قومی اسمبلی دے بجٹ اچ 5 ارب روپے دی تاریخی بچت تھئی اے، سپیکر سردار ایاز صادق

اسلام آباد۔20 جون(اے پی پی)سپیکر قومی اسمبلی سردار ایاز صادق آکھیے جو حکومت اتے اپوزیشن ارکانِ پارلیمنٹ سودھا اسمبلی سیکرٹریٹ دے ملازمین دے کلیدی کردار اتے بھرپور تعاون نال قومی اسمبلی دے بجٹ اچ 5 ارب روپے دی تاریخی بچت ممکن تھئی اے۔ قومی اسمبلی اچ بجٹ سیشن 2026-27 اچ عام بحث سمیٹݨ دے موقع تے سپیکر سردار ایاز صادق وزیرِ خزانہ دا شکریہ ادا کریندے ہوئیں ایں اہم کامیابی دیاں تفصیلات ایوان کوں ݙسائن۔ انھاں واضح کیتے جو معزز ارکان دی معاونت، کنٹریبوشن اتے سپورٹ دے بغیر اے ہدف حاصل کرݨا ناممکن ہئی۔ انہاں آکھیا جو ایں بچت مہم اچ جِتھاں حکومت اتے اپوزیشن ݙوہائیں پاسے دے اراکین اپݨا مثبت اتے کلیدی کردار ادا کیتے، اتھائیں قومی اسمبلی دے سٹاف دیاں مخلصانہ کوششاں وی نال رہن۔ انھاں سارے شراکت داراں دی کارکردگی کوں سراہیا، جیںدے تے ایوان اچ موجود ارکان ڈیسک وڄا تے ایں تاریخی اقدام دی تائید کیتی۔