آندے چووی گھنٹے ملک اچ موسم رُکھا تے تَتا رہݨ دا امکان، محکمہ موسمیات

اسلام آباد۔27 جون (اے پی پی) آندے 24 گھنٹے دے دوران ملک دے ٻہوں سارے علاقیں اچ موسم رُکھا تے تَتا ڄݙاں جو میدانی علاقیں اچ زیادہ تَتا رہݨ دا امکان اے ، کشمیر تے نیڑے پہاڑی علاقیں اچ تکھی ہوا تے کھمݨ گاجاں نال مینھ وسݨ دا امکان اے۔ محکمہِ موسمیات موجب گزریل 24 گھنٹے دے دوران ملک دے ٻہوں سارے علاقیں اچ موسم تَتا تے رُکھا ریہا۔ تاں جو اُتلے خیبر پختونخوا، کشمیر تے جنوبی بلوچستان اچ تکھی ہوا تے کھمݨ گاجاں نال مینھ وُٹھا۔ ساریں توں ودھ مینھ خیبر پختونخوا دے علاقے مالم جبہ اچ 55، سیدو شریف اچ 10، پشاور (ایئرپورٹ) اچ 01، کشمیراچ مظفرآباد (سٹی 29، ایئرپورٹ 23)، گڑھی دوپٹہ اچ 02، تے بلوچستان دے علاقے خضداراچ 03 ملی میٹر مینھ ریکارڈ کیتا ڳئے۔ہفتے کوں ریکارڈ کیتے ڳئے ودھ توں ودھ درجہ حرارت نور پور تھل تے نوکنڈی اچ 46، ڄݙاں جو سبی، جیکب آباد تے ڈی جی خان اچ 45 ڈگری سینٹی گریڈ ریکارڈ کیتا ڳئے۔محکمہِ موسمیات آکھیے جو موجودہ صورتحال پاروں موسمی گھٹ دٻاؤ شمال مغربی بلوچستان تے موجود اے، ڄݙاں جو بحیرہِ عرب توں نمی آلیاں ہوائیں وی ملک دے وسطی تے جنوبی علاقیں اچ داخل تھیندیاں پئن۔