فیلڈ مارشل سید عاصم منیر دی ترک صدر رجب طیب اردوان سودھا اعلیٰ سیاسی اتے عسکری حکام نال ملاقاتاں

راولپنڈی۔14جولائی(اے پی پی)چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر نشانِ امتیاز (ملٹری)، ہلالِ جرات ترک صدر رجب طیب اردوان سودھا اعلیٰ سیاسی اتے عسکری حکام نال ملین اتے بدلدے ہوئے جغرافیائی و سیاسی حالات سانڳے ݙوہاں ملکاں وچال ودھ تزویراتی شراکت داری دا مشترکہ عزم دوہرایا۔ پاک فوج دے شعبہِ تعلقاتِ عامہ (آئی ایس پی آر) ولوں جاری بیان دے مطابق چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر نشانِ امتیاز (ملٹری)، ہلالِ جرات ایں ویلھے جمہوریہِ ترکیہ دے اعلیٰ سطح سرکاری دورے تے ہین جیںدا مقصد ݙوہاں ملکاں وچال ڳھاٹے تاریخی، تزویراتی اتے دفاعی تعلقات کوں ٻیا مستحکم کرݨ اے۔ ترکیہ پڄݨ تے فیلڈ مارشل سید عاصم منیر دا استقبال کیتا ڳیا جیہڑا پاکستان اتے ترکیہ وچال تاریخی اتے برادرانہ تعلقات دی عکاسی کریندے۔ دورے اچ فیلڈ مارشل ترکیہ دی سیاسی اتے عسکری قیادت نال اعلیٰ سطح ملاقاتاں کیتن۔ انھاں ترک صدر رجب طیب اردوان اتے وزیرِ قومی دفاع یاسر گولر نال ملاقات کیتی جیںدے اچ باہمی دلچسپی دے امور، علاقائی سلامتی اتے دفاعی تعاون تے ڳالھ تھئی۔ اِنھاں اعلیٰ سطح ملاقاتاں اچ بدلدے ہوئے جغرافیائی و سیاسی حالات سانڳے ݙوہاں ملکاں وچال ودھ شراکت داری دے مشترکہ عزم دا اعادہ کیتا ڳیا۔ ترک جنرل سٹاف ہیڈکوارٹرز اچ فیلڈ مارشل دا گارڈ آف آنر نال استقبال کیتا ڳیا۔ بعد اچ انھاں ترک جنرل سٹاف دے سربراہ جنرل سلچوک بایراکتاراوغلو نال تفصیلی ملاقات کیتی۔ ایں موقعے تے علاقائی سلامتی دی صورتحال، پیشہ ورانہ عسکری امور اتے باہمی دلچسپی دے ٻئے موضوعات تے ڳالھ کیتی ڳئی۔ ایں موقعے تے جنرل سلچوک بایراکتاراوغلو فیلڈ مارشل سید عاصم منیر کوں پاک-ترک عسکری تعاون دے ودھارے اچ نمایاں خدمات تے انھاں دے غیر معمولی کردار دے اعتراف اچ ترک مسلح افواج دا امتیازی خدمات دا تمغہ وی عطا کیتا۔ فیلڈ مارشل سید عاصم منیر ترک بری افواج دے ہیڈکوارٹرز دا وی دورہ کیتا جتھاں ترک بری افواج دے کمانڈر جنرل متین توکیل انھاں دا استقبال کیتا۔ فیلڈ مارشل انیت کبیر وی ڳئے اتے جدید ترکیہ دے بانی مصطفیٰ کمال اتاترک دے مزار تے حاضری ݙتی، پھلاں دی چادر چڑھائی اتے انھاں کوں خراجِ عقیدت پیش کیتا۔ ایں موقعے تے انھاں اتاترک دی بصیرت افروز قیادت کوں سراہندے پاکستان اتے ترکیہ وچال ڳھاٹے تاریخی روابط دا وی اعادہ کیتا۔ فیلڈ مارشل دا اے دورہ ݙوہاں ملکاں دے ایں عزم کوں وی ݙسیندے جو او آپݨے کثیرالجہتی دفاعی تعلقات کوں ٻیا ودھیسن اتے خطے اچ امن، استحکام اتے مشترکہ سلامتی کیتے آپݨیاں مشترکہ کوششاں جاری رکھسن۔