آزاد کشمیر توں پاکستان دے خلاف اُٹھݨ آلی ٻاہرلی تے منفی ایجنڈے توں متاثر آوازاں دا سختی نال جواب ݙتا ونڄݨا چاہیدے، وزیرِدفاع خواجہ آصف

اسلام آباد۔23 جون (اے پی پی) وزیرِ دفاع خواجہ محمد آصف ٻاہرلے ایجنڈے تے کاربند شرپسند عناصر دے خلاف ݙوٹوک موقف اختیار کریندے آکھیے جو آزاد کشمیر توں پاکستان دے خلاف اُٹھݨ آلی ٻاہرلی تے منفی ایجنڈے توں متاثر آوازاں دا سختی نال جواب ݙتا ونڄݨا چاہیدے، مقبوضہ کشمیر دے عوام تے مہاجرین دیاں قربانیاں کوں گھٹ سمجھݨا کشمیر دے مقصد دی نفی دے برابر اے۔ سوشل میڈیا ایکس (ٹویٹر) تے اپݨے بیان اچ انھاں آکھیا جو میݙے آزاد جموں و کشمیر دے بحران متعلق ریمارکس صاف گوئی تے دیانتدارانہ ہن، جنھاں لوکاں دے خفیہ تے منفی ایجنڈے ہن او میݙے بیان کوں بھن تروڑ تے پیش کرݨ دی کوشش کریندے پئن۔ انھاں آکھیا جو اے لوک میں توں کشمیر کوں، پاکستان توں کشمیر کوں یا پاکستان کوں کشمیر توں انڄ نئی کرسڳدے، انھاں کشمیریاں دیاں قربانیاں جنھاں اکتوبر 1947 اچ ہجرت کرتے پاکستان دا رخ کیتا، تاریخ اچ درج ہن۔وزیرِ دفاع آکھیا جو مقبوضہ کشمیر اچ بھارتی قبضے دے خلاف کشمیریاں دی جدوجہد گزریل 78 سال توں قربانیاں، شہادتاں تے جیلاں اچ قید رہݨ دی ہک طویل داستان اے، پاکستان دا کشمیر دے مقصد نال وابستگی دا ثبوت اساݙے شہیداں دے خون اچ موجود اے جیڑھا 5 جنگاں اچ وہایا ڳیا، پاکستان دا کشمیر دے مقصد نال وابستگی دا ثبوت اقوامِ متحدہ دی قرارداداں موجب حقِ خودارادیت تے ریفرنڈم دے اصولی موقف تے مبنی اے۔خواجہ آصف آکھیا جو آزاد کشمیر توں پاکستان دے خلاف اٹھݨ آلی ٻاہرلی تے منفی ایجنڈے توں متاثر آوازاں دا سختی نال جواب ݙتا ونڄݨا چاہیدے، کجھ کشمیری او ہن جنھاں ہجرت دیاں قربانیاں ݙتیاں تے کجھ او ہن جیڑھے اجڄ وی مقبوضہ کشمیر اچ ایں دی قیمت ادا کریندے پئن، پاکستان دے سپاہیاں دی حفاظت اچ ݙھاکیں توں امن اچ رہݨ آلے آزاد کشمیر دے لوکاں کوں مقبوضہ کشمیر دے عوام تے مہاجرین دیاں قربانیاں کوں تسلیم کرݨا چاہیدے۔ انھاں آکھیا جو مقبوضہ کشمیر دے عوام تے مہاجرین دیاں قربانیاں کوں گھٹ سمجھݨا کشمیر دے مقصد دی نفی دے برابر اے، ’’کشمیریت‘‘ دی تعریف پیدائشی سرٹیفکیٹس توں نئی ہوندی بلکہ او جدوجہد تے قربانیاں ہن جیڑھیاں تقریباً 8 ݙھاکیں توں پاکستانیاں سودھے سارے لوکاں ݙتن۔