اسلام آباد مفاہمتی یادداشت دے تحت امریکا تے ایران دے وچال اعلیٰ سطح دے تکنیکی مذاکرات دا پہلا سیشن اختتام پذیر، فریقین وچال حتمی معاہدے تئیں پڄݨ کیتے روڈ میپ تے اتفاق،مشترکہ اعلامیہ جاری

برگن سٹاک۔22 جون (اے پی پی) اسلام آباد مفاہمتی یادداشت دے تحت امریکا تے ایران دے وچال اعلیٰ سطح دے تکنیکی مذاکرات دا پہلا سیشن سوئٹزرلینڈ دے شہر برگن سٹاک اچ اختتام پذیر تھی ڳئے، لیک لوسرن سمٹ مثبت تے تعمیری ماحول اچ تھئی جئیں اچ حوصلہ افزا پیش رفت سامݨے آئی اے۔ مفاہمتی یادداشت دی بنیاد تے فریقین اعلیٰ سطح دی کمیٹی دے قیام تے اتفاق کیتے جیڑھی جو ثالثی عمل دی سیاسی نگرانی کریسی، چیف مذاکرات کار باقاعدگی نال ایں کمیٹی کوں رپورٹ پیش کریسن، کہیں وی ناخوشگوار واقعے یا غلط فہمی توں بچݨ کیتے فریقین وچال رابطہ لائن قائم کر ݙتی ڳئی اے۔لیک لوسرن سمٹ تے امریکا تے ایران دی شرکت نال منعقدہ پہلی اعلیٰ سطح دی کمیٹی دے اجلاس دے اختتام تے پاکستان تے قطر دی طرفوں جاری مشترکہ اعلامیے دے مطابق اسلام آباد مفاہمتی یادداشت دے تحت اعلیٰ سطح دے مذاکرات دا پہلا اجلاس سوئٹزرلینڈ دے شہر برگن سٹاک اچ اختتام پذیر تھی ڳئے جئیں اچ ایران، امریکا تے ثالثی کرݨ آلے ݙو ملکاں، قطر تے پاکستان دے نمائندیں شرکت کیتی۔ لیک لوسرن سمٹ مثبت تے تعمیری ماحول اچ منعقد تھئی جئیں دے دوران حوصلہ افزا پیش رفت سامݨے آئی ہئی جنھاں اچ مزید تکنیکی مذاکرات کیتے ہک طریقہ کار (میکانزم) دا قیام وی شامل اے۔مفاہمتی یادداشت دی بنیاد تے فریقین ہک اعلیٰ سطح دی کمیٹی دے قیام تے اتفاق کیتے جیڑھی ثالثی عمل دی سیاسی نگرانی کریسی۔ چیف مذاکرات کار باقاعدگی نال ایں کمیٹی کوں رپورٹ پیش کریسن تے جوہری امور، پابندیاں، نگرانی تے جھیڑیں دے حل متعلق ورکنگ گروپس دی قیادت کریسن تاںجو مفاہمتی یادداشت تے مؤثر عملدرآمد یقینی بݨایا ونڄ سڳے۔ اعلیٰ سطح دی کمیٹی آوݨ آلے 60 ݙینھ دے اندر حتمی معاہدے تئیں پڄݨ کیتے ہک روڈ میپ تے اتفاق کیتے جئیں دے تحت مزید تکنیکی مذاکرات وقتی طور تے شروع کیتے ویسن۔ایں توں علاوہ مفاہمتی یادداشت دے پیراگراف 5 اچ بیان کیتی ڳئی مدت دے دوران کہیں وی ناخوشگوار واقعے یا غلط فہمی توں بچݨ کیتے فریقین وچال ہک رابطہ لائن قائم کیتی ڳئی اے جئیں دا مقصد آبنائے ہرمز دے ذریعے تجارتی جہازاں دی محفوظ آونڄ کوں یقینی بݨاوݨ اے۔ فریقین ثالثی کرݨ آلے ملکاں دی سہولت کاری نال اپݨے وچال تے لبنان دے نال ہک ڈی کنفلکشن سیل قائم کرݨ تے وی اتفاق کیتے تاںجو مفاہمتی یادداشت دے مطابق لبنان اچ فوجی کارروائیاں دے خاتمے تے عملدرآمد یقینی بݨایا ونڄ سڳے۔ سارے امور تے تکنیکی مذاکرات ہفتے دے بقیہ ݙینھاں اچ برگن سٹاک ریزارٹ اچ جاری رہسن۔ ثالثی کرݨ آلے ملک ایں ڳالھ کوں یقینی بݨاوݨ کیتے اپݨی بھرپور کوششاں جاری رکھیسن جو مذاکرات تعمیری ماحول اچ اڳوں وددھئے رہن تے ہک حتمی معاہدے تئیں پڄایا ونڄ سڳے۔ اعلامیے موجب قطر تے پاکستان، امریکا تے ایران دی طرفوں سفارت کاری تے جھیڑے دے پرامن حل کیتے مسلسل وابستگی دی تعریف کیتی تے جاری مذاکرات اچ برادر تے دوست ملکاں دی مسلسل حمایت تے قیمتی تعاون تے انھاں دا شکریہ ادا کیتا ڳئے