وزارتِ قومی صحت اچ انٹیگریٹڈ ٹاسک مینجمنٹ سسٹم دا آغاز

اسلام آباد۔23 جون (اے پی پی) وفاقی وزیرِ صحت مصطفیٰ کمال دی ہدایت تے وزارتِ قومی صحت تے ایں دے ماتحت اداریں اچ مؤثر ای گورننس دے ودھارے کیتے انٹیگریٹڈ ٹاسک مینجمنٹ سسٹم دا باقاعدہ آغاز کر ݙتا ڳئے۔ ایں سلسلے اچ وفاقی وزیرِ صحت مصطفیٰ کمال دی زیرِ صدارت وزارتِ صحت دے ماتحت اداریں دے سربراہان دا اجلاس منعقد تھیا، جئیں اچ افسراں کوں نویں انٹیگریٹڈ ٹاسک مینجمنٹ سسٹم دے مختلف پہلواں تے ایں دے طریقہ کار دے بارے اچ تفصیلی بریفنگ ݙتی ڳئی۔اجلاس توں خطاب کریندے وزیرِ صحت مصطفیٰ کمال آکھیا جو جدید دور دے تقاضیں موجب ڈیجیٹل نظام دا ودھارا ناگزیر اے تے وزارتِ صحت اچ متعارف کرایا ڳیا نواں انٹرنل ٹاسک مینجمنٹ سسٹم شفافیت، کارکردگی تے مؤثر حکمرانی دے ودھارے اچ اہم کردار ادا کریسی۔ انھاں آکھیا جو ٹاسک مینجمنٹ سسٹم دے ذریعے وزارت دے سارے کم آن لائن، واضح تے قابلِ نگرانی ہوسن ڄݙاں جو ہر ٹاسک دی پیش رفت، ذمہ واری تے تکمیل دا مکمل ریکارڈ وی محفوظ رکھیا ویسی۔ انھاں موجب وزارت دے سارےاحکامات تے ہدایات کوں ہک مرکزی ڈیجیٹل پلیٹ فارم تے منتقل کر ݙتا ڳئے۔مصطفیٰ کمال ݙسائے جو ایں نظام دے تحت ہک ریئل ٹائم ڈیش بورڈ ݙتا ڳئے جئیں دے ذریعے تفویض کیتے ڳئے ٹاسکس دی پیش رفت کہیں وی ویلھے ہک ہی پلیٹ فارم تے ݙٹھی ونڄ سڳسی۔ انھاں آکھیا جو او خود وی تفویض کیتے ڳئے ٹاسکس دی براہِ راست مانیٹرنگ کریسن تاں جو مقررہ اہداف وقتی حاصل کیتے ونڄ سڳن۔ وفاقی وزیرِ صحت آکھیا جو اے اقدام وزارتِ صحت کوں مکمل طور تے ڈیجیٹل تے پیپر لیس نظام دی طرف گھن ونڄݨ اچ ہک اہم سنگِ میل ثابت تھیسی۔ انھاں واضح کیتا جو اڳوں سارے امور ٹاسک مینجمنٹ سسٹم دے تحت چلائے ویسن تے ایں ہی بنیاد تے جوابدہی، کارکردگی دے جائزے تے انعام و سزا دا تعین کیتا ویسی۔ انھاں مزید آکھیا جو نویں نظام دے نفاذ توں روایتی طریقہ کار اچ نمایاں کمی آسی تے سرکاری امور دی انجام دہی اچ رفتار تے شفافیت ودھسی۔ وزیرِ صحت افسران کوں ہدایت کیتی جو او ایں نویں نظام کوں مکمل سنجیدگی نال اپناون تے ایں دے مؤثر نفاذ کوں یقینی بݨاوݨ۔ انھاں آکھیا جو اے اقدام حکومت دے شفافیت، مؤثر حکمرانی تے جدید ڈیجیٹل نظام دے ودھارے دے وژن دے عین مطابق اے۔