حکومت آئی پی پیز نال مذاکرات دے ذریعے 3.5 ٹریلین روپے دا ٻوجھ گھٹ کیتے، وزیراعظم تے فیلڈ مارشل نویں روایات کوں جنم ݙتے، وزیرِ دفاع خواجہ آصف

اسلام آباد۔23 جون (اے پی پی) وزیرِدفاع خواج محمد آصف آکھیے جو موجودہ حکومت آئی پی پیز نال مذاکرات دے ذریعے 3.5 ٹریلین روپے دی بچت کوں یقینی بݨائے، وزیراعظم محمد شہباز شریف تے فیلڈ مارشل عاصم منیر نویں روایات کوں جنم ݙیندے پئن۔ قومی اسمبلی دے اجلاس اچ ڳالھ کریندے خواجہ محمد آصف آکھیا جو موجودہ حکومت آئی پی پیز دے نال معاہدیں تے ول مذاکرات کرتے 3500 ارب دے ٻوجھ کوں گھٹ کیتے، ماضی اچ ایں حوالے نال کوششاں ناکام تھئیاں ہن، اے معاہدے 35 سال دی مدت اچ تھئے ایں کیتے ایں دی ذمہ واری ساری سیاسی جماعتاں تے لڳدی اے، ماضی اچ حالات موجب کیپسٹی ادائیگیاں دے معاہدے کرݨے پئن۔ وزیرِ دفاع آکھیا جو آئی پی پیز دے نال مزید ڳالھ مہاڑ کیتے آوݨ آلے ݙینھاں اچ وی کوششاں جاری رہسن پر کہیں حکومت تے الزام لاوݨ اخلاقی طور تے درست کائنی، کہیں وی حکومت تے تنقید کریندے یاد رکھݨا چاہیدے جو اساں خود تاں ایں گناہ اچ ملوث نئی رہیے۔وزیرِ دفاع آکھیا جو اڄ وزیراعظم ایوان اچ داخل تھئن تے اپوزیشن کوں ملئن کیا ماضی اچ ایجھا تھیا ہئی؟ شہباز شریف بطور قائدِ ایوان نویں روایات کوں جنم ݙتے، شہباز شریف تے عاصم منیر جنھاں نویں روایات کوں جنم ݙتے ایں دی تعریف کرݨی چاہیدی اے، ماضی اچ ایں ایوان اچ جیویں رویہ اپنایا ڳیا تے جئیں زبان دا استعمال تھیندا ہئی او ساریں کوں یاد اے۔