وفاقی وزیرِ داخلہ محسن نقوی نال برطانوی نائب وزیرِ خارجہ ہمیش فالکنر دی ملاقات

اسلام آباد۔17 جون(اے پی پی)وفاقی وزیرِ داخلہ محسن نقوی نال برطانوی نائب وزیرِ خارجہ ہمیش فالکنر ملاقات کیتی اتے پاک برطانیہ تعلقات اتے خطے دی مجموعی صورتِ حال تے الایا۔ ترجمان وزارتِ داخلہ دے مطابق برطانوی نائب وزیرِ خارجہ امریکہ ایران مفاہمت اتے پاکستان دے مثبت کردار کوں سراہندے آکھیا جو پاکستانی وزیراعظم شہباز شریف اتے فیلڈ مارشل سید عاصم منیر امن کیتے تاریخی کردار ادا کیتے۔ ایران امریکہ مفاہمت پاکستان کوں عالمی امن دا علمبردار ٻݨا تے پیش کیتے۔ ملاقات اچ ݙوہائیں ملکاں وچال انسدادِ دہشت گردی، انسدادِ غیر قانونی مائیگریشن، ادارہ جاتی تعاون، پولیس ٹریننگ سودھا مختلف شعبیاں اچ تعاون ودھاوݨ تے اتفاق کیتا ڳیا۔ وزیرِ داخلہ محسن نقوی دا آکھݨ ہئی جو اپ سکیل پراجیکٹ دے مثبت نتائج سامݨے آندے پئن، پاکستانی اداریاں دی استعداد کار ودھی اے۔ پاکستان اچ غیر قانونی مائیگریشن اتے انسانی سمگلنگ دے خلاف بلاتفریق کارروائی کیتی ویندی پئی اے۔ ݙوہائیں وزراء جعلی سٹوڈنٹ ویزیاں دے مسئلے دے حل کیتے مل تے کم کرݨ تے اتفاق کیتے۔ وزیرِ داخلہ محسن نقوی دا آکھݨ ہئی جو کئی دہشت گرد تنظیماں افغانستان توں سرگرم ہن، افغان حکومت کوں پاکستان دے خلاف اپݨی زمین دے استعمال کوں روکݨا پوسی۔ وزیرِ داخلہ محسن نقوی پاک برطانیہ تعلقات کوں ٻیا مستحکم ٻݨاوݨ دے عزم دوہرایا۔ وفاقی وزراء چوہدری سالک حسین، علی پرویز ملک، طلال چوہدری، عون چوہدری، سیکرٹری داخلہ محمد خرم آغا، برطانوی ہائی کمشنر جین میریٹ، ڈی جی ایف آئی اے، کمانڈنٹ این پی اے اتے ڈی جی این سی سی آئی اے وی ایں موقع تے موجود ہن۔