حکومت پاکستان میرین اکیڈمی کوں ڈگری ݙیوݨ آلے ادارے اچ اپ گریڈ کرݨ بارے سمری وزیرِاعظم کوں بھیڄ ݙتی اے، محمد جنید انوار چوہدری

اسلام آباد۔15جولائی (اے پی پی) وفاقی وزیر بحری امور محمد جنید انور چوہدری آکھیے جو حکومت پاکستان میرین اکیڈمی کوں ڈگری ݙیوݨ آلے ادارے اچ اپ گریڈ کرݨ دے پاسے ھک ٻیان اہم قدم چیندے وزیرِاعظم کوں اصولی منظوری کیتے سمری بھیڄ ݙتی اے۔ وزارت ولوں جاری پریس ریلیز موجب ہک بیان اچ جنید انور چوہدری آکھیا جو سارے متعلقہ فریقاں دے نال مشاورت مکمل تھی چکی اے تے ضروری ضابطہ جاتی کارروائیاں وی پوریاں کرڳھدیاں ڳئن۔انھاں آکھیا جو وزیرِاعظم ولوں اصولی منظوری ملݨ دے بعد ایں سمری کوں قانونی جانچ پڑتال کیتے وزارتِ قانون بھیڄا ویسی تے ایں دے بعد ایں کوں حتمی منظوری کیتے وفاقی کابینہ دے سامݨے پیش کیتا ویسی۔ جنید انور چوہدری آکھیا جو مجوزہ اپ گریڈیشن بحری شعبے کوں جدید خطوط تے استوار کرݨ تے بحری تعلیم کوں بین الاقوامی معیار موجب گھن آوݨ دے حکومتی ایجنڈے دا حصہ اے۔ وفاقی وزیر ݙسایا جو ممتاز بین الاقوامی بحری اداریں دے نال ’ڈوئل ڈگری پروگرامز  متعارف کراوݨ دے حوالے نال ڳالھ مہاڑ جاری اے جنھاں دا مقصد پاکستانی کیڈٹس کوں عالمی سطح تے تسلیم شدہ تعلیمی سنداں ݙیوݨ اے۔انھاں آکھیا جو ایں اقدام دا مقصد تعلیمی معیار کوں بہتر بݨاوݨ، بین الاقوامی تعاون کوں تکڑا کرݨ، کیڈٹس کوں عالمی سطح تے تسلیم شدہ سنداں نال آراستہ کرݨ تے بحری شعبے اچ کیریئر دے موقع بہتر بݨاوݨ اے۔ انھاں آکھیا جو پاکستان میرین اکیڈمی کوں ڈگری ݙیوݨ دا درجہ ملݨ نال سمندری تعلیم دے معیار اچ نمایاں چنڳائی تھیسی، تعلیمی تے پیشہ ورانہ تربیت مستحکم تھیسی تے ایجھے اعلیٰ تعلیم یافتہ جہاز ران تے سمندری امور دے ماہرین تیار تھیسن جیڑھے قومی و عالمی میری ٹائم انڈسٹری دی بدلدی لوڑھاں کوں پورا کرݨ دی صلاحیت رکھیندے ہوسن۔وفاقی وزیر آکھیا جو ایں اقدام توں پاکستانی طلبہ کیتے تعلیم تے کیریئر دے موقع ودھسن تے نال ہی شپنگ، بندرگاہواں تے لاجسٹکس دے شعبیں کیتے ہنر مند افرادی قوت تیار کر تے ملک دی بلیو اکانومی (سمندری معیشت) دے طویل مدتی اہداف دی تکمیل اچ وی مدد ملسی۔ ایں مجوزہ تبدیلی کوں ہک تاریخی اصلاحات قرار ݙیندیں انھاں آکھیا جو ایں نال سمندری تعلیم دا نظام تکڑا تھیسی تے عالمی سطح تے مسابقتی سمندری افرادی قوت دی تشکیل اچ مدد ملسی۔ انھاں ملک دے سمندری شعبے دی پائیدار ترقی کوں یقینی بݨاوݨ کیتے انسانی وسائل دے ودھارے اچ سرمایہ کاری کرݨ دے حکومتی عزم دا اعادہ کیتا۔