امریکہ اتے ایران وچال امن معاہدہ طے، دستخطی تقریب 19 جون کوں سوئٹزرلینڈ اچ تھیسی، وزیراعظم شہباز شریف

اسلام آباد۔15 جون(اے پی پی)وزیراعظم محمد شہباز شریف آکھیے جو امریکہ اتے ایران وچال امن معاہدہ طے پا ڳئے، فریقین لبنان سودھا سارے محاذاں تے فوجی کارروائیاں دے فوری اتے مستقل خاتمے دا اعلان کر ݙتے، امن معاہدے تے دستخطاں دی باضابطہ تقریب 19 جون کوں سوئٹزرلینڈ اچ تھیسی۔ سنوار کوں سماجی رابطے دی ویب سائٹ ایکس تے اپݨے بیان اچ وزیراعظم آکھیا جو طویل اتے نتیجہ خیز مذاکرات دے بعد ساکوں اے اعلان کریندے خوشی تھیندی پئی اے جو امریکہ اتے ایران وچال امن معاہدہ طے پا ڳئے، فریقین لبنان سودھا سارے محاذاں تے فوجی کارروائیاں دے فوری اتے مستقل خاتمے دا اعلان کر ݙتے، امن معاہدے تے دستخطاں دی باضابطہ تقریب 19 جون کوں سوئٹزرلینڈ اچ تھیسی۔ وزیراعظم آکھیا جو اساں تنازعے دے سفارتی حل کیتے امریکہ اتے ایران دے عزم دے معترف ہیں، اساں ایں ثالثی عمل اچ تعاون تے برادر ملک قطر دی قیادت دے وی مشکور ہیں جیندی حمایت ایں معاہدے تئیں پڄݨ اچ اہم ثابت تھئی۔ انھاں آکھیا جو ایں سسانڳے سعودی عرب اتے ترکیہ دی دور اندیش قیادت دی گرانقدر خدمات اتے نمایاں کردار تے وی خصوصی شکریہ ادا کریندے ہیں۔ وزیراعظم آکھیا جو معاہدہ طے پاوݨ دے بعد ثالث ایں ہفتے کئی ملاقاتاں کریسن، انھاں ابتدائی مذاکرات نال تکنیکی سطح دی ڳالھ مہاڑ اتے معاہدے تے باضابطہ دستخطاں دی تقریب کیتے ٻݨیاد ٻݨسی۔