قوماں صرف مادی وسائل نال نئیں، اعلیٰ اخلاق، عدل، دیانت، اتحاد اتے مشترکہ مقاصد نال ترقی کریندن، صدرِ مملکت دا ہجری سال 1448ھ دی شروعات تے سنیہا

اسلام آباد۔17 جون (اے پی پی)صدرِ مملکت آصف علی زرداری پاکستان سودھا عالمِ اسلام کوں نویں ہجری سال 1448ھ دے شروع تھیوݨ تے مبارک ݙیندے آکھیے جو ہجری سال دا آغاز ساکوں تاریخِ اسلام دے ایں عظیم اتے فیصلہ کن واقعے دی یاد ݙویندے جݙاں نبی کریم ﷺ اتے آپﷺ دے جاں نثار صحابہ کرام رضی اللہ تعالیٰ عنہم اللہ تعالیٰ دی رضا، دینِ حق دی سربلندی اتے انسانیت دی فلاح کیتے ہجرتِ مدینہ دا عظیم سفر اختیار کیتے۔ نویں ہجری سال 1448ھ دی شروعات تے سنیہے اچ انہاں آکھیے جو اے واقعہ قربانی، صبر، استقامت، اخوت، ایثار اتے اللہ تعالیٰ تے کامل توکل دا لازوال سبق ݙیندے، اللہ تعالیٰ قرآنِ کریم اچ فرمیندے: ’’هَلْ جَزَآءُ الْاِحْسَانِ اِلَّا الْاِحْسَانُ‘‘ (الرحمن: 60) ترجمہ: ’’نیکی دا بدلہ صرف نیکی ہی اے۔‘‘ انھاں آکھیا جو ہجرتِ نبوی ﷺ اے سکھیندی اے جو قوماں صرف مادی وسائل نال نئیں ٻھل اعلیٰ اخلاق، عدل، دیانت، اتحاد اتے مشترکہ مقاصد نال ترقی کریندن، مدینہ منورہ اچ قائم تھیوݨ آلی ریاست رواداری، قانون دی حکمرانی، انسانی مساوات، باہمی احترام اتے فلاحِ عامہ دی اینجھی روشن مثال قائم کیتی جیڑھی اڄ وی دنیا کیتے مشعلِ راہ اے۔ رسول اللہ ﷺ فرمایا: ’’المسلم من سلم المسلمون من لسانه ويده‘‘ (صحیح البخاری) ترجمہ: ’’مسلمان او اے جیںدی زبان اتے ہتھ توں ݙوجھے مسلمان محفوظ رہون۔‘‘ صدر آصف علی زرداری آکھیا جو نویں ہجری سال دے آغاز تے عہد کرݨا چاہیدے جو اساں اپݨی انفرادی اتے اجتماعی زندگیاں اچ برداشت، محبت، اخوت اتے باہمی احترام ودھاوں، فرقہ واریت، انتہا پسندی، نفرت اتے تعصب توں بچسوں اتے پاکستان کوں امن، استحکام اتے ترقی دا گہوارہ بݨاوݨ کیتے اپݨا کردار ادا کریسوں۔ رسول اللہ ﷺ فرمایا: مَثَلُ الْمُؤْمِنِينَ فِي تَوَادِّهِمْ وَتَرَاحُمِهِمْ وَتَعَاطُفِهِمْ مَثَلُ الْجَسَدِ اِذَا اشْتَكىٰ مِنْهُ عُضْوٌ تَدَاعىٰ لَهٗ سَائِرُ الْجَسَدِ بِالسَّهَرِ وَالْحُمَّى (صحیح مسلم) ترجمہ: مومناں دی مثال ہک ݙوجھے نال محبت، رحمت اتے شفقت کرݨ اچ جسم آلی کار اے، جݙاں ایںدا ہک حصہ بیماری اچ مبتلا تھیندے تاں سارا جسم بے چینی اتے بخار اچ ایںدے نال شریک تھی ویندے۔ صدرِ مملکت آکھیا جو ساکوں انفرادی و اجتماعی طور تے باہمی محبت، اخوت، ہمدردی، ایثار اتے تعاون دے جذبے کوں ودھاوݨا ہوسی۔ صدرِ مملکت آکھیا جو آؤ عہد کروں جو اساں اپݨے قول و عمل نال محبت، رحم دلی اتے یکجہتی ودھیسوں، آؤ نویں ہجری سال دا استقبال ایں عزم نال کروں جو اساں اپݨیاں زندگیاں کوں قرآن و سنت دے مطابق ڈھلیسوں، قانون دی پاسداری کریسوں، قومی یکجہتی کوں مضبوط ٻݨیسوں اتے پاکستان دی ترقی و خوشحالی اچ اپݨا حصہ رلیسوں، اللہ تعالیٰ نویں ہجری سال کوں پاکستان، عالمِ اسلام اتے پوری انسانیت کیتے امن، برکت، رحمت اتے خوشحالی دا سال ٻݨاوے۔