پاکستان اچ بین الاقوامی بزنس ایونٹ اچ چین دی 160 کمپنیاں دی شرکت متوقع اے، وفاقی وزیرِ صحت مصطفیٰ کمال

اسلام آباد۔15جولائی (اے پی پی) وفاقی وزیرِ صحت مصطفیٰ کمال آکھیے جو پاکستان اچ صحت دے شعبے متعلق ہک اہم بین الاقوامی بزنس ایونٹ منعقد تھیوݨ ویندا پئے جیں اچ چین دی تقریباً 160 کمپنیاں دی شرکت متوقع اے۔ انھاں ݙسایا جو ایں موقع تے تقریباً 500 پاکستانی تے چینی کمپنیاں وچال بزنس ٹو بزنس (بی ٹو بی) کانفرنس منعقد تھیسی جیں دا محور صحت دا شعبہ ہوسی۔اے ڳالھ انہاں پریس کانفرنس کریندے ݙسائی ۔ وفاقی وزیر آکھیا جو کانفرنس اچ صحت دے شعبے دی چھی اہم کیٹیگریز تے توجہ ݙتی ویسی جنھاں اچ بائیوٹیکنالوجی، ویکسینز، کلینیکل ٹرائلز، ہربل میڈیسن سودھا ٻئے متعلقہ شعبے شامل ہن۔ انھاں آکھیا جو پاکستان ایں ویلھے فارماسیوٹیکل صنعت کیتے تقریباً 90 فیصد خام مال ٻاہرلے ملک توں درآمد کریندے تاں جو ایں کانفرنس دے ذریعے مقامی پیداوار، سرمایہ کاری، ٹیکنالوجی دی منتقلی تے مشترکہ منصوبیں دے نویں موقع پیدا تھیسن۔مصطفیٰ کمال ݙسایا جو گزریل ہک مہینے توں پاکستانی تے چینی کمپنیاں سانجھے رابطے اچ ہن تے ٻہوں ساریاں کاروباری ملاقاتاں پہلے ہی تھی چکیاں ہن۔ انھاں آکھیا جو کانفرنس دے دوران مختلف معاہدیں تے مفاہمتی یادداشتاں (ایم او یوز) تے دستخط وی کیتے ویسن جیڑھے ݙوہیں ملکاں وچال صحت دے شعبے اچ تعاون کوں مزید تکڑا بݨیسن۔وفاقی وزیرِ صحت آکھیا جو ایں اہم اقدام دی کامیابی اچ ہارون اختر، قیصر احمد تے چین اچ پاکستان دے سفیر نمایاں کردار ادا کیتے۔ انھاں مزید آکھیا جو اے پورا منصوبہ وزیرِاعظم دے وژن موجب اڳوں ودھایا ویندا پئے جیں دا مقصد پاکستان اچ سرمایہ کاری، مقامی صنعت دا ودھارا تے صحت دے شعبے کوں جدید خطوط تے استوار کرݨا اے۔