فیصل آباد انڈسٹریل زون توں روزگار تے سرمایہ کاری دا نواں دور شروع تھیسی، دیہی عوام کوں مفت علاج ݙیوݨ ترجیح اے، قیصراحمد شیخ

فیصل آباد/چنیوٹ۔ 27 جون (اے پی پی) وفاقی وزیرسرمایہ کاری بورڈ قیصر احمد شیخ چنیوٹ دی وستی چک نمبر 134 لوݨے آلا اچ فری میڈیکل کیمپ دے دورے دے موقع تے میڈیا نال ڳالھ کریندے آکھیے حکومت ہک پاسے پاکستان کوں کاروبار دوست بݨاوݨ کیتے اصلاحات کریندی پئی اے تاں ݙوجھے پاسے عوام کوں گھر دی دلیز تے صحت تے تعلیم ݙیوݨ وی قومی ترجیحات اچ شامل اے۔ انھاں آکھیا جو معاشی ترقی تے عوامی فلاح ہک ٻئے نال جڑیاں ہویاں ہن، ایں سانڳے حکومت سرمایہ کاری تے عوامی خدمت دے منصوبیں کوں کٹھے اڳوں ودھیندی پئی اے۔انھاں ݙسایا جو فیصل آباد انڈسٹریل زون جیھے وݙے منصوبے نہ صرف سرمایہ کاری اچ ودھارے دا ذریعہ بݨسن بلکہ ہزاراں نوجواناں کیتے روزگار دے نویں دروازے وی کھولیسن۔ بورڈ آف انویسٹمنٹ ملک اچ غیر ضروری اجازت نامیں، اوکھی لائسنسنگ نظام تے انتظامی رکاوٹاں کوں مرحلہ وار ختم کریندا پئے تاں جو سرمایہ کاراں کوں سوکھ تھیوے۔وفاقی وزیر آکھیا جو چنیوٹ دے نیڑے قائم فیصل آباد انڈسٹریل زون علاقائی معیشت کیتے گیم چینجر ثابت تھیسی۔ برآمدات دے ودھارے کیتے خام مال تے ڈیوٹی اچ کمی تے ایکسپورٹرز کیتے سپر ٹیکس دے خاتمے نال کاروباری برادری کوں سہولت ݙتی ویندی پئی اے۔صحت تے تعلیم دے شعبے تے ڳالھ کریندے وفاقی وزیر آکھیا جو دیہی علاقیں دے عوام کوں معیاری طبی سہولتاں انھاں دے اپݨے علاقیں اچ ݙیوݨ انھاں دی اولین ترجیح اے۔ ہر تِرائے توں چار ہفتے بعد مختلف دیہات اچ فری میڈیکل کیمپس لاتے ویندے پئن جتھاں چنیوٹ دے ماہر ڈاکٹر غریب مریضاں دا بالکل مفت علاج کریندن۔ انھاں چنیوٹ توں رجوعہ روڈ دی تعمیر کوں خطے کیتے اہم سنگِ میل قرار ݙتا جیں نال فیصل آباد تے چنیوٹ وچاال فاصلے گھٹ تھئن تے لکھاں رہائشیاں کوں شہر تئیں رسائی ملی اے۔ انھاں مزید آکھیا جو ایں شاہراہ دے نیڑے فاسٹ نیشنل یونیورسٹی دا قیام وی ایں وژن دا حصہ اے جتھاں داخلے مکمل طور تے میرٹ دی بنیاد تے ݙتے ویندن تے میرٹ تے کوئی سمجھوتہ نی کیتا ویندا۔