کراچی اچ دہشت گرد حملے اچ شہید تھیوݨ آلے پاکستان رینجرز (سندھ) دے جواناں دی نمازِ جنازہ ادا کر ݙتی ڳئی

اسلام آباد۔28 جون (اے پی پی) کراچی اچ دہشت گرد حملے اچ شہید تھیوݨ آلے پاکستان رینجرز (سندھ) دے جواناں دی نمازِ جنازہ ادا کر ݙتی ڳئی اے، نمازِ جنازہ اچ وفاقی وزیرِداخلہ، گورنرسندھ، وزیرِ اعلیٰ سندھ، ڈی جی رینجرز، شہداء دے لواحقین تے سینئر سول و عسکری حکام وݙی تعداد اچ شرکت کیتی۔اتھاں جاری بیان موجب بھارتی پراکسی جماعت الاحرار دے بزدلانہ دہشت گرد حملے کوں ناکام بݨیندے ہوئیں رینجرز دے جواناں جامِ شہادت نوش کیتا۔ شرکاء شہداء دیاں عظیم قربانیاں کوں خراجِ عقیدت پیش کیتا تے اہلِ خانہ نال دلی ہمدردی تے تعزیت دا اظہار کیتا۔ وفاقی وزیرِ داخلہ محسن نقوی آکھیا جو دہشت گردی دا واقعہ انتہائی افسوسناک اے جئیں دا حساب ڳھدا ویسے، دہشت گردی کرݨ آلے عناصربھاویں او کتھائیں وی ہوون، سکیورٹی فورسز انھاں دا پیچھا کر تے کیفرِ کردار تئیں پڄیسے۔گورنر سندھ نہال ہاشمی آکھیا جو اساں دہشت گردی دی بھرپور مذمت کریندے ہوئیں ملک توں ایں دے خاتمے کیتے جدوجہد جاری رکھیسوں، بھارتی سپانسرڈ دہشت گردی کوں کݙہیں برداشت نئی کیتا ونڄ سڳدا تے دہشت گردی کوں منڈھوں پٹ تے دم گھنسوں ۔ وزیرِاعلیٰ سندھ مراد علی شاہ آکھیا جو دہشت گرداں دے ناپاک عزائم کوں مٹی اچ ملیندے ہوئیں رینجرز دے بہادر جواناں جامِ شہادت نوش کیتے جِنھاں کوں سلام پیش کریندوں ، ملک توں دہشت گردی دے مکمل خاتمے کیتے سکیورٹی فورسز دے نال کھڑوں۔نمازِ جنازہ دے بعد شہداء دے جسدِ خاکی انھاں دے آبائی علاقیں کوں روانہ کرݙتے ڳئے جِتھاں انھاں کوں مکمل فوجی اعزاز دے نال سپردِ خاک کیتا ویسے۔ بعد از نمازِ جنازہ وفاقی وزیرِ داخلہ محسن نقوی گورنر سندھ دے رلے ایں جاہ دا دورہ کیتا جِتھاں دہشت گردانہ حملہ تھیا ہئی۔