پاکستان، افواج، عدلیہ تے اداریں دے خلاف ڳالھ کرݨ دی اجازت نی ݙتی ونڄ سڳدی، سپیکر قومی اسمبلی

اسلام آباد۔23 جون (اے پی پی) سپیکر قومی اسمبلی سردار ایاز صادق اپوزیشن لیڈر دے بیانیے کوں مسترد کریندے واضح کیتے جو ایوان اچ پاکستان دی مخالفت، افواجِ پاکستان یا عدلیہ دے خلاف کہیں قسم دی ڳالھ دی اجازت نہ ݙتی ویسی۔ایوان اچ خطاب کریندے ہوئیں سپیکر قومی اسمبلی وزیرِاعظم پاکستان دی موجودگی اچ اپوزیشن ارکان کوں مخاطب کریندے آکھیا جے پاکستان دے سلامتی دے اداریں تے ملکی مفاد دا تحفظ کرݨ کوں آئین بھنݨ آکھیا ویندے، تاں او ایجھا آئین ول ول بھنݨ کیتے تیار ہن۔ انھاں آکھیا جو تہاکوں پاکستان دی مخالفت اچ اتھاں ڳالھ نہ کرݨ ݙیساں، تہاکوں افواجِ پاکستان تے عدلیہ دے خلاف ڳالھ کرݨ دی ہرگز اجازت نی ہووݨی۔ سپیکر اپوزیشن دے ماضی دے بیانات دا حوالہ ݙیندے یاد ݙوایا جو ٻاہر کھڑے تھی تے ’’ہر گھر توں فوج بݨاوݨ‘‘ تے ’’پاکستان دی بجائے افغانستان کوں ترجیح ݙیوݨ‘‘ ایجھے بیانات دی ایں معزز ایوان اچ کوئی گنجائش کائنی۔ انھاں آکھیا جو ڄݙاں ارکان کوں مقررہ ویلھے توں ݙو گنا زیادہ وقت ݙے تے تقریراں کرݨ ݙتیاں ڳیاں، تݙاں تاں انھاں کوں اے پارلیمنٹ غیر قانونی نظر نئی آئی، پر ہݨ او پارلیمانی کمیٹیاں دے اجلاساں دا بائیکاٹ کریندے پئن۔ اپوزیشن دی موجودہ حکمتِ عملی کوں آڑے ہتھ گھندے ہوئیں سپیکر دا آکھݨ ہئی جو اپوزیشن ایں وقت مکمل طور تے ’’سٹیٹ آف کنفیوژن‘‘دا شکار اے تے انھاں کوں خود نی پتہ جو او کیا چاہندن۔انھاں ایں عزم دا اعادہ کیتا جو جتھاں پاکستان دی سالمیت تے مفاد دی ڳالھ آسی، پورا ملک تے ایوان متحد تے کٹھا کھڑا نظر آسی۔