تریجھی عالمی جنگ کوں روکݨ دا اعزاز پاکستان دے حصے آئے، پاکستان نوبل امن ایوارڈ دا حق دار اے، سپیکر قومی اسمبلی

اسلام آباد۔15 جون(اے پی پی)سپیکر قومی اسمبلی ایاز صادق آکھیے جو تریجھی عالمی جنگ کوں روکݨ دا اعزاز پاکستان دے حصے اچ آئے، پاکستان نوبل امن ایوارڈ دا حق دار اے۔ قومی اسمبلی اجلاس اچ امریکہ اتے ایران وچال معاہدے تے الیندے سپیکر قومی اسمبلی آکھیا جو اللہ تعالیٰ دا وݙا شکر اے جو اوں اے اعزاز پاکستان کوں ݙتے اتے پاکستان کوں او عزت ملی اے جیںدی وجہ توں تریجھی جنگِ عظیم شاید ہووݨ توں رک ڳئی اے۔ انھاں آکھیا جو ایران امریکہ امن معاہدے تے او حکومت، عوام اتے اراکینِ پارلیمان کوں مبارکباد ݙیندن۔ ایں معاہدے تے وزیراعظم پاکستان،  چیف آف ڈیفنس سٹاف فیلڈ مارشل عاصم منیر اتے نائب وزیراعظم و وزیر خارجہ سینیٹر محمد اسحاق ڈار وی مبارکباد دے مستحق ہن جنھاں دی انتھک اتے مسلسل کوششاں نال اے پیش رفت ممکن تھی سڳی اے۔ سپیکر قومی اسمبلی وزیرِ داخلہ محسن نقوی دے مسلسل رابطیاں، قومی سلامتی دے مشیر دی کوششاں، سیکرٹری خارجہ آمنہ بلوچ صاحبہ، فارن آفس دی ٹیم تے معاہدے اتے اتفاقِ رائے کیتے مثبت کردار ادا کرݨ آلے ملکاں کوں وی لائقِ ستائش قرار ݙتے۔ انھاں آکھیا جو پاکستان دی قیادت نوبل امن پرائز دی حق دار اے، سپیکر قومی اسمبلی مہماناں دی گیلری اچ دوست ملکاں دے سفیراں کوں خوش آمدید آکھیا۔