سندھ طاس معاہدے دے تحت بھارت یکطرفہ طور تے پاݨی دا رخ نئی موڑ سڳدا، مصدق ملک

اسلام آباد۔30 جون (اے پی پی) وفاقی وزیرِ برائے موسمیاتی تبدیلی تے ماحولیاتی ہم آہنگی ڈاکٹر مصدق ملک آکھیا اے جو بین الاقوامی ثالثی عدالت قرار ݙے چکی اے جو بھارت پاکستان دے حصے دے پاݨیاں تے آبی ذخائر نئی بݨا سڳدا، جے سندھ طاس معاہدہ ناکام تھیا تاں ایں دے اثرات صرف پاکستان تئیں محدود نہ رہسن بلکہ دنیا دے ہر ایں ملک کوں خطرہ لاحق تھی ویسے جیڑھا بالائی تے زیریں دریائی نظام تے انحصار کریندے، بھارت اساݙے پاݨی دے وہاو اچ رکاوٹ پیدا کرݨ دے نال نال آلودگی پیدا کرݨ آلا دنیا دا تریجھا وݙا ملک وی اے، سندھ طاس معاہدے دے تحت بھارت یکطرفہ طور تے پاݨی دا رخ نئی موڑ سڳدا۔ اے ڳالھیں انھاں منگل کوں اسلام آباد اچ سندھ طاس معاہدے دے موضوع تے منعقدہ بین الاقوامی سیمینار نال خطاب کریندیں ہوئیں کیتا۔ انھاں آکھیا جو سندھ طاس معاہدہ دنیا دے مضبوط ترین معاہدیاں اچوں ہک اے، مسئلہ پاݨی دی عدم دستیابی یا وہاو دا نئی، کنٹرول دا اے، پاکستان تباہ کن سیلاباں دا سامݨا کیتے، اے ماحولیاتی مسئلہ نئی، انصاف دا معاملہ اے، پاکستان اچ وݙے طبقے دا ذریعہِ معاش زراعت اے جیڑھا پاݨی نال وابستہ اے۔ وفاقی وزیر آکھیا جو پاݨی دی قلت دے باعث پاکستان اچ کسان زراعت چھوڑݨ تے مجبور تھیندے پئن جݙاں جو ایں دے اثرات صرف پاکستان تئیں محدود نئی بلکہ بنگلہ دیش سمیت ٻئے نشیبی ملک وی ایں توں متاثر تھیندے پئن۔ دریائے نیل ہووے، دریائے فرات یا دریائے سندھ، دنیا دے مختلف خطیاں اچ پاݨی توں متعلق چیلنجز ہک سویں ہن، ایں کیتے اے مسئلہ صرف ہک ملک دا نئی بلکہ عالمی اہمیت دا حامل اے۔ انھاں آکھیا جو مرالہ ہیڈ ورکس تے کݙاہیں بھارت ولوں ٻہوں ڳھٹ پاݨی چھوڑیا ویندے اتے کݙاہیں اچانک سیلابی ریلہ آ ویندے جئیں توں واضح تھیندے جو اصل مسئلہ موسمیاتی تبدیلی نئی بلکہ پاݨی دے وہاو تے کنٹرول اے، پاݨی کوں بطورِ ہتھیار استعمال کرݨا خطے دے امن تے استحکام کیتے خطرناک رجحان اے۔ ڈاکٹر مصدق ملک آکھیا جو بھارت نہ صرف پاکستان دے حصے دے پاݨی دے وہاو کوں متاثر کرݨ دی کوشش کریندا پئے بلکہ او دنیا اچ آلودگی کھنڈاوݨ آلے وݙے ممالک اچ وی شامل اے۔ انھاں آکھیا جو بھارتی اقدامات دے باعث پاکستان اچ چھی ہزار افراد جان دی بازی ہار ڳئن اتے ہزاراں زخمی تھین جݙاں جو اتنی وݙی انسانی قیمت کئی جنگاں اچ وی ݙیکھݨ اچ نئی آندی۔ وفاقی وزیر آکھیا جو سندھ طاس معاہدہ دنیا دے مضبوط ترین بین الاقوامی معاہدیاں اچ شمار تھیندے اتے اے پاکستان تے بھارت دے وچال 3 جنگاں دے باوجود برقرار رہیا۔ انھاں آکھیا جو جے اتنا مضبوط معاہدہ وی برقرار نہ رہ سڳیا تاں ول دنیا دا کوئی وی بین الاقوامی معاہدہ محفوظ نہ رہسی تے کہیں ہک ملک کوں علاقائی تے عالمی امن کوں یرغمال بݨاوݨ دی اجازت نئی ݙتی ونڄ سڳدی۔ ڈاکٹر مصدق ملک آکھیا جو جے سندھ طاس معاہدہ ناکام تھیا تاں ایں دے اثرات صرف پاکستان تئیں محدود نہ رہسن بلکہ دنیا دے ہر ایں ملک کوں خطرہ لاحق تھی ویسے جیڑھا بالائی تے زیریں دریائی نظام تے انحصار کریندے۔ انھاں آکھیا جو اے صرف پاکستان دا مسئلہ نئی بلکہ عالمی آبی تحفظ، بین الاقوامی قانون تے عالمی امن دا معاملہ اے۔