سردار ایاز صادق دی عمران ندیم کوں سپیکر تے ملک کفایت الرحمٰن کوں بلا مقابلہ ڈپٹی سپیکر گلگت بلتستان اسمبلی منتخب تھیوݨ تے مبارخ

اسلام آباد۔22 جون (اے پی پی) سپیکر قومی اسمبلی سردار ایاز صادق عمران ندیم کوں سپیکر تے ملک کفایت الرحمٰن کوں بلا مقابلہ ڈپٹی سپیکر گلگت بلتستان اسمبلی منتخب تھیوݨ تے مبارخ پیش کریندے نیک خواہشات دا اظہار کیتے۔اپݨے ہک تہنیتی پیغام اچ انھاں نویں منتخب سپیکر تے ڈپٹی سپیکر گلگت بلتستان کیتے نیک تمناواں دا اظہار کریندے آکھیا جو عمران ندیم تے ملک کفایت الرحمٰن دا بلا مقابلہ انتخاب انھاں تے اراکینِ اسمبلی دے مکمل اعتماد دا واضح اظہار اے۔ امید اے جو نویں منتخب سپیکر تے ڈپٹی سپیکر آئین دی بالادستی تے جمہوری روایات دے ودھارے اچ مؤثر کردار ادا کریسن۔انھاں آکھیا جو مضبوط پارلیمانی ادارے وفاق تے اکائیاں دے وچال ہم آہنگی کوں ودھارا ݙیوݨ اچ اہم کردار ادا کریندن، گلگت بلتستان اسمبلی عوامی امنگاں دی ترجمانی تے خطے دی ترقی اچ اہم کردار ادا کریندی پئی اے، نویں منتخب قیادت دی دانشمندانہ رہنمائی اچ گلگت بلتستان اسمبلی مزید فعال تے مؤثر انداز اچ عوامی خدمت انجام ݙیسی۔انھاں آکھیا جو پارلیمانی تے جمہوری اداریں وچال تعاون، مشاورت تے تجربیں دا تبادلہ جمہوری نظام دے استحکام کیتے ناگزیر اے، امید اے جو نویں منتخب قیادت گلگت بلتستان دے عوام دی فلاح و بہبود، ترقی تے خوشحالی کیتے اپݨی ذمہ واریاں احسن انداز اچ انجام ݙیسی۔ سپیکر سردار ایاز صادق نویں منتخب سپیکر عمران ندیم تے ڈپٹی سپیکر ملک کفایت الرحمن دی کامیابی تے کامرانی کیتے دعا وی کیتی۔