وفاقی کابینہ وزارتِ مذہبی امور و بین المذاہب ہم آہنگی دی پیش کیتی پرائیویٹ حج پالیسی 2027-2030 دی منظوری ݙے ݙتی

اسلام آباد۔19 جون (اے پی پی)وفاقی کابینہ وزارتِ مذہبی امور و بین المذاہب ہم آہنگی دی پیش کیتی ڳئی پرائیویٹ حج پالیسی 2027-2030 دی منظوری ݙے ݙتی اے، جیںدے تحت نجی حج انتظامات کوں جدید، شفاف اتے مکمل طور تے ڈیجیٹل نظام سانڳے ٻݨایا ویسی۔ وزارتِ مذہبی امور دے ترجمان دے مطابق نویں پالیسی دے تحت پرائیویٹ حج کیتے روایتی کوٹہ سسٹم دی ڄاہ تے کارکردگی اتے قواعد و ضوابط دی پابندی تے مبنی نظام نافذ کیتا ویسی۔ موجودہ حج آپریٹرز دی ولا پڑتال لازمی قرار ݙتی ڳئی اے ڄݙاں جو انھاں دی آزاد ماہرین توں درجہ بندی وی کیتی ویسی۔ ترجمان موجب پرائیویٹ حج کوٹہ ’’پہلے آو، پہلے پاو‘‘ دی بنیاد تے مختص کیتا ویسی۔ ہر حج آپریٹر کیتے گھٹ توں گھٹ ݙو ہزار حجاج دی بکنگ لازمی ہوسی ڄݙاں جو مقررہ حد توں گھٹ بکنگ حاصل کرݨ آلیاں کمپنیاں کوں غیر فعال قرار ݙتا ویسی۔ نویں پالیسی دے تحت ناکام قرار ݙتیاں ونڄݨ آلیاں کمپنیاں دی اَدھ سکیورٹی ضبط کیتی ویسی اتے انھاں دے حجاج کوں خودکار نظام نال ٻیاں اہل کمپنیان نال جوڑ ݙتا ویسی تاں جو عازمینِ حج کوں کوئی اوکھ نا تھیوے۔ پالیسی دے مطابق حج (کمپنیاں) دے لائسنس 3 سال کیتے جاری کیتے ویسن۔ کوٹہ دی خرید و فروخت تے پوری پابندی ہوسی ڄݙاں جو کارٹل سازی اتے اجارہ داری دے رجحانات دے خلاف سخت کارروائی کیتی ویسی۔ پرائیویٹ حج آپریشنز مکمل طور تے ڈیجیٹل نظام دے تحت چلائے ویسن اتے حج بکنگ صرف پرائیویٹ حج مینجمنٹ پورٹل (پی ایچ ایم پی) دے ذریعے کیتی ونڄ سڳسی۔ اے پورٹل نادرا اتے اسٹیٹ بینک آف پاکستان نال منسلک ہوسی۔ دستی بکنگ اتے نقد لین دین تے پابندی ہوسی اتے حج کمپنیاں حجاج دے فنڈز اپݨے کولا نا رکھ سڳسن۔ سعودی عرب اچ خدمات ݙیوݨ والے اداریاں کوں ادائیگیاں براہِ راست کیتاں ویسن ڄݙاں جو سارے مالی معاملات اسٹیٹ بینک آف پاکستان دے سرکاری اکاؤنٹ توں کیتے ویسن۔وزارتِ مذہبی امور دے مطابق نویں پالیسی نال شفافیت، احتساب تے حجاج دے مالی و انتظامی تحفظ کوں مزید فروغ مِلسی ڄݙاں جو پاکستان دا پرائیویٹ حج نظام سعودی وژن 2030 دے تقاضیاں دے مطابق تھی ویسی۔