صوفیا کرام دی تعلیمات رواداری، مکالمے تے سماجی ہم آہنگی دے ودھارے اچ کلیدی کردار ادا کریندن، چیئرمین سینیٹ یوسف رضا گیلانی

اسلام آباد۔15جولائی (اے پی پی) چیئرمین سینیٹ سید یوسف رضا گیلانی پاکستان دے عظیم صوفیانہ ورثے دی اہمیت تے زور ݙیندیں آکھیے جو صوفیا کرام دی تعلیمات رواداری، مکالمے تے سماجی ہم آہنگی دے ودھارے اچ کلیدی کردار ادا کریندن تے عصرِ حاضر اچ ودھدی تقسیم، عدم برداشت تے انتہاپسندی جیویں چیلنجز نال نبڑݨ کیتے قیمتی رہنمائی ݙیندن۔اِنھاں اے ڳالھ پاکستان نیشنل کونسل آف آرٹس (پی این سی اے) اچ فنکاراں رومی تے ایمن دی آرٹ نمائش “تصوف تے ثقافت” دی افتتاحی تقریب توں خطاب کریندیں آکھی۔ چیئرمین سینیٹ نمائش دے انعقاد تے پی این سی اے کوں مبارخ ݙتی تے فنکاراں دی ایجھے موضوع دے انتخاب تے تعریف کیتی جیڑھا پاکستان دی روحانی تے ثقافتی روایات دی عکاسی کریندے۔انھاں آکھیا جو پاکستان مسلم دنیا دی کجھ نمایاں ترین صوفیانہ روایات دا امین اے جنھاں اساݙی شاعری، موسیقی، فنِ تعمیر، زباناں تے لوک ثقافت تے گھاٹے اثرات پاتن۔ انھاں آکھیا جو تصوف دا پیغام احترام، محبت، ہمدردی تے بقائے باہمی تے مبنی اے جنھاں دی اڄ دی دنیا اچ پہلے توں کتھائیں ودھ لوڑھ اے ۔سید یوسف رضا گیلانی آکھیا جو صوفیائے کرام دی تعلیمات اساکوں اے سبق ݙیندن جو احترام نفرت توں زیادہ طاقتور، مکالمہ تصادم توں زیادہ دیرتئیں تے بقائے باہمی تفریق توں زیادہ سودمند اے۔ انھاں زور ݙتا جو ایہے آفاقی اصول پرامن، جامع تے تکڑے معاشریں دی بنیاد ݙیندن۔چیئرمین سینیٹ فنکاراں رومی تے ایمن دیاں تخلیقی کوششاں دی وی تعریف کریندے آکھیے انھاں دا فن ایں امر کوں ݙکھیندے جو پاکستان دا ثقافتی ورثہ اڄ وی عصری اظہارِ فن کوں متاثر کریندا پئے تے نویں نسل کوں آپݨی روحانی تے ثقافتی اقدار نال جوڑݨ اچ معاون ثابت تھیندا پئے۔ انھاں نمائش دے کامیاب انعقاد اچ کردار ادا کرݨ آلے پی این سی اے تے ٻئے متعلقہ لوکاں دی کوششاں کوں وی خراجِ تحسین پیش کیتا۔ نمائش اچ فنکاراں، ثقافتی شخصیات، سفارتکاراں، فنونِ لطیفے نال جڑئے لوکاں تے زندگی دے مختلف شعبیں توں تعلق رکھݨ آلیاں ممتاز شخصیات شرکت کیتی۔