قومی اسمبلی امریکہ اتے ایران دے امن معاہدے تے تہنیتی قرارداد متفقہ طور تے منظور کر گھدی

اسلام آباد۔19 جون(اے پی پی)قومی اسمبلی پاکستان دیاں کوششاں اتے ثالثی نال امریکہ تے ایران وچال امن معاہدے بارے تہنیتی قرارداد دی منظوری ݙے ݙتی۔ جمعے کوں قومی اسمبلی دے اجلاس اچ وفاقی وزیرِ قانون و انصاف اعظم نذیر تارڑ اے قرارداد ایوان اچ پیش کیتی اتے قرارداد پڑھ تے سݨائی، جیںدی ایوان متفقہ طور تے منظوری ݙتی۔ قرارداد دے متن اچ ݙسایا ڳئے جو پاکستان دی قومی اسمبلی وݙے اطمینان اتے ماݨ نال ایں تاریخی سفارتی کامیابی کوں منیندی اے، جیڑھی امریکہ اتے اسلامی جمہوریہ ایران وچال محاذ آرائی مکاوݨ، امن و استحکام کیتے ہک فریم ورک تے مبنی معاہدے تے دستخط دی شکل اچ سامݨے آئی اے۔ اے ایوان ایں تنازعے دے علاقائی امن و استحکام اتے منفی اثرات دے نال نال دنیا بھر دے ملکاں دی معاشی استحکام اتے توانائی دے تحفظ تے پوݨ والے اثرات کوں وی منیندے۔ قرارداد موجب ایوان وزیرِ اعظم پاکستان محمد شہباز شریف، نائب وزیرِ اعظم و وزیرِ خارجہ سینیٹر محمد اسحاق ڈار، وزیرِ داخلہ سید محسن نقوی، فیلڈ مارشل سید عاصم منیر اتے مذاکراتی عمل اچ شامل پوری ٹیم دیاں خدمات کوں خراجِ تحسین پیش کریندے، انھاں دیاں مخلصانہ اتے انتھک کوششاں پاکستان کوں عالمی سطح تے ہک قابلِ اعتماد اتے غیر جانبدار ثالث دے طور تے منوائے۔ اے ایوان اسلامی جمہوریہ ایران اتے ریاستہائے متحدہ امریکہ دی قیادت کوں وی مبارکباد پیش کریندے اتے انھاں دی دانشمندانہ قیادت کوں سراہندے، جیںدے نتیجے اچ مذاکرات کامیابی نال مکمل تھئن اتے ایں تاریخی امن معاہدے تے دستخط ممکن تھئن۔ اے معاہدہ خطے اتے دنیا اچ امن، استحکام اتے باہمی تعاون ودھاوݨ کیتے ہک اہم سنگِ میل ٻݨسی۔