حکومت ریلیف تے مبنی بجٹ ݙتے، مہنگائی سنگل ڈیجیٹ تے آ ڳئی اے، پالیسی ریٹ 11 فیصد، زرمبادلہ دے ذخائر 17.2 ارب ڈالر، ترسیلاتِ زر 33.9 ارب ڈالر دی سطح تے پڄ ڳئن، ملک ترقی تے خوشحالی دی نویں منزل آلے پاسے ویندا پئے، عطاء اللہ تارڑ

اسلام آباد۔14 جون (اے پی پی):وفاقی وزیر اطلاعات تے نشریات عطاء اللہ تارڑ آکھیا جو حکومت معیشت کوں استحکام دے راہ تے ٹوریندیں ہوئیں عوام کوں ریلیف تے مبنی بجٹ ݙتے، تنخواہ دار طبقے، مزدور، کسان، ایکسپورٹرز، تریمتیں تے متوسط طبقے سمیت ہر شعبے کیتے مالی گنجائش پیدا کیتی ڳئی، مہنگائی سنگل ڈیجیٹ تے آ ڳئی اے، پالیسی ریٹ 22 فیصد توں ڳھٹ تھی کراہیں 11 فیصد تے آ ڳئے، زرمبادلہ دے ذخائر 17.2 ارب ڈالر جڈانجو ترسیلاتِ زر 33.9 ارب ڈالر دی سطح تے پڄ ڳئن۔ آئی ٹی برآمدات 3.8 ارب ڈالر تئیں پڄ ڳئن جئیں اچ فری لانسرز دا 995 ملین ڈالر دا حصہ وی شامل اے، ایف بی آر اصلاحات، فیس لیس اپریزل نظام، ٹیکس نیٹ اچ وسعت، ہاؤسنگ سیکٹر، ایکسپورٹ لیڈ گروتھ، سماجی شعبیاں اچ سرمایہ کاری تے تریمتیں کیتے ’’پنک ٹیکس‘‘ دے خاتمے سویں اقدامات حکومت دے عوام دوست ویژن دی عکاسی کریندے۔ ماضی اچ ملک دے ڈیفالٹ تھیوݨ دی شرطاں لاتی ویندی ہن، محمد شہباز شریف ریاست دی بقاء کیتے آپݨی سیاست دی قربانی ݙتی، تاریخ ایں قدم کوں یاد رکھیسی جݙاں وزیراعظم شہباز شریف نعرہ لاتا جو میں ریاست کوں بچیساں، میکوں سیاست دی کوئی پرواہ نئی، مسلم لیگ (ن) مشکل معاشی حالات اچ اقتدار سنبھالیا، اساݙے دور اچ عالمی سطح تے پاکستان کوں پذیرائی ملی، پوری دنیا وزیراعظم شہباز شریف تے فیلڈ مارشل سید عاصم منیر دی امن کیتے کوششاں کوں سراہیندی پئی اے جڈانجو پاکستان معاشی استحکام دے بعد ترقی تے خوشحالی دی نویں منزل آلے پاسے ویندا پئے۔ اتوار کوں قومی اسمبلی اجلاس اچ آندے مالی سال دے بجٹ 27۔2026ء تے بحث اچ حصہ گھندیں ہوئیں وفاقی وزیر اطلاعات آکھیا جو جݙاں اساں اپوزیشن بینچاں تے ہاسے اوں ویلھے وی اساں میثاقِ معیشت تے میثاقِ جمہوریت دی ڳالھ کیتی اتے اڄ حکومت اچ ہووݨ دے باوجود وی ایہا مؤقف برقرار اے۔ انھاں آکھیا جو اے ایوان جمہوری روایات دا امین اے تے ہمیشہ انھاں روایات کوں فروغ ݙتے۔ انھاں آکھیا جو کل اپوزیشن لیڈر دی تقریر دے دوران ماحول قابلِ توجہ ہئی، احتجاج اپوزیشن دا جمہوری حق اے اتے ہر دور اچ اپوزیشن آپݨا کردار ادا کریندی رہی اے، وقت ہکو جیہا نئی رہندا، نشستاں بدلدی رہندن لیکن اصل فرق رویے تے نیت دا ہوندے۔ جݙاں اساں اپوزیشن اچ ہاسے تاں اوں وقت وی ڳالھ مہاڑ دی پیشکش کیتی ویندیاں رہی اتے اڄ حکومت اچ ہووݨ دے باوجود وی ایہا پیشکش کریندے پئیوں کیونجو جمہوری عمل اچ ڳالھ مہاڑ ای اڳوں ودھݨ دا رستہ اے۔ وفاقی وزیر آکھیا جو آندے مالی سال دے بجٹ دی نہ صرف ملکی بلکہ بین الاقوامی سطح تے وی پذیرائی کیتی ویندی پئی اے، معاشی تجزیہ کار ایں بجٹ تے مثبت ڳالھ کریندے پئن۔ بعض اپوزیشن ارکان ولوں وی مثبت تجاویز سامݨے آئن جنھاں کوں سراہا ونڄݨا چاہیدے۔ وفاقی وزیر اطلاعات آکھیا جو اساݙی یادداشت ٻہوں مختصر اے، اساں اڄ دی ڳالھ کریندے ہیسے لیکن ماضی دی کوئی ڳالھ نئی کریندے، اے یاد ݙواوݨ چاہنداں جو انھاں لوکاں آئی ایم ایف کوں خط لکھیے، اے چاہندن جو ملک ڈیفالٹ کرے۔ انھاں آکھیاجو جے کہیں معیشت کیتے چنڳا کام کیتے تاں اساں ایں دی تعریف کریسوں لیکن اے گوارا نئی جو اساں آپݨی سیاست دی خاطر پاکستان دے خلاف سازشاں کروں۔ انھاں آکھیا جو انھاں لوکاں آپݨے دور اچ آئی ایم ایف کوں خطوط لکھیے اتے ایں تے بیانیہ بݨایا، پوری کمپین چلائی، تاریخ اچ ایں کوں ہمیشہ یاد رکھیا ویسی جو ہک پاسے وزیراعظم شہباز شریف پیرس اچ میٹنگ کر تے معاملات جوڑیندے پئے ہن اتے ݙوجھے پاسے اتھ توں خط لکھے ویندے پئے ہن جو پاکستان کوں بیل آؤٹ پیکیج نہ ملے۔وفاقی وزیر آکھیا جو موجودہ معاشی استحکام ٹیم ورک دا نتیجہ اے ایں اچ اداریاں دی محنت شامل اے، ایں اچ فیلڈ مارشل سید عاصم منیر تے انھاں دی ٹیم دا وی بھرپور حصہ اے۔ وفاقی وزیر آکھیا جو میکرو اکنامک استحکام دے اعداد و شمار جھٹلائے نئی ونڄ سڳدے، جی ڈی پی گروتھ جیڑھی اوں ویلھے 0.2 فیصد ہئی ہݨ 3.7 فیصد تئیں پڄ ڳئی اے، فی کس آمدݨ 1751 ڈالر توں ودھ کراہیں 1901 ڈالر تھی ڳئی اے۔ عطاء اللہ تارڑ آکھیا جو جے حکومت معاشی استحکام نہ ݙتا ہوندا تاں مہنگائی 38 فیصد توں ڳھٹ تھی کراہیں سنگل ڈیجیٹ اچ نہ آندی، ایں ہی طرح شرحِ سود 22 فیصد توں ڳھٹ تھی کراہیں 11 فیصد تے نہ آندی۔ انھاں آکھیا جو زرمبادلہ دے ذخائر 17.2 ارب ڈالر تئیں پڄ ڳئں جڈانجو ترسیلاتِ زر 33.9 ارب ڈالر تھی ڳئن جنھاں اچ سال بہ سال 9 فیصد ودھارا تھیے۔ انھاں آکھیا جو آئی ٹی برآمدات 3.8 ارب ڈالر تئیں پڄ ڳئں جنھاں اچ فری لانسرز دا 995 ملین ڈالر دا حصہ وی شامل اے، مالی خسارہ جیڑھا 2022ء اچ 8 فیصد ہئی، ہݨ 0.7 فیصد تے آ ڳئے۔