داتا گنج بخشؒ دے 983ویں سالانہ عرس دی تقریبات دا آغاز، پاکستان کوں دنیا اچ کلہا کرݨ آلے خود کلہے تھی ڳئن، اسحاق ڈار

لاہور۔25 جون (اے پی پی) حضرت علی بن عثمان ہجویری المعروف داتا گنج بخشؒ دے 983ویں سالانہ عرس دی تقریبات دا آغاز خمیس دے ݙینھ مزار کوں غسل دی تقریب نال تھی ڳیا۔ مہمانِ خصوصی نائب وزیرِاعظم تے وزیرِ خارجہ محمد اسحاق ڈار مزار کوں عرقِ گلاب نال غسل ݙتا تے چادر پوشی کیتی۔ غسل دی تقریب اچ صوبائی وزرا بلال یاسین، خواجہ سلمان رفیق تے معاونِ خصوصی وزیرِاعلیٰ پنجاب علی ڈار شرکت کیتی۔ تقریب اچ علما و مشائخ سودھے ملک توں آئے زائرین وی شرکت کیتی ڄݙاں جو معروف نعت خواناں بارگاہِ رسالت اچ گلہائے عقیدت دے نذرانے پیش کیتے۔تقریب دے بعد نائب وزیرِ اعظم محمد اسحاق ڈار میڈیا نال ڳالھ کریندے آکھیا جو صدرِ مملکت آصف علی زرداری، وزیرِاعظم محمد شہباز شریف، قائد مسلم لیگ (ن) محمد نواز شریف تے وزیرِاعلیٰ پنجاب مریم نواز دی طرفوں قوم کوں داتا صاحب دے عرس دی دلی مبارخ پیش کرینداں۔ داتا دربار دی توسیع دا سہرا وزیرِاعلیٰ پنجاب تے انھاں دی ٹیم دے سِر اے۔ ایں موقع تے انھاں آکھیا جو امریکہ ایران جنگ اچ پاکستان ثالثی دا کردار ادا کیتا۔ انھاں آکھیا جو 47 سال بعد ایران امریکہ مذاکرات دی میز تے ٻیٹھن ، ایران تے امریکہ دے معاملے تے اساݙا کم سہولت کاری ہئی، بطور سہولت کار اساں تشہیر نئی کرسڳدے، معاہدے تے دستخط تھئے تاں ایں کوں قومی اسمبلی دے ریکارڈ تے رکھ ݙتے۔انھاں آکھیا جو اساں میزبانی دی آفر کیتی تاں کجھ لوکاں آکھیا جو مذاکرات کہیں ݙوجھے ملک اچ رکھ ݙیوو کیوں جو پاکستان پڄݨ اچ ویہہ گھنٹے لڳدن۔اسحاق ڈار مزید آکھیا جو اساکوں ساریں کوں اسلام آباد میمورنڈم تے خوش ہووݨا چاہیدے، 18 جون کوں جی سیون دی میٹنگ اچ امریکی صدر ٹرمپ آکھیا جو معاہدے تے الیکٹرونک دستخط کر ݙیوو، ول وزیرِاعظم محمد شہباز شریف وی ایران امریکہ معاہدے تے دستخط کیتے۔ انھاں آکھیا جو پاکستان جئیں بارے آکھیا ویندا ہئی جو سفارتی طور تے کلہا  تھی ڳئے، ہݨ دنیا کوں پتہ چل ڳئے جو حقیقت اچ کلھا کون تھئے ۔ اسحاق ڈار آکھیا جو اٹھاوی فروری کوں ایران تے حملہ تھیا تاں پاکستان ایں حملے دی بھرپور مذمت کیتی ہئی۔ انھاں آکھیا جو پاکستان کوں اللہ ایٹمی قوت بݨائے ہݨ ایں کوں معاشی قوت بݨاوݨا اے،اساں امن پسند ہیسے تے اپݨا دفاع کرݨا ڄاݨدوں۔ انھاں آکھیا جو اساکوں ورثے اچ خراب معاشی صورتحال ملی جئیں کوں ٹھیک کرݨ اچ کافی حد تئیں کامیابی ملی اے۔ اسحاق ڈار آکھیا جو موجودہ بجٹ اچ تنخواہ دار طبقے سودھے تاجراں کوں ہرممکن ریلیف ݙتا ڳئے۔