پنجاب دا 5 ہزار 903 ارب روپے دا بجٹ پیش، تنخواہاں اچ 7، پنشن اچ 3.5 فیصد ودھاوݨ دی تجویز

لاہور۔16 جون(اے پی پی)پنجاب اسمبلی اچ وزیرِ خزانہ میاں مجتبیٰ شجاع الرحمن مالی سال 27-2026ء دا 5 ہزار 903 ارب روپے حجم دا بجٹ ایوان اچ پیش کیتے۔ پنجاب اسمبلی دا بجٹ اجلاس سپیکر ملک محمد احمد خان دی اڳواݨی اچ شروع تھئے۔ وزیرِاعلیٰ پنجاب مریم نواز شریف وی ایوان اچ موجود ہن۔ اجلاس شروع تھیندے ہی اپوزیشن شدید احتجاج کیتا اتے نعرے بازی کیتی۔ وزیرِ خزانہ پنجاب مجتبیٰ شجاع الرحمن بجٹ تقریر کریندے آکھیا جو ایران، امریکہ امن معاہدے تے پوری قوم کوں مبارک ݙینداں، ایران تے امریکہ دے وچال امن معاہدہ پاکستان دی مخلصانہ سفارتی کوششاں دا نتیجہ اے۔ وزیرِ خزانہ آکھیا جو موجودہ بجٹ اچ صرف آئندہ دے اہداف نئیں ٻھل پچھلے سال دی کارکردگی دا حساب وی شامل اے، پنجاب حکومت مالی نظم و ضبط دی پالیسی دے تحت غیر ضروری اخراجات اچ ڳھٹائن، نمایاں کمی کیتی۔ صوبائی کابینہ اتے سیکرٹریز 3 مہینے دی تنخواہیں تے مراعات نہ گھنݨ دا فیصلہ کیتا، جڈانجو اراکینِ اسمبلی دی ݙو مہینے دی تنخواہیں اچ 25 فیصد کٹوتی کیتی ڳئی۔ سرکاری گاݙیاں دے استعمال اچ 60 فیصد کمی گھن آ تے قومی خزانے کوں بچت فراہم کیتی ڳئی۔ بجٹ دستاویزات دے مطابق روزمرہ اخراجات اچ گزشتہ مالی سال دے مقابلے اچ 5 فیصد کمی ریکارڈ کیتی ڳئی جڈانجو مجموعی اخراجات اچ صرف 3.1 فیصد اضافہ تھئے، جیکوں کفایت شعاری پالیسی دا مثبت نتیجہ قرار ݙتا ڳیا۔ وزیرِ خزانہ مجتبیٰ شجاع الرحمن بجٹ تقریر اچ سرکاری ملازمین تے پنشنرز کیتے تنخواہیں اتے پنشن اچ اضافے دی تجویز پیش کریندے آکھیا جو آئندہ مالی سال 27-2026ء توں صوبائی سرکاری ملازمین دی تنخواہیں اچ 7 فیصد جڈانجو ریٹائرڈ ملازمین دی پنشن اچ 3.5 فیصد اضافے دی تجویز ݙتی ڳئی اے۔ صوبائی سرکاری ملازمین دی تنخواہیں دی ادائیگی کیتے 650 ارب روپے، ریٹائرڈ ملازمین دی پنشن دی مد اچ 505 ارب روپے رکھین۔ مالی سال 27-2026ء دے ٹیکس فری بجٹ اچ تنخواہیں تے پنشن دی ادائیگیاں کیتے مجموعی طور تے ہک ہزار 155 ارب روپے توں ودھ دی رقم مختص کیتی ڳئی اے، تاں جو سرکاری ملازمین اتے پنشنرز کوں ریلیف ݙتا ونڄے۔ بجٹ دستاویزات دے مطابق آئندہ مالی سال اچ مختلف سرکاری محکمیاں دے ترقیاتی منصوبیاں کیتے خطیر فنڈز مختص کرݨ دی تجویز ݙتی ڳئی اے۔ پلاننگ اینڈ ڈویلپمنٹ کیتے 25 ارب 35 کروڑ روپے، بورڈ آف ریونیو کیتے 18 ارب 95 کروڑ روپے، پولیس کیتے 12 ارب 88 کروڑ روپے، انفارمیشن اینڈ کلچر کیتے 6 ارب 70 کروڑ روپے، ٹرانسپورٹ دے شعبے کیتے 78 ارب 50 کروڑ روپے، عدلیہ کیتے 3 ارب روپے جڈانجو قانون و پارلیمانی امور کیتے 2 ارب 20 کروڑ روپے مختص کرݨ دی سفارش کیتی ڳئی اے۔ محفوظ پنجاب ویژن دے تحت پولیس تے ٻئے قانون نافذ کرݨ والے اداریاں دی استعداد کار بڑھاوݨ، جدید سہولیات دی فراہمی تے امن و امان دی صورتحال کوں مزید بہتر بݨاوݨ کیتے مجموعی طور تے 252 ارب روپے مختص کیتے ڳئن۔ آئندہ مالی سال کیتے چیف منسٹر اسکلز ڈویلپمنٹ پروگرام اچ 26 کروڑ روپے مختص کیتے ڳئن۔ سی ایم اسکلڈ پنجاب پروگرام تے ہک ارب 44 کروڑ روپے خرچ کیتے ویندے پئن۔ بجٹ اچ عالمی منڈیاں دی ضروریات دے مطابق مہارتاں کیتے 51 ارب روپے مختص کیتے ڳئن، “اسکلز فار گلوبل نیڈز” پروگرام دے تحت 2 لاکھ 40 ہزار لوکاں کوں تربیت ݙتی ویسی۔ وزیرِ خزانہ مجتبیٰ شجاع الرحمن ݙسیا جو فرنٹیئر ٹیک اسکلز اینڈ انوویٹ پنجاب پروگرام کیتے 12 ارب 30 کروڑ روپے مختص کیتے ڳئن، ایکسیلیریٹ پنجاب ٹیک اسکلز پروگرام کیتے 19 ارب 70 کروڑ روپے مختص کیتے ڳئن، وزیرِاعلیٰ اسمارٹ سیف سٹیز پروگرام دے تحت 47 ارب روپے دی مجموعی لاگت نال سکیورٹی تے نگرانی دے متعدد منصوبیاں تے عملدرآمد جاری اے، کچے دے علاقیاں اچ پولیس نظام کوں مضبوط بݨاوݨ کیتے 2 ارب 20 کروڑ روپے دی لاگت نال نویں پولیس اسٹیشنز، پولیس پوسٹس تے پولیس پکٹس دی تعمیر دی تجویز ݙتی ڳئی اے۔ صوبے دے 28 اضلاع اچ جدید کرائم سین یونٹس قائم کیتے جائیسن، جنھاں تے 14 ارب 21 کروڑ روپے خرچ کیتے ویسن۔ صوبے بھر دے تحصیل ہیڈکوارٹرز اچ جدید پبلک ٹرانسپورٹ دی سہولت فراہم کرݨ کیتے 2 ہزار الیکٹرک بساں دی فراہمی دا منصوبہ وی آئندہ مالی سال دے بجٹ اچ شامل  اے۔ ریلوے ٹریکس دی بحالی کیتے 10 ارب روپے جڈانجو نہری نظام دی بہتری، آبپاشی دے انفراسٹرکچر دی مضبوطی تے زرعی شعبے دی معاونت کیتے 61 ارب 14 کروڑ روپے مختص کرݨ دی تجویز اے۔ ماحول دوست ٹرانسپورٹ دے فروغ کیتے الیکٹرک گاݙیاں تے ٹوکن ٹیکس اچ رعایت 95 فیصد توں ودھا کراہیں 99 فیصد کرݨ دی تجویز ݙتی ڳئی اے۔ گھٹ آمدݨ والے خانداناں دی معاونت کیتے سوشل سیکیورٹی راشن کارڈ پروگرام کیتے 40 ارب روپے مختص کرݨ دی تجویز ݙتی ڳئی اے، ایں دے علاوہ پنجاب سوشل پروٹیکشن اتھارٹی دی تنظیم نو کیتے 2 ارب روپے، وزیرِاعلیٰ دھی رانی پروگرام کیتے ہک ارب 70 کروڑ روپے تے بزرگ شھریاں دی فلاح کیتے عافیت اولڈ ایج ہوم دے قیام دی مد اچ 2 ارب 6 کروڑ روپے، آئمہ مساجد دی معاونت کیتے 18 ارب 50 کروڑ روپے جڈانجو اقلیتی برادری دی فلاح و بہبود کیتے منیارٹی کارڈ پروگرام دی مد اچ 4 ارب روپے رکھݨ دی سفارش وی بجٹ دا حصہ اے۔ وزیرِاعلیٰ دھی رانی پروگرام دے تحت آئندہ مالی سال 27-2026ء دے بجٹ اچ ہک ارب 70 کروڑ روپے مختص کرݨ دی تجویز اے۔ وزیرِ خزانہ نے ݙسیا جو بزرگ شھریاں دی فلاح و بہبود کیتے پنجاب دے مختلف اضلاع اچ عافیت اولڈ ایج ہومز دے قیام دی مد اچ 2 ارب 6 کروڑ روپے مختص کیتے ڳئن۔ وزیرِ خزانہ مجتبیٰ شجاع الرحمن آکھیا جو آئندہ مالی سال 27-2026ء اچ خصوصی افراد دی معاونت تے فلاحی پروگراموں کیتے 5 ارب روپے مختص کرݨ دی تجویز ݙتی ڳئی اے۔ آئندہ مالی سال اچ خصوصی افراد دے معاونت پروگرام کیتے 3 ارب 70 کروڑ روپے مختص کیتے ڳئن۔ آئندہ مالی سال اچ کسان کارڈ پروگرام کیتے 10 ارب روپے مختص کرݨ دی تجویز اے، پروگرام دے تحت 10 لکھ کساناں کوں کھاد، بیج، زرعی ادویات اتے ٻئے زرعی مداخل دی خریداری کیتے مالی سہولت ملسی۔ گرین ٹریکٹر پروگرام دے تحت اگلے مرحلے اچ 7 ارب روپے دی لاگت نال 10 ہزار لو پاور گرین ٹریکٹرز سبسڈی تے ݙتے ویسن، 9 ارب 90 کروڑ روپے توں مزید 6 ہزار 500 ہائی پاور ٹریکٹرز وی کساناں کوں رعایتی نرخاں تے ملسن۔ پنجاب کلائمیٹ ریزیلینٹ پروگرام دے تحت 36 ارب 12 کروڑ روپے دی لاگت نال کساناں کوں جدید زرعی مشینری تئیں رسائی ݙتی ویسی۔ وزیرِ خزانہ دے مطابق آئندہ مالی سال اچ 2 ارب 70 کروڑ روپے دی لاگت نال 3 ہزار زرعی گریجویٹس کوں انٹرن شپ پروگرام اچ شامل کیتا ویسی۔ کساناں کوں ہک ہی چھت تلے زرعی سہولیات کیتے صوبے اچ مزید 10 ماڈل ایگریکلچر مالز قائم کیتے یسن، جڈانجو ہک ارب 82 کروڑ روپے دی لاگت نال انھاں مراکز دے دائرۂ کار کوں مزید وسعت ݙتی ویسی۔ ستھرا پنجاب پروگرام دے تحت آئندہ مالی سال 27-2026ء اچ 170 ارب روپے رکھݨ دی تجویز اے، بہتر تفریحی سہولیات اتے شہری ماحول دے منصوبیاں کیتے 2 ارب روپے ݙتے ویسن۔ لائیو اسٹاک کارڈ پروگرام دے آئندہ مالی سال 27-2026ء اچ 4 ارب 40 کروڑ روپے ݙتے ویسن، 3 ارب 12 کروڑ روپے دی لاگت نال 10 ہزار دیہی خواتین اچ کھیر ݙیوݨ والے جانور ونݙیے ویسن، لائیو اسٹاک اثاثیاں دی فراہمی دے منصوبے دے تحت 2 ارب روپے دی لاگت نال 4 ݙول (ہزار) 385 دیہی خواتین کوں مویشی ݙتے ڳئن۔ مویشیاں کوں بہتر طبی سہولیات کیتے 4 ارب 85 کروڑ روپے دی لاگت نال 146 ویٹرنری ہسپتال قائم کیتے ویسن، 10 ارب 17 کروڑ روپے توں 482 موبائل ویٹرنری ڈسپنسریز شروع کرݨ دی تجویز ݙتی ڳئی اے، مویشی پال افراد دی جدید تربیت کیتے ہک ارب روپے مختص کرݨ دی تجویز ݙتی ڳئی اے، لائیو اسٹاک کارڈ فیز ٹو کیتے 4 ارب 44 کروڑ روپے رکھݨ دی تجویز اے۔ بجٹ دستاویزات کے مطابق آئندہ مالی سال اچ گاݙیاں دے سالانہ ٹوکن ٹیکس اچ ترے گنا تئیں اضافے دی تجویز ݙتی ڳئی اے، تجویز دے مطابق 2 ہزار 200 روپے سالانہ ٹوکن ٹیکس ودھا تے 6 ہزار 600 روپے، 4 ہزار روپے توں 12 ہزار روپے، 6 ہزار روپے توں 18 ہزار روپے اتے 8 ہزار روپے توں ودھا تے 24 ہزار روپے سالانہ کرݨ دی سفارش کیتی ڳئی اے۔ ایں دے علاوہ گاݙیاں دی رجسٹریشن اتے ملکیت دی منتقلی تے ودہولڈنگ ٹیکس دی شرح اچ وی اضافے دی تجویز ݙتی ڳئی اے، جئیں دے تحت 0.2 فیصد ٹیکس ودھا کراہیں 0.3 فیصد جڈانجو 0.3 فیصد ٹیکس ودھا کراہیں 0.4 فیصد کرݨ دی سفارش کیتی ڳئی اے۔ بجٹ تجاویز اچ موٹر ڈیلرز کوں ودہولڈنگ ایجنٹ دے اختیارات ݙیوݨ دی سفارش وی شامل اے۔ پراپرٹی ٹیکس دی ادائیگی کوں مکمل طور تے الیکٹرانک نظام دے تحت لازمی قرار ݙیوݨ دی تجویز ݙتی ڳئی اے۔ پراپرٹی ٹیکس نادہندگان تے سرچارج دے نظام اچ وی تبدیلی دی تجویز اے، آئندہ سرچارج ماہانہ دے بجائے سہ ماہی بنیاداں تے لایا ویسی۔ بجٹ اچ ایکسائز اینڈ ٹیکسیشن توں متعلق متعدد ٹیکسز تے طریقۂ کار اچ اصلاحات تے تبدیلیاں وی تجویز کیتیاں ڳئن۔