پاک ایران وزرائے داخلہ دی ملاقات، اہم علاقائی امور تے سکیورٹی تعاون تے اتفاق

اسلام آباد۔24 جون (اے پی پی) وفاقی وزیرِداخلہ محسن نقوی نال ایران دے وزیرِ داخلہ ڈاکٹر اسکندر مومنی اہم ملاقات کیتی جئیں اچ پاک ایران تعلقات، امن معاہدے دے بعد خطے دی تازہ ترین صورتحال تے ݙوطرفہ تعاون دے ودھارے تے تفصیلی ڳالھ مہاڑ کیتی ڳئی۔ ملاقات دے دوران ایرانی وزیرِداخلہ ڈاکٹر اسکندر مومنی ایرانی صدر تے انھاں دے وفد دا پاکستان آوݨ تے بھرپورخیر مقدم کرݨ تے پاکستانی قیادت تے عوام دا شکریہ ادا کیتا۔ ݙوہیں وزرائے داخلہ خطے اچ کشیدگی گھٹ تھیوݨ تے اطمینان دا اظہار کیتا۔وزیرِداخلہ محسن نقوی برگن سٹاک، سوئٹزرلینڈ اچ مشترکہ اعلامیہ تے ایرانی ہم منصب کوں مبارخ پیش کریندے آکھیا جو اے معاہدہ حکومتِ ایران تے انھاں دیاں مخلصانہ کوششاں دے بغیر ممکن نہ ہئی۔ انھاں واضح کیتا جو پاکستان ہمیشہ توں دنیا اچ امن و استحکام چاہندا رہیے تے مشرقِ وسطیٰ اچ دیرتئیں امن کیتے اپݨی کوششاں جاری رکھیسی۔ ایرانی وزیرِ داخلہ ایران امریکہ مذاکرات اچ پاکستان دے مخلصانہ کردار تے پاکستانی قوم دے بھرپور تعاون دی تعریف کیتی ۔ انھاں آکھیا جو او وقتی پاکستان دا تفصیلی دورہ کریسن تاں جو ݙوہیں ملکاں دی وزارتِ داخلہ وچال تعاون مزید اڳوں ودھایا ونڄ سڳے۔ملاقات اچ سکیورٹی تعاون، انسدادِ دہشت گردی، سائبر سکیورٹی، تے امیگریشن سودھے مختلف شعبیں اچ تعاون ودھاوݨ تے اتفاق کیتا ڳیا۔ محسن نقوی امید ظاہر کیتی جو ایں امن معاہدے دے خطے تے ݙو رس نتائج سامݨے آسن۔ ایں اہم بیٹھک اچ وزیرِ مملکت داخلہ طلال چوہدری، سیکرٹری داخلہ، ایڈیشنل سیکرٹری داخلہ، ڈی جی ایف آئی اے، کمانڈنٹ نیشنل پولیس اکیڈمی تے ڈی جی این سی سی آئی اے وی موجود ہن۔