وزیراعظم دی امریکہ ایران معاہدے اچ کامیاب ثالثی تے قوم، سیاسی اتے عسکری قیادت کوں مبارکباد، پٹرولیم مصنوعات دیاں قیمتاں ڳھٹاوݨ دا اعلان

اسلام آباد۔19 جون(اے پی پی)وزیراعظم محمد شہباز شریف امریکہ اتے ایران وچال معاہدے کوں عملی جامہ پواوݨ اتے قوم، سیاسی اتے عسکری قیادت کوں مبارکباد ݙیندے آکھیے جو پاکستان کوں جیڑھی عزت اتے مرتبہ مِلے قوماں کوں صدیاں اچ اینجھی کامیابی نصیب تھیندی اے، اساں دنیا کوں قومی یکجہتی اتے اتحاد دا سنیہا ݙیوݨے اتے ایں عظیم فتح دا تقاضا اے جو اساں سارے ملک دی ترقی اتے خوشحالی کیتے ہک ہی صف اچ کھڑے تھیووں۔ ایں معاہدے نال دنیا اچ پٹرولیم مصنوعات دیاں قیمتاں اچ نمایاں کمی آئی اے جیںدے ثمرات عوام تئیں پڄاوݨ کیتے کمی دا اڄ اعلان کیتا ویسی۔ ایران دے صدر مسعود پزشکیان کوں دورہِ پاکستان دی دعوت ݙتی اے ڄݙاں جو ایرانی صدر سپریم لیڈر آیت اللہ خامنہ ای دی آخری رسومات اچ شرکت دی دعوت ݙتی اے۔ جمعے کوں قومی اسمبلی اچ الیندے وزیراعظم محمد شہباز شریف آکھیا جو خالقِ کائنات دا شکریہ ادا کریندے ہیں جئیں پاکستان کوں اے عزت ݙتی جو امریکہ اتے ایران وچال جنگ بندی دا معاہدہ تھئے، اڄ پوری دنیا اچ پاکستان دا ناں عزت اتے ماݨ نال ڳھدا ویندا پئے، پاکستان دے ایں کردار تے ایں ایوان توں ہک متفقہ قرارداد ونڄݨی چاہیدی اے جیڑھی ایں عظیم کامیابی کیتے ایں ہاؤس دی بھرپور تائید ہوسی اتے ایںدے نال دنیا اچ یکجہتی، اتفاق اتے اتحاد دا سنیہا ویسی۔ انھاں اپوزیشن کوں وی دعوت ݙتی جو او سیاسی اختلافات کوں ہک پاسے رکھ تے رِل مل تے ایں مبارک ݙینھ اللہ دا شکر ادا کرن اتے دنیا کوں ݙساون جو سیاسی اختلافات دے نال نال قومی مفادات کیتے اساں ہک ہیں اتے ہک رہسوں۔ انھاں پاکستان دی ایں کامیابی دا اعتراف کریندے شعور وی پڑھیا اتے آکھیے جو ایں عظیم کامیابی اچ سب توں کلیدی کردار فیلڈ مارشل سید عاصم منیر ادا کیتے، امن کیتے ݙھائی مہینے ݙینھ رات کام کیتے، کئی واری جنگ بندی مکدی ݙسدی ہئی ٻھل اللہ دے فضل نال پاکستان کوں عزت اتے ماݨ نصیب تھئے، اے قوم دا کریڈت اے۔ انہاں نائب وزیراعظم اسحاق ڈار، وزیر داخلہ محسن نقوی، اپوزیشن جماعتاں، انھاں دے اراکین، اتحادی جماعتاں اتے انھاں دے قائدین کوں وی مبارک ݙتی جنہاں بھرپور کردار ادا کیتے۔ وزیراعظم ایران دے صدر مسعود پزشکیان نال کل تھیوݨ آلی ڳالھ مہاڑ دی تفصیل وی ایوان کوں ݙسائی جو ایران دی قیادت اتے عوام پاکستان دے ممنون ہین اتے شکریہ ادا کیتے۔ انہاں آکھیا جو ایرانی صدر کوں دورہ پاکستان دی دعوت وی ݙتی اے تاں جو ڄڳ ݙیکھے جو ایران اتے پاکستان صرف ہمسائے ہی نئیں ہک ٻئے دے ٻھرا ملک ہین، ساݙے دل ہک ٻئے دے نال دھڑکدن۔ ایرانی صدر پہلی فرصت اچ پاکستان آوݨ دا عندیہ ݙتے جو او پاکستان آ تے عوام دا شکریہ ادا کریسن۔ وزیر اعظم، سپریم لیڈر آیت اللہ خامنہ ای دی تدفین جیڑھی 3 یا 4 جولائی کوں تھیوݨی اے، اچ شرکت دی دعوت ݙتی اے جیندے اچ ضرور ویسوں، اسا آندے ویلھے ݙاݙھی قربت نال ہک ٻئے دا پورا ہتھ ونݙیسوں، ایں جنگ بندی نال خطے اچ معاشی خوشحالی آسی۔ وزیراعظم آکھیا جو خطے اچ جنگ بندی دے بعد تیل دیاں قیمتاں تیزی نال ڳھٹدیاں پئن اتے ٻیاں وی ہیٹھ ویسن، پاکستان اچ وی پٹرولیم مصنوعات دیاں قیمتاں تے اڄ ول دیدی ٻھنویسوں اتے ودھ توں ودھ کمی کیتی ویسی، ڄݙاں 3 مہینے پہلے جنگ چھڑی تاں اوں ویلھے تیل دا ملھ یکدم اتے ڳئے اتے مہانڳ دا طوفان آئے، ایں اوکھ اچ پاکستان دے عوام جیویں صبر ݙکھائے او اپݨی مثال آپ اے، ایںدے تے پاکستانی عوام دا شکریہ ادا کریندے ہیں جو انھاں اوکھ ا ایݙی برداشت ݙکھائی، حکومت ایں مہانڳ توں عام آدمی کوں بچاوݨ کیتے ودھ کوشش کیتی، پٹرولیم مصنوعات تے 128 ارب روپے دی سبسڈی ݙتی تاں جو عوام اتے مہنگائی دا گھٹ توں گھٹ ٻھار پووے۔ انھاں آکھیا جو ہݨ او کالی اندھاری رات مکݨ آلی اے اتے ترقی و خوشحالی دا سجھ اُٻھرݨ والا اے۔ وزیراعظم صوبائی حکومتاں دا وی شکریہ ادا کیتا جنھاں ایں اوکھے ویلھے وفاق دی بھرپور معاونت کیتی اتے انھاں اپݨے عوام کوں ریلیف پڄاوݨ دی ہر ممکن کوشش کیتی۔ انھاں وزیرِ پٹرولیم علی پرویز ملک، وزیرِ خزانہ محمد اورنگزیب، وزیرِ منصوبہ بندی، نائب وزیراعظم، سیکرٹری خزانہ اتے سیکرٹری پٹرولیم دا وی شکریہ ادا کیتے جو ساریاں مل تے ایںدے اچ اپݨا حصہ پاتے۔ انھاں آکھیا جو انھاں مشکل ترین حالات دے باوجود پاکستان اچ پٹرول پمپاں تے لائنیں نئیں لڳیاں، کوئی بلوے نئیں تھئے ڄݙاں جو سری لنکا اتے بنگلہ دیش اچ جیڑھی صورتِ حال پیدا تھئی او ساریاں دے سامݨے اے۔ وزیراعظم سارے دوست ملکاں دا وی شکریہ ادا کیتا جنھاں امن کیتے ہتھ ونݙائے۔ انھاں ایران دی لیڈرشپ دی سنجیدگی اتے متانت دے نال نال مذاکراتی عمل اچ شرکت تے انھاں دا شکریہ ادا کیتا۔ انھاں امریکہ دی قیادت بالخصوص صدر ڈونلڈ ٹرمپ ولوں مذاکراتی عمل اچ بھرپور حصہ پاوݨ تے انھاں دا وی شکریہ ادا کیتا۔ وزیراعظم برادر ملک قطر، سعودی عرب، ترکیہ دے کردار کوں وی سراہیا۔ وزیراعظم آکھیا جو چین جیڑھا پاکستان دا ہمالیہ آلی کار سنڳتی ملک اے ایںدا ایں امن اچ وݙا کردار رہے۔ ایںدی لیڈرشپ امن عمل اچ بھرپور معاونت کیتی۔ انھاں ایں عمل اچ حصہ پاوݨ والے ٻئے ملکاں دا وی شکریہ ادا کیتا۔ وزیراعظم آکھیا جو اے عزت اتے وقار قوماں کوں صدیاں اچ نئیں مِلدا، ساکوں ایں عزت تے اللہ دے سامݨے سجدہ ریز تھیوݨا چاہیدے اتے ایںدا شکر ادا کرݨا چاہیدے۔ وزیراعظم آکھیا جو ایں ایوان توں قومی یکجہتی اتے اتحاد دا سنیہا ونڄݨا چاہیدے تاں جو ساݙے دشمن ہکے ٻکے رہ ونڄن اتے سنڳت دی ہمت ودھے۔ وزیراعظم آکھیا جو اے عظیم کامیابی ایں ڳالھ دی متقاضی اے جو ایں عظیم فتح کیتے اساں سارے اکٹھے تھی تے ملک دی ترقی و خوشحالی کیتے ہک صف اچ کھڑے تھیووں۔