معاشی استحکام دے بعد ترقی دا پندھ شروع، بجٹ 27-2026 عوام، تنخواہ دار طبقے کیتے مراعات تے برآمدات تے مبنی اے، وزیر خزانہ محمد اورنگزیب

اسلام آباد۔13 جون (اے پی پی) وفاقی وزیر خزانہ سینیٹر محمد اورنگزیب آکھیا جو حکومت معاشی استحکام دے مرحلے اچ اہم کامیابیاں حاصل کرݨ دے بعد ہݨ برآمدات، سرمایہ کاری تے نجی شعبے دی قیادت اچ معاشی ترقی دے نویں پندھ دا آغاز کر ݙتے، جڈانجو مالی سال 27-2026 دا بجٹ عوام، تنخواہ دار طبقے، مزدوراں، کساناں تے کاروباری برادری دی ضروریات کوں ݙیکھدیں ہوئیں تیار کیتا ڳئے۔ ہفتہ کوں اسلام آباد اچ وفاقی وزیر اطلاعات و نشریات عطا اللہ تارڑ تے وزیر مملکت برائے خزانہ بلال اظہر کیانی دے نال پوسٹ بجٹ پریس کانفرنس توں خطاب کریندیں ہوئیں وزیر خزانہ آکھیا جو گزشتہ سال میں قوم کوں یقین ݙوایا ہئی جو معیشت درست سمت اچ گامزن اے اتے اڄ بجٹ اچ پیش کیتے ڳئے اقدامات ایں ڳالھ دا ثبوت ہن جو پاکستان معاشی استحکام توں ترقی آلے پاسے ویندا پئے۔ انھاں دا آکھݨ ہئی جو معاشی ترقی دا پندھ مسلسل ہوندے اتے ایں دی کوئی آخری منزل نئی ہوندی تاہم حکومت محدود مالی وسائل دے باوجود دستیاب گنجائش کوں ودھ توں ودھ عوامی فلاح، معاشی سرگرمیاں تے سرمایہ کاری دے فروغ کیتے استعمال کیتے۔ انھاں دا آکھݨ ہئی جو بجٹ دی تیاری دے دوران تنخواہ دار طبقے خصوصاً کم آمدݨ آلے ملازمین کوں ریلیف فراہم کرݨا حکومت دی اولین ترجیح ہئی۔ وزیر خزانہ ݙسایا جو حکومت تنخواہ دار طبقے دے نچلے درجے دے افراد تے ٹیکس دا بوجھ ڳھٹ کرݨ کیتے اقدامات کیتن تانجو مہنگائی تے معاشی دباؤ توں متاثر تھیوݨ آلے طبقات کوں سہولت مل سڳے. انھاں آکھیا جو بجٹ اچ کاروباری سرگرمیاں کوں فروغ ݙیوݨ تے روزگار دے نویں مواقع پیدا کرݨ تے خصوصی توجہ ݙتی ڳئی اے۔ سینیٹر محمد اورنگزیب آکھیا جو حکومت مسلسل برآمدات تے مبنی معاشی ترقی دی پالیسی تے عمل پیرا اے اتے ایں حکمتِ عملی دے تحت وزیراعظم دی ہدایت تے برآمد کنندگان کیتے سپر ٹیکس ختم کرݨ دا فیصلہ کیتا ڳئے۔ انھاں دا آکھݨ ہئی جو صنعت تے برآمدی شعبے کوں گھٹ لاگت فنانسنگ دی سہولتاں فراہم کیتی ویندی پئن جڈانجو ٹیرف اصلاحات دے ݙوجھے مرحلے تے وی عملدرآمد جاری اے تانجو پیداواری لاگت گھٹ تھیوے اتے پاکستانی مصنوعات عالمی منڈی اچ زیادہ مسابقتی بݨ سڳن۔ انھاں آکھیا جو آئی ٹی سیکٹر پاکستان دی معیشت اچ اہم کردار ادا کریندا پئے اتے توقع اے جو رواں مالی سال دے دوران آئی ٹی برآمدات 4.5 ارب ڈالر تئیں پڄ ویسن۔ وزیر خزانہ ݙسایا جو نوجواناں کوں کاروبار تے خود روزگار دے مواقع فراہم کرݨ کیتے 262 ارب روپے دے قرضہ پروگرام دا اجرا کیتا ڳئے۔ زرعی شعبے دے حوالے نال ڳالھ مہاڑ کریندیں ہوئیں انھاں آکھیا جو حکومت کساناں دی معاونت تے زرعی پیداوار اچ ودھارے کیتے متعدد اقدامات کیتن۔ انھاں ݙسایا جو زرعی قرضیاں دا حجم 15 فیصد ودھارے دے بعد ݙو ہزار ارب روپے توں تجاوز کر ڳئے جڈانجو وزیراعظم یوتھ ایگریکلچر لون پروگرام دے تحت 262 ارب روپے مختص کیتے ڳئن جنھاں اچوں 125 ارب روپے زراعت کیتے مخصوص ہن۔ انھاں آکھیا جو چھوٹے کساناں دی مالی ضروریات پوری کرݨ کیتے “زرخیزی اسکیم” متعارف کرائی ڳئی اے جئیں دے تحت زمین یا گھر گروی رکھیے بغیر قرضیاں دی سہولت فراہم کیتی ویسی۔ وزیر خزانہ دے مطابق زرعی شعبے اچ ویلیو ایڈیشن تے جدید ٹیکنالوجی دے فروغ کیتے زرعی مشینری، کمبائن ہارویسٹرز تے دیگر آلات دی درآمد تے کسٹم ڈیوٹی تے ریگولیٹری ڈیوٹی ختم کر ݙتی ڳئی اے۔ تعمیرات تے ہاؤسنگ سیکٹر بارے اچ وزیر خزانہ آکھیا جو معاشی ترقی اچ ایں شعبے دا کلیدی کردار اے، ایں کیتے تعمیراتی سرگرمیاں دے فروغ کیتے ٹرانزیکشن ٹیکسز اچ نمایاں کمی کیتی ڳئی اے۔ انھاں اعتراف کیتا جو وݙے شہراں اچ ہک کروڑ روپے دے قرضے دی مالیت محدود تھی سڳدی اے، ایں کیتے حکومت پبلک پرائیویٹ پارٹنرشپ ماڈل کوں فروغ ݙیندی پئی اے تانجو زیادہ توں زیادہ شہریاں کوں رہائشی سہولتاں فراہم کیتیاں ونڄ سڳن۔ انھاں آکھیا جو حکومت دی ہاؤسنگ اسکیم دے تحت پہلی واری ہک عام مزدور تے ڈرائیور کیتے وی گھر دی تعمیر یا خریداری کیتے قرض حاصل کرݨا ممکن تھیے، جیڑھا معاشی شمولیت آلے پاسے ہک اہم پیش رفت اے۔ وزیر خزانہ آکھیا جو ایف بی آر اچ اصلاحات دا عمل تیزی نال جاری اے اتے ادارے کوں آٹومیشن تے مصنوعی ذہانت (AI) دی بنیاد تے جدید خطوط تے استوار کیتا ویندا پئے۔ انھاں آکھیا جو انسانی مداخلت گھٹ کرݨ تے صوابدیدی اختیارات دے خاتمے کیتے کسٹمز نظام کوں ڈیجیٹلائز کیتا ڳئے جڈانجو ٹیکس نیٹ کوں وسعت ݙیوݨ کیتے ریٹیلر اسکیم سمیت متعدد اقدامات متعارف کرائے ڳئن۔ پیٹرولیم مصنوعات دے حوالے نال ڳالھ مہاڑ کریندیں ہوئیں انھاں واضح کیتا جو پیٹرولیم لیوی اچ کوئی ودھارا نئی کیتا ڳیا بلکہ صرف لیوی دے ڈھانچے اچ ضروری ردوبدل کیتا ویندے۔ انھاں ݙسایا جو اپریل دے مقابلے اچ مئی دے دوران تیل دی درآمدی لاگت اچ نمایاں ڳھٹکی آئی اے۔ سولر پینلز دی قیمتاں بارے سوال دے جواب اچ وزیر خزانہ آکھیا جو سولر پینلز دی قیمتاں اچ ودھارے توں متعلق افواہیں اچ کوئی حقیقت نئی اتے سارے متعلقہ حلقیاں کوں درست معلومات دی فراہمی کوں یقینی بݨاوݨا چاہیدے۔ انھاں اسٹیٹ بینک آف پاکستان ولوں ڳھٹ شرح سود تے فنانسنگ سہولتاں دی فراہمی کوں سراہندیں ہوئیں آکھیا جو ساݙھے چار فیصد شرح تے فنانسنگ دی دستیابی کاروباری سرگرمیاں تے سرمایہ کاری دے فروغ اچ معاون ثابت تھیسی۔