بھارت سندھ طاس معاہدہ کوں غیر قانونی طور تے معطل کر تے بین الاقوامی قانونی نظام کوں کمزور تے خطے کوں تنازعے دے خطرے اچ پا ݙتے، نائب وزیرِ اعظم اسحاق ڈار دا بین الاقوامی سیمینار توں خطاب

اسلام آباد۔30 جون (اے پی پی) نائب وزیرِ اعظم تے وزیرِ خارجہ سینیٹر محمد اسحاق ڈار آکھیا جو بھارت سندھ طاس معاہدہ کوں غیر قانونی طور تے معطل کر تے نہ صرف بین الاقوامی قانونی نظام کوں کمزور کیتے بلکہ خطے کوں تنازعے دے خطرے توں وی دوچار کر ݙتے۔ اے ڳالھیں انھاں منگل کوں اتھاں انسٹیٹیوٹ آف ریجنل سٹڈیز ولوں وزارتِ اطلاعات و نشریات دے اشتراک نال منعقدہ بین الاقوامی سیمینار ’’سندھ طاس معاہدہ: امن تے علاقائی استحکام دا ہک ذریعہ‘‘ دی اختتامی نشست نال خطاب کریندیں ہوئیں کیتا۔ انھاں آکھیا جو ٹرانس باؤنڈری دریا ملکاں وچال فاصلے ودھاوݨ دی بجائے انھاں کوں ہک ٻئے دے قریب گھن آوݨ دا ذریعہ سمجھیا ونڄݨا چاہیدے، پاکستان ایں جذبے دے تحت بھارت دے نال سندھ طاس معاہدہ کیتا حالانکہ ایں کیتے پاکستان کوں نمایاں رعایتاں ݙیوݨی پیاں۔ انھاں آکھیا جو اسلام آباد دا خیال ہئی جو اے معاہدہ خطے دے اہم ترین مشترکہ وسائل اچوں ہک دے استعمال دے حوالے نال طویل المدتی پیش بینی تے استحکام فراہم کریسی۔ انھاں بھارت ولوں معاہدے کوں معطل رکھݨ دے اعلان تے معاہدے دے مطابق مشترکہ آبی وسائل تے پاکستان دے نال تعاون توں انکار تے شدید تشویش دا اظہار کیتا۔ انھاں آکھیا جو معاہدیاں دا تقدس انھاں بنیادی اصولاں اچ شامل اے جنھاں تے قوماں دے وچال پرامن تعلقات استوار تھیندن۔ انھاں عالمی برادری تے زور ݙتا جو او پاݨی کوں بطورِ ہتھیار استعمال کرݨ دی اجازت نہ ݙیوے۔ سیمینار دی افتتاحی نشست نال خطاب کریندیں ہوئیں وفاقی وزیرِ اطلاعات تے نشریات عطاء اللہ تارڑ آکھیا جو سندھ طاس معاہدے دے حوالے نال بھارت دی بے اعتنائی نہ صرف بین الاقوامی قانونی نظام دے تقدس کوں کمزور کریندی پئی اے بلکہ عالمی امن تے نظم و ضبط کیتے وی نقصان دہ اے۔ وفاقی وزیر آکھیا جو دریائے سندھ پاکستان دی تہذیب دی بنیاد اے تے ایں دی شناخت دا حصہ اے۔ انھاں آکھیا جو پاکستانیاں کوں دریائے سندھ دے پاݨیاں تے ناقابلِ تنسیخ حق حاصل اے۔ انھاں آکھیا جو بھارت ولوں معاہدے کوں غیر قانونی طور تے معطل کرݨ دی ناکام کوشش بھارت کیتے بین الاقوامی سطح تے سبکی دا باعث بݨی اے، ایں اقدام دی اخلاقی, سماجی تے قانونی بنیاداں انتہائی کمزور ہن۔ انھاں عالمی برادری تے زور ݙتا جو او خاص طور تے عالمی موسمیاتی بحران دے تناظر اچ معاہدے دی حیثیت تبدیل کرݨ دی بھارتی غیر قانونی کوشیشاں دا نوٹس گھنے۔ پاکستان پیپلز پارٹی دے چیئرمین تے سابق وزیرِ خارجہ بلاول بھٹو زرداری آکھیا جو جے آبنائے ہرمز دی بندش دے نال امن دا تصور ممکن نئی تاں دنیا اے کیویں توقع کر سڳدی اے جو سندھ طاس معاہدے دی معطلی دے باوجود خطے اچ امن تے استحکام برقرار رہسی۔ انھاں آکھیا جو بھارت پاکستان دی شہ رڳ کوں نشانہ بݨا تے پاݨی کوں بطورِ ہتھیار استعمال کیتے۔ انھاں مطالبہ کیتا جو سندھ طاس معاہدے دی خلاف ورزی اچ بھارت دے ہر اقدام کوں پاکستان دے خلاف جنگی اقدام تصور کیتا ونڄے۔ ایں موقع تے وفاقی وزیر برائے موسمیاتی تبدیلی و ماحولیاتی رابطہ ڈاکٹر مصدق مسعود ملک آکھیا جو سندھ طاس معاہدے دے خلاف بھارت دے غیر قانونی اقدامات پاکستان اچ موسمیاتی بحران کوں مزید سنگین بݨیندے پئن۔ انھاں آکھیا جو اے نہ صرف موسمیاتی بحران اے تے نہ ہی صرف پاݨی دا بحران، بلکہ اے انصاف دا بحران اے۔ سابق وزیرِ دفاع انجینئر خرم دستگیر خان معاہدے دی معطلی دے بعد بھارت ولوں کیتے ڳئے تمام غیر قانونی اقدامات دا ذکر کیتا جنھاں اچ بگلیہار تے سلال ڈیموں دے گیٹ بند کرݨا تے سندھ طاس معاہدے دے تحت دریاواں تے آبی منصوبیاں دی تیز رفتار تکمیل شامل اے۔سابق وزیرِ مملکت خارجہ حنا ربانی کھر آکھیا جو سندھ طاس معاہدے اچ کہیں وی تبدیلی دا واضح طریقہ کار موجود اے۔ انھاں آکھیا جو عالمی غیر یقینی صورتحال دی وجہ توں بھارت ہک بین الاقوامی طور تے پابند معاہدے دے حوالے نال آپݨے غیر قانونی اقدام توں بچ نکلݨ اچ کامیاب رہیے۔