اڳوں ودھݨ کیتے ماضی درست کرݨ ضروری اے، فردِ واحد دی خواہش تے کوئی جماعت نئی چل سڳدی، وزیرِ دفاع خواجہ محمد آصف

اسلام آباد۔24 جون (اے پی پی) وزیرِ دفاع خواجہ محمد آصف آکھیے جو اڳوں ودھݨ کیتے ماضی کوں درست کرݨا ضروری اے، فردِ واحد دی خواہش تے کوئی جماعت نئی چل سڳدی۔ قومی اسمبلی دے اجلاس اچ اظہارِ خیال کریندے وزیرِ دفاع آکھیا جو پی پی پی تے مسلم لیگ (ن) دے وچال ماضی اچ ہک ٻئے توں اختلاف تے محاذ آرائی دی تاریخ رہی اے، ول ݙوہیں جماعتاں احساس کیتا جو جمہوریت تے جمہوری روایات کوں اڳوں ودھاوݨ کیتے اساکوں ہک طریقہ کار اختیار کرݨا چاہیدے تے ایں ہی جذبے دے تحت میثاقِ جمہوریت تے دستخط کیتے ڳئے۔انھاں آکھیا جو میں کہیں کوں ہدایت ݙینداں یا مطالبہ کرینداں تاں ایں مطالبے توں پہلے ہتھاں دا صاف ہووݨا ضروری اے، ماضی اچ ایں ایوان اچ ڄݙاں اپوزیشن دی حکومت ہئی تاں مراد سعید میزاں دے اتے بھڄدے ہن، ایں ایوان اچ انھاں لوکاں کیا کیا نئی کیتا۔ وزیرِ دفاع آکھیا جو ماضی کوں درست کرݨا ضروری اے، ساریاں جماعتاں کوں چارٹر آف ڈیمو کریسی تے دستخط کرݨے چاہیندن تے جے کوئی کمی اے تاں او وی ایں اچ شامل کرتے ایں تے عمل کرݨا چاہیدے پر ایں دے نال نال اے نئی بھلݨا چاہیدا جو ماضی اچ کیا کیا نئی تھیا، ایں ایوان اچ ادھے گھنٹے اچ 56 قوانین منظور کیتے ڳئے، سپیکر دی کرسی کوں اسمبلی بھنݨ کیتے استعمال کیتا ڳیا، انصاف و مساوات دا مطالبہ کرݨ کیتے ماضی دیاں غلطیاں کوں درست کرݨا ضروری اے۔