چیئرمین سینیٹ سید یوسف رضا گیلانی دی گلگت بلتستان اسمبلی دی نویں پارلیمانی قیادت کوں مبارخ

اسلام آباد۔22 جون (اے پی پی) چیئرمین سینیٹ سینیٹر سید یوسف رضا گیلانی گلگت بلتستان اسمبلی اچ نویں پارلیمانی قیادت دے انتخاب تے نویں منتخب سپیکر عمران ندیم تے ڈپٹی سپیکر ملک کفایت الرحمٰن کوں دلوں مبارخ ݙتی اے۔چیئرمین سینیٹ اپݨے تہنیتی پیغام اچ آکھیا جو عمران ندیم دا سپیکر تے ملک کفایت الرحمٰن دا ڈپٹی سپیکر گلگت بلتستان اسمبلی منتخب تھیوݨ جمہوری روایات، پارلیمانی اقدار تے عوامی اعتماد دے استحکام دا مظہر اے۔ انھاں آکھیا جو نویں منتخب قیادت تے ارکان اسمبلی دے اعتماد دا اظہار انھاں دی صلاحیتاں، قائدانہ کردار تے عوامی خدمت دے عزم دی واضح عکاسی کریندے۔سید یوسف رضا گیلانی آکھیا جو گلگت بلتستان اسمبلی خطے دے عوام دی امنگاں دی ترجمانی، مؤثر قانون سازی تے علاقائی ترقی دے ودھارے اچ اہم کردار ادا کریندی پئی اے۔ انھاں امید ظاہر کیتی جو نویں پارلیمانی قیادت آئینی بالادستی، جمہوری روایات دے ودھارے تے مؤثر قانون سازی دے عمل کوں مزید تکڑا بݨاوݨ اچ نمایاں کردار ادا کریسی۔چیئرمین سینیٹ آکھیا جو مضبوط پارلیمانی ادارے قومی یکجہتی، وفاقی ہم آہنگی تے جمہوری استحکام دی بنیاد ہوندن ڄݙاں جو سینیٹ تے گلگت بلتستان اسمبلی دے وچال رابطے تے تعاون دے ودھارے نال پارلیمانی نظام مزید مستحکم تھیسی۔انھاں ایں امید دا اظہار کیتا جو نویں منتخب سپیکر تے ڈپٹی سپیکر دی قیادت گلگت بلتستان دے عوام کیتے ترقی، خوشحالی تے بہتر طرزِ حکمرانی دے نویں موقع پیدا کریسی۔ چیئرمین سینیٹ سید یوسف رضا گیلانی نو منتخب قیادت کیتے نیک تمناؤں دا اظہار کریندے انھاں دی کامیابی تے خطے دی ترقی کیتے دعا وی کیتی۔