صدرِمملکت آصف علی زرداری دا تریمت سفارتکاراں دے عالمی ݙینھ دے موقع تے پیغام

اسلام آباد۔24 جون (اے پی پی) صدرِ مملکت آصف علی زرداری آکھیے جو تریمت سفارتکاراں دے عالمی ݙینھ دے موقع تے اساں انھاں تریمتاں کوں خراجِ تحسین پیش کریندوں جنھاں اقوام دے وچال مکالمے، سانجھے فہم و ادراک تے تعاون دے ودھارے اچ نمایاں خدمات انجام ݙتن، انھاں دیاں کوششاں بین الاقوامی رابطے کوں مضبوط بݨایا تے مشکل و غیر یقینی حالات اچ جھیڑیں دے پرامن حل دا رستہ ہموار کرݨ اچ اہم کردار ادا کیتا۔تریمت سفارتکاراں دے عالمی ݙینھ دے موقع تے ایوانِ صدر دے پریس ونگ توں جاری پیغام اچ صدرِ مملکت آکھیا جو پاکستان اچ تریمتاں دی سفارتکاری تے قومی زندگی اچ خدمات دی ہک چمکدی ہوئی روایت موجود اے، بیگم رعنا لیاقت علی خان قیامِ پاکستان دے ابتدائی سالاں اچ ٻاہرلے ملک پاکستان دی باوقار تے مؤثر نمائندگی کیتی، بیگم شائستہ اکرام اللہ ہک ممتاز سفارتکار تے پارلیمنٹیرین ہن جیڑھیاں اقوامِ متحدہ اچ پاکستان دے اولین نمائندیں اچ شامل رہیاں۔ انھاں انسانی حقوق دے ودھارے تے نویں آزاد تھیوݨ آلی اقوام دی آواز کوں عالمی سطح تے اجاگر کرݨ اچ نمایاں کردار ادا کیتا۔ شہید محترمہ بینظیر بھٹو عالمِ اسلام دی پہلی تریمت وزیرِاعظم ہن جنھاں پاکستان دے بین الاقوامی رابطے کوں وسعت ݙتی تے عالمی فورمز تے ملک دے مقام کوں مزید مستحکم کیتا۔صدرِ مملکت آکھیا جو ویلھا گزرݨ دے نال پاکستانی تریمتاں دفترِ خارجہ تے سفارتی خدمات دے مختلف اعلیٰ عہدیں تے فرائض انجام ݙتن جنھاں اچ سفیر، مستقل مندوب، سیکرٹری خارجہ تے مشن سربراہ جیہے اہم عہدے شامل ہن۔ انھاں ݙوطرفہ تعلقات، اقوامِ متحدہ تے ٻئے کثیرالجہتی اداریں اچ پاکستان دی مؤثر نمائندگی کیتی اے۔ صدر آصف علی زرداری آکھیا جو انھاں دی خدمات سفارتکاری دے سارے شعبیں اچ نمایاں ہن، او پاکستان دے قومی مفادات دے ودھارے دے نال نال رابطے تے مکالمے دروازے کھلے رکھݨ اچ اہم کردار ادا کریندیاں ہن خصوصاً ریاستاں دے وچال کشیدگی دے دوران ڄݙاں محتاط مذاکرات دی لوڑھ پیش آندی اے، مسلح جھیڑے، جغرافیائی سیاسی کشیدگی، موسمیاتی چیلنجز، تیز رفتار تکنیکی تبدیلیاں تے نویں سلامتی خطرات توں متاثر موجودہ دور اچ انھاں دا کردار مزید اہمیت اختیار کر ڳئے۔انھاں آکھیا جو سفارتکاری دا بنیادی مقصد امن، ترقی تے خوشحالی کیتے سازگار حالات پیدا کرݨا اے، انھاں مقصد دے حصول کیتے جامع تیاری، منظم مذاکرات، باریکیاں تے گھاٹی توجہ تے مختلف نقطہ ہائے نظر کوں سمجھݨ دی صلاحیت درکار ہوندی اے۔ تریمت سفارتکاراں انھاں سارے شعبیں اچ نمایاں خدمات انجام ݙتن تے اپݨی پیشہ ورانہ مہارت، قابلیت تے عوامی خدمت دے جذبے دے ذریعے سفارتی اداریں کوں تکڑا بݨاوݨ اچ مسلسل کردار ادا کریندیاں پئن