اسلام آباد۔22 جون (اے پی پی) وزیراعظم دے معاونِ خصوصی قومی ورثہ و ثقافت حذیفہ رحمان امریکی نائب صدر جے ڈی وینس دی طرفوں فیلڈ مارشل سید عاصم منیر دی تعریف کوں پوری قوم کیتے ماݨ دی ڳالھ قرار ݙیندے آکھیے پاکستان دے ودھدے بین الاقوامی وقار تے علاقائی امن دے ودھارے اچ ایں دے مثبت کردار کوں ظاہر کریندن ۔پارلیمنٹ ہاؤس دے ٻاہروں میڈیا نال ڳالھ کریندے انہاں آکھیے …
امریکی نائب صدر جے ڈی وینس دی فیلڈ مارشل سید عاصم منیر دی تعریف پوری قوم کیتے ماݨ دی ڳالھ اے، حذیفہ رحمان
اسلام آباد۔22 جون (اے پی پی) وزیراعظم دے معاونِ خصوصی قومی ورثہ و ثقافت حذیفہ رحمان امریکی نائب صدر جے ڈی وینس دی طرفوں فیلڈ مارشل سید عاصم منیر دی تعریف کوں پوری قوم کیتے ماݨ دی ڳالھ قرار ݙیندے آکھیے پاکستان دے ودھدے بین الاقوامی وقار تے علاقائی امن دے ودھارے اچ ایں دے مثبت کردار کوں ظاہر کریندن ۔پارلیمنٹ ہاؤس دے ٻاہروں میڈیا نال ڳالھ کریندے انہاں آکھیے جے ڈی وینس دے ریمارکس جئیں اچ انھاں فیلڈ مارشل عاصم منیر کوں گزریل ترائے مہینے دے دوران اپݨی ڳالھ دا ساریں توں ودھ متاثر کرݨ آلا بندہ قرارݙتے، اے پاکستان دی قیادت تے سفارت کاری دا اعتراف اے۔ انھاں ایں ڳالھ تے زور ݙتا جو پاکستان نے خطے اچ مکالمے تے امن دی کوششاں کوں اڳوں ودھاوݨ اچ نمایاں کردار ادا کیتے۔اسلام آباد اچ تھیوݨ آلے مذاکرات دا حوالہ ݙیندے انھاں دعویٰ کیتا جو جے ڈی وینس دی آوݨ دے بعد تے ایرانی وفد دی روانگی توں پہلے ہک انتہائی اہم 22 گھنٹے دا ویلھا ہئی جئیں دے دوران بھرپور سفارتی کوششاں کیتیاں ڳیاں۔معاونِ خصوصی دا آکھݨ ہئی جو پاکستان امن و استحکام کوں یقینی بݨاوݨ دے مقصد دے تحت کیتی ونڄݨ آلی ہر کوشش دی حمایت کیتے پرعزم اے تے ملک دی قیادت ہمیشہ مذاکرات دے ذریعے اختلافات کوں ختم کرݨ کیتے کم کیتے۔ انھاں سوئٹزرلینڈ اچ طے پاوݨ آلی اڄوکی مفاہمت دا وی حوالہ ݙتا تے آکھیا جو امریکا تے ایران وچال ݙھاکیں تے محیط اختلافات دے باوجود پاکستان حکمت تے تدبر دے نال ڳالھ کوں اڳوں ودھاوݨ اچ مدد کیتی۔ انھاں ایں امید دا اظہار کیتا جو طے شدہ نکات تے پیش رفت جاری رہسی تے امن دا عمل کامیابی نال اڳوں ودھسی۔
