ایران دے نال تجارت تے اقتصادی تعاون اچ پیشرفت دا انحصار تہران تے لڳیاں بین الاقوامی پابندیاں اچ نرمی نال منسلک اے، ترجمان دفترِ خارجہ

اسلام آباد۔24 جون (اے پی پی) پاکستان ایران تے امریکہ وچال جاری اعلیٰ سطحی تکنیکی مذاکرات تے امید دا اظہار کریندے آکھیے جو ایران دے نال تجارت تے اقتصادی تعاون اچ پیشرفت دا انحصار تہران تے لڳیاں بین الاقوامی پابندیاں اچ نرمی نال منسلک اے۔ ہفتہ وار پریس بریفنگ نال خطاب کریندے دفترِ خارجہ دے ترجمان طاہر حسین اندرابی آکھیا جو ایران کیتے پابندیاں اچ نرمی دا رستہ سوئٹزرلینڈ دے شہر برگن سٹاک اچ تھیوݨ آلے مذاکرات دے ذریعے پہلے ہی شروع تھی چکئے۔ انھاں ایں عمل کوں ہک مثبت پیشرفت قرار ݙیندے امید ظاہر کیتی جو مذاکرات اڳوں ودھدے تعمیری نتائج پیدا کریسن۔ ہک سوال دے جواب اچ ترجمان ݙسایا جو ایران تے امریکہ وچال تکنیکی سطح دے مذاکرات اچ عارضی وقفہ آئے پر اے ڳالھ مہاڑ آوݨ آلے ہفتے ول شروع تھیسی۔ انھاں آکھیا جو ݙوہیں فریقین وچال مذاکرات دا جاری رہݨ بذاتِ خود ہک حوصلہ افزا علامت اے تے اے ہک نہایت مثبت پیشرفت اے جو ݙوہیں فریق مذاکرات اچ مصروف ہن تے ڳالھ مہاڑ دی میز تے موجود ہن۔آبنائے ہرمز دی صورتحال تے تبصرہ کریندے ترجمان آکھیا جو سفارتی کوششاں اچ پیشرفت دے نال کشیدگی اچ کمی آوݨ دا امکان اے پر انھاں واضح کیتا جو ایں اہم آبی لنگھ  اچ معمول دی سرگرمیاں دی مکمل بحالی اچ آپریشنل تقاضیں پاروں کجھ ویلھا لڳ سڳدے۔ آبنائے ہرمز دے کنٹرول متعلق سوال تے انھاں آکھیا جو پاکستان خلیجی تعاون کونسل (جی سی سی) دے اقدامات دی حمایت کریندے تے علاقائی مسئلیں دے علاقائی حل تے یقین رکھیندے۔ انھاں خطے دے سارے ملکاں دی خودمختاری تے علاقائی سالمیت دے احترام دی اہمیت تے زور ݙتا۔ایران دے صدر مسعود پزشکیان دے اڄوکے دورہِ پاکستان دے حوالے نال ڳالھ کریندے طاہر حسین اندرابی ݙسایا جو ݙوہیں ملکاں وچال تجارت، سرمایہ کاری تے اقتصادی تعاون دے ودھارے سودھے ٻہوں سارے امور تے تفصیلی ڳالھ تھئی۔ انھاں آکھیا جو ݙوطرفہ اقتصادی منصوبیں تے تجارتی توسیع اچ پیشرفت ایران تے لڳیاں پابندیاں دے مکݨ دے نال اڳوں ودھسی۔ ترجمان آکھیا جو ایرانی صدر دے دورے دا ہک اہم نتیجہ ݙوہیں ملکاں دی طرفوں امن، استحکام تے مضبوط ݙوطرفہ تعلقات دے عزم دا اعادہ ہئی، ایرانی قیادت پاکستان تے اعتماد دا اظہار کیتے جئیں تے پاکستان انھاں دا شکر گزار اے۔ ایران کیتے 300 ارب ڈالر دے مجوزہ مالیاتی پیکج متعلق سوال دے جواب اچ طاہر حسین اندرابی آکھیا جو ایں معاملے تے سوئٹزرلینڈ اچ جاری تکنیکی سطح دے مذاکرات دے دوران غور کیتے ونڄݨ دی توقع اے۔افغانستان دے حوالے نال ترجمان آکھیا جو پاکستان افغانستان دے نال ݙوطرفہ رابطے متعلق اپݨی بیشتر ذمہ واریاں پوریاں کرݙتن تے نائب وزیرِ اعظم و وزیرِ خارجہ سینیٹر محمد اسحاق ڈار ذاتی طور تے ایں عمل دی نگرانی کیتی اے، پر بعد اچ کجھ پیش رفتاں پاکستان دی سفارتی کوششاں اچ اوکھ پیدا کیتی۔ انھاں پاکستان دے ایں موقف دا اعادہ کیتا جو افغان سرزمین پاکستان دے خلاف دہشت گردی کیتے استعمال نئی ہووݨی چاہیدی۔ انھاں آکھیا جے سفارتکاری کوں اڳوں ودھاوݨا اے تاں ایں دا نقطہِ آغاز افغانستان دی طرفوں اے واضح یقین ݙیواوݨا چاہیدے جو ایں دی سرزمین پاکستان دے خلاف دہشت گردی کیتے استعمال نہ تھیسی۔ ترجمان زور ݙتا جو افغانستان دے عوام پاکستانی عوام دے بھرا ہن تے ݙوہیں ملکاں وچال گھاٹے عوامی رابطے موجود ہن۔ ہک ٻئے سوال دے جواب اچ طاہر حسین اندرابی پاکستان تے افغانستان وچال مفاہمت دے ودھارے اچ چین دے تعمیری کردار دی تعریف کیتی ۔ انھاں آکھیا جو پاکستان علاقائی امن تے تعاون دے فروغ کیتے چین نال نیڑے تعاون جاری رکھیسی۔ ایران دے مرحوم سپریم لیڈر شہید علی خامنہ ای دی نمازِ جنازہ اچ پاکستان دی نمائندگی متعلق سوال تے ترجمان آکھیا جو حالی تئیں اے فیصلہ نی کیتا ڳیا جو پاکستان دی طرفوں ایں تقریب اچ کون شرکت کریسی۔