسی۔ وفاقی وزیر آکھیا جو سیاسی کلچر اچ نمایاں تبدیلی آئی اے، ہݨ لوگ سفارش یا اپروچ کیتے رجوع نئی کریندے اتے اے کلچرل چینج اوں ویلھے ممکن تھیا جݙاں ایں دا آغاز اعلیٰ سطح توں تھیا اتے وزیراعظم خود ایں عمل دی قیادت کیتی۔ وفاقی وزیر اطلاعات آکھیا جو ماضی اچ ارباں روپے دی مالی لیکیج تے بدعنوانی ہئی تاہم موجودہ حکومت شفافیت کوں یقینی بݨاوݨ کیتے ایف بی آر دا فیس لیس سسٹم متعارف کرایا جئیں دے ذریعے ٹرانسپیرنسی کوں فروغ ݙتا ڳئے۔ انھاں آکھیا جو ایں نظام کوں ہݨ ضلعی تے تحصیل سطح تئیں وسعت ݙتی ویسی۔ انھاں آکھیا جو انفورسمنٹ دے شعبے اچ خصوصاً صنعتی سطح تے مالی لیکج ٻہوں زیادہ ہئی جئیں دے تدارک کیتے شوگر انڈسٹری توں آغاز کیتا ڳیا۔ شوگر انڈسٹری منافع بخش شعبہ اے، ایں کیتے ایں دا مناسب ٹیکس بوجھ ہک تنخواہ دار طبقے دے فرد تے منتقل نئی ہووݨا چاہیدا جڈانجو ٹیکس وصولیاں اچ ایں صنعت دا حصہ نسبتاً گھٹ رہیے۔ وفاقی وزیر اطلاعات آکھیا جو مجموعی طور تے ریلیف تے مبنی بیانیے دے پچھوں بھرپور محنت تے طویل حکمتِ عملی کارفرما رہی اے۔ انھاں آکھیا جو حکومت مختلف شعبیاں اچ اصلاحات دے ذریعے معاشی گنجائش پیدا کیتی جئیں دے نتیجے اچ عوام دوست اقدامات ممکن تھئے۔ انھاں آکھیا جو ماضی اچ ٹیکس مقدمات دے نظام اچ وی سنگین خامیاں موجود ہن، جتھاں سفارش دی بنیاد تے وکلا دی بھرتیاں کیتی ویندیاں ہن۔ بعض اوقات فریقین دے وکلا آپس اچ ملی بھگت کر تے مقدمات کوں چھی توں ست سال تئیں طول ݙیندے ہن جئیں دے باعث ایف بی آر کوں واجب الادا ٹیکس منجمد رہندا یا متعلقہ فریق دے کول پیا رہندا اتے قومی خزانے کوں بروقت محصولات موصول نہ تھیندے۔ وفاقی وزیر اطلاعات آکھیا جو مرحلہ وار تے مسلسل کوششاں دے ذریعے مؤثر نظام، آئی ٹی تے مبنی اصلاحات تے شفافیت کوں فروغ ݙے کراہیں مالی گنجائش پیدا کیتی ڳئی۔ انھاں آکھیا جو وزیراعظم مختلف طبقات توں جئیں ریلیف دا وعدہ کیتا ہئی، موجودہ بجٹ اچ ایں کوں عملی شکل ݙتی ڳئی اے۔ تنخواہ دار طبقے دے نال نال ایکسپورٹرز کیتے وی نمایاں سہولتیں فراہم کیتی ڳئن۔ انھاں آکھیا جو جݙاں بیرونِ ملک ’’میڈ اِن پاکستان‘‘ دا ٹیگ نظر آندے تاں اے باعثِ فخر ہوندے، حکومت دے اقدامات توں پاکستانی مصنوعات خطے اچ مزید مسابقتی بݨسن جئیں نال برآمدات، زرِمبادلہ تے فارن ایکسچینج ذخائر اچ ودھارا تھیسی جڈانجو معیشت ایکسپورٹ لیڈ گروتھ آلے پاسے ودھسی۔ وفاقی وزیر اطلاعات آکھیاجو مڈل کلاس، بالخصوص لوئر مڈل کلاس کیتے ’’اپنا گھر‘‘ پروگرام دے تحت وݙی گنجائش پیدا کیتی ڳئی اے۔ انھاں آکھیا جو ہاؤسنگ سیکٹر صرف تعمیرات تئیں محدود نئی بلکہ ایں توں متعدد صنعتیں وابستہ ہن جنھاں اچ سیمنٹ, سریا تے دیگر تعمیراتی سامان شامل ہن جڈانجو تقریباً 12 صنعتیں ایں شعبے توں منسلک ہن۔ انھاں آکھیا جو حکومت ہاؤسنگ سیکٹر کیتے 90 ارب روپے دے قرضیاں دی سہولت مختص کیتی اے جئیں دی باقاعدہ گنجائش بجٹ اچ رکھی ڳئی اے۔ ایں دے نال نال مڈل کلاس کوں جائیداد دی خرید و فروخت اچ درپیش مشکلات کوں مدنظر رکھیندیں ہوئیں پراپرٹی ٹیکس اچ وی ریلیف دی گنجائش فراہم کیتی ڳئی اے۔ وفاقی وزیر اطلاعات آکھیا جو اے بجٹ ہر طبقے کیتے اے جئیں اچ مزدور، کسان تے تنخواہ دار طبقے سمیت معاشرے دے تمام طبقات کوں ریلیف فراہم کیتا ڳئے۔ انھاں آکھیا جو تریمتیں کیتے ہک اہم اقدام دے طور تے ’’پنک ٹیکس‘‘ دے تحت سینیٹری تے ہائیجین پروڈکٹس تے عائد 18 فیصد ٹیکس کوں ختم کر تے صفر کر ݙتا ڳئے جیڑھا ہک وݙا اصلاحاتی قدم اے۔ انھاں آکھیا جو ماضی اچ ملک دے ڈیفالٹ کرݨ دے حوالے نال قیاس آرائیاں تے شرطاں لاتی ویندیاں ہن تاہم اے سفر سوکھا نہ ہئی۔ انھاں قوم دے صبر و تحمل کوں سراہندیں ہوئیں آکھیا جو وزیراعظم وی آپݨے بیان اچ ایں ڳالھ دا اعتراف کیتے۔ وفاقی وزیر آکھیا جو حکومت تنقید کوں فراخ دلی نال برداشت کیتا تے معاشی ٹیم وزیراعظم دی قیادت اچ او اقدامات کیتے جنھاں دے نتیجے اچ ناممکن کوں ممکن بݨایا ڳیا۔ انھاں آکھیا جو اے بجٹ ریلیف تے مبنی اے تے معیشت کوں استحکام دی سمت گھن ونڄݨ دی بنیاد رکھ ݙتی ڳئی ا ے۔ بین الاقوامی سطح تے وی پاکستان دی معاشی اصلاحات کوں تسلیم کیتا ڳئے جئیں دی مثال ڈیووس اچ سامݨے آوݨ آلے بیانات ہن جتھاں عالمی مالیاتی اداریاں دے نمائندیاں پاکستان دے سٹرکچرل ریفارمز تے میکرو اکنامک استحکام کوں سراہیا۔ وفاقی وزیر آکھیا جو ایف بی آر دے ماڈل کوں ورلڈ بینک سمیت عالمی اداریاں اچ پیش کیتا ڳئے اتے ایں دی بھرپور پذیرائی تھئی اے۔ انھاں آکھیا جو کیش لیس اکانومی دی جانب اقدامات توں معیشت دے ہک وݙے غیر دستاویزی حصے کوں دستاویزی نظام اچ آندا ڳئے جئیں توں ٹیکس لیکج اچ کمی آئی اے۔ انھاں آکھیا جو رمضان پیکج دے دوران ڈیجیٹل والٹس دا استعمال ایں پالیسی دا حصہ اے جئیں دا مقصد شفافیت تے مؤثر تقسیم کوں یقینی بݨاوݨ اے۔ صحافیاں دے سوالات دے جواب اچ وفاقی وزیر اطلاعات آکھیا جو جݙاں اساں ایکسپورٹ لیڈ گروتھ دی ڳالھ کریندوں تاں ایں کوں وسیع معاشی تناظر اچ ݙیکھݨا چاہیدے۔ انھاں آکھیا جو جݙاں ایکسپورٹر دا ٹرن اوور ودھدے تاں ایں دے منافع اچ ودھارا تھیندے، جئیں دے نتیجے اچ او آپݨٰی صنعت کوں وسعت ݙیندے، نویاں انڈسٹریاں قائم کریندے تے کاروباری سرگرمیاں کوں متنوع بݨیندے، جئیں نال روزگار دے نویں مواقع پیدا تھیندے ہن۔ وفاقی وزیر سوشل سیکٹر دے حوالے نال آکھیا جو موجودہ ترقیاتی بجٹ اچ ملک دے مختلف علاقیاں اچ تعلیمی اداریاں کیتے خصوصی فنڈز مختص کیتے ڳئن جنھاں اچ اسلام آباد دا جناح میڈیکل کمپلیکس، مظفرآباد دی دانش یونیورسٹی تے گلگت بلتستان، بلوچستان تے سندھ دے پسماندہ علاقیاں اچ تعلیمی اداریاں دے منصوبے شامل ہن۔