حکومت اسلام آباد کوں عالمی معیار دے جدید دارالحکومت اچ بدالݨ سانڳے پرعزم اے، طلال چوہدری

اسلام آباد۔24 جون (اے پی پی) وزیرِ مملکت داخلہ طلال چوہدری آکھیے جو وفاقی حکومت اسلام آباد کوں ہک جدید، پائیدار تے عالمی معیار دے دارالحکومت اچ بدالݨ کیتے غیر معمولی اقدامات کریندی پئی اے، پاݨی ݙیوݨ، ویسٹ مینجمنٹ، ٹریفک دی روانی، سکیورٹی، ہوٹلنگ تے شہری سہولتاں متعلق پراݨے مسئلیں دے حل کیتے وݙے انفراسٹرکچر منصوبیں تے کم جاری اے جیڑھے آوݨ آلے 40 توں 50 سالاں دی ضرورتاں کوں سامݨے رکھیندے بݨائے ڳئن۔ او اسلام آباد چیمبر آف کامرس اینڈ انڈسٹری (آئی سی سی آئی) اچ منعقدہ ہک تقریب نال خطاب کریندن۔طلال چوہدری آکھیا جو وفاقی دارالحکومت ہووݨ دے باوجود اسلام آباد اچ کئی ایجھیاں بنیادی شہری سہولتاں تے ادارے موجود کائنی جیڑھے دنیا دے جدید شہراں دا حصہ ہوندن۔ انھاں آکھیا جو آبادی اچ تکھے ودھارے پاروں پاݨی، سالڈ ویسٹ مینجمنٹ، ٹریفک ریگولیشن تے اربن پلاننگ دے مسئلیں اچ ودھارا تھئے جئیں دے حل کیتے حکومت تقریباً پندرہ وݙے انفراسٹرکچر منصوبیں تے کم شروع کرݙتے ڄݙاں جو شہر دی ترقی اچ حائل 25 توں ودھ اہم رکاوٹاں ہٹاوݨ کیتے وی اقدامات کیتے ویندے پئن۔ وزیرِ مملکت ݙسایا جو سیف سٹی منصوبے تے ارباں روپے دی سرمایہ کاری کیتی ویندی پئی اے جئیں کوں مستقبل اچ ملک دے اولین سمارٹ سٹی سسٹمز اچ تبدیل کیتا ویسی۔طلال چوہدری اعلان کیتا جو اسلام آباد اچ عالمی معیار دا جدید کنونشن سینٹر تے ایکسپو سینٹر قائم کرݨ دی منصوبہ بندی کیتی ویندی پئی اے جئیں نال کاروباری برادری کوں بین الاقوامی نمائشاں تے کانفرنساں دے انعقاد کیتے جدید سہولتات مل ویسن تے باقی شہراں تے انحصار گھٹ تھیسی۔