یکم توں 6 جولائی تئیں پنجاب دے کئی ضلعیاں اچ مینہ وسݨ دا امکان

لاہور۔29 جون (اے پی پی) پی ڈی ایم اے صوبہ بھر اچ اندھاری، بارشاں تے ژالہ باری بارے الرٹ جاری کریندیں ہوئیں یکم توں 6 جولائی تئیں پنجاب دے کئی ضلعیاں اچ بارش دی پیشنگوئی کیتی اے۔ ترجمان پی ڈی ایم اے دے مطابق یکم جولائی توں لاہور، راولپنڈی، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد، فیصل آباد، خوشاب، سرگودھا، شیخوپورہ تے نارووال اچ بارش دا امکان اے ڄݙاں جو 3 توں 6 جولائی تئیں ساہیوال، نارووال، جھنگ، ٹوبہ ٹیک سنگھ، پاکپتن، ننکانہ صاحب، اوکاڑہ، قصور، نورپور تھل، بھکر، لیہ، میانوالی، بہاولپور، ڈی جی خان، ملتان، خانیوال، لودھراں تے گردونواح اچ بارش دا امکان اے۔ ترجمان دے مطابق راولپنڈی، گوجرانوالہ، سیالکوٹ، لاہور تے فیصل آباد اچ اربن فلڈنگ دا خطرہ موجود اے۔ ڈی جی پی ڈی ایم اے عمر جاوید آکھیا جو وزیرِ اعلیٰ پنجاب مریم نواز شریف دی ہدایات تے صوبے بھر دے کمشنرز تے ڈپٹی کمشنرز کوں الرٹ جاری کر ݙتا ڳئے۔ انھاں آکھیا جو شہری آسمانی بجلی توں بچݨ کیتے محفوظ مقامات تے رہن، گرج چمک دے دوران کھلی ڄہیں دے تلے ہرگز نہ ونڄن۔ گرد و غبار تے تیز اندھاری دے پیشِ نظر وی محفوظ مقامات تے رہن۔ ڈی جی عمر جاوید آکھیا جو کسان آپݨے سارے پیشگی اقدامات موسمی صورتحال کوں ݙیکھدیں ہوئیں کرن۔ سیاح شمالی علاقہ جات دے سفر اچ احتیاطی تدابیر اختیار کرن۔ ایمرجنسی صورتحال اچ پی ڈی ایم اے دی ہیلپ لائن 1129 تے رابطہ کرن۔