پاکستان تے پرتگال دا ݙوطرفہ سیاسی مشاورت دا چوتھا دور، تعاون ودھاوݨ تے اتفاق

اسلام آباد۔16جولائی(اے پی پی) پاکستان تے پرتگال وچال ݙوپاسے سیاسی مشاورت دا چوتھا دور اسلام آباد اچ منعقد تھیا۔ ترجمان دفترِ خارجہ توں جاری بیان موجب پاکستانی وفد دی قیادت وزارتِ خارجہ دی ایڈیشنل سیکرٹری (یورپ) سفیرعائشہ علی کیتی، ڄݙاں جو پرتگالی وفد دی سربراہی پرتگال دی وزارتِ خارجہ دی ڈائریکٹر جنرل برائے خارجہ پالیسی، سفیر ہیلینا مالکاٹا کیتی۔ݙوہیں فریقاں ݙوطرفہ تعلقات دے سارے پہلواں دا جائزہ ڳھدا تے سیاسی رابطے کوں مزید تکڑا بݨاوݨ دے نال تجارت و سرمایہ کاری، افرادی قوت دی نقل و حرکت، زراعت، قابلِ تجدید توانائی، انفارمیشن ٹیکنالوجی، تعلیم، سیاحت، ثقافت تے عوامی رابطے دے شعبیں اچ تعاون ودھاوݨ دے طریقیں تے ڳالھ مہاڑ کیتی ۔ ایں توں علاوہ کاروباری اداریں وچال رابطے، بندرگاہی رابطہ کاری، تے زیتون دی کاشت تے پراسیسنگ دے شعبے اچ تعاون دے موقع تے وی ڳالھ کیتی ڳئی۔ݙوہیں پاسوں علاقائی تے بین الاقوامی پیش رفت تے وی ڳالھ مہاڑ کیتی ڳئی تے کثیرالجہتی فورمز تے سانجھے تعاون تے ہم آہنگی تے اطمینان دا اظہار کیتا ڳیا۔ دورے دے دوران پرتگالی وفد سیکرٹری خارجہ نال وی ملاقات کیتی، جیں اچ ݙوطرفہ تعلقات تے سانجھی دلچسپی دے علاقائی و بین الاقوامی امور تے ڳالھ مہاڑ کیتی ڳئی۔مشاورت دا اے دور خوشگوار تے تعمیری ماحول اچ منعقد تھیا۔ ݙوہیں فریقاں باقاعدہ سیاسی مکالمے دے تسلسل تے تعاون کوں مزید وسعت ݙیوݨ دے عزم دا اعادہ کیتا۔ ایں ڳالھ تے وی اتفاق کیتا ڳیا جو ݙوطرفہ سیاسی مشاورت دا اڳلا دور سانجھے طور تے طے شدہ تاریخاں تے لزبن اچ منعقد کیتا ویسی