ریلوے پولیس دی فلاح و بہبود کوں ترجیحی بنیاداں تے حل کیتا ویسی، وفاقی وزیر ریلوے محمد حنیف عباسی

لاہور۔16جولائی (اے پی پی) وفاقی وزیرریلوے محمد حنیف عباسی آکھیے جو حکومت پاکستان ریلوے کوں میرٹ، شفافیت، جدید خطوط تے استوار کرݨ تے سکیورٹی دے نظام کوں مزید موثر بݨاوݨ کیتے پرعزم اے ڄݙاں جو پاکستان ریلوے پولیس قومی اثاثیں، ریلوے انفراسٹرکچر تے مسافراں دے تحفظ اچ کلیدی کردار ادا کریندی پئی اے۔اوپاکستان ریلوے پولیس دے ریکروٹس دی پاسنگ آؤٹ پریڈ توں خطاب کریندے پئے ہن۔ وفاقی وزیرریلوے حنیف عباسی ملک دی مسلح افواج، قانون نافذ کرݨ آلے اداریں، شہداء تے غازیاں کوں خراجِ عقیدت پیش کریندیں آکھیا جو انھاں دیاں قربانیاں پاروں ملک اچ امن و استحکام قائم اے۔ انھاں آکھیا جو پاکستان ریلوے محض ہک ٹرانسپورٹ ادارہ نئی بلکہ قومی یکجہتی تے معاشی ودھارے دی علامت اے جیڑھا روزانہ لکھاں مسافراں تے ٻہوں وݙی مقدار اچ مال برداری دیاں خدمات انجام ݙیندے پئن۔وفاقی وزیر حنیف عباسی انسپکٹر جنرل پاکستان ریلوے پولیس دی قیادت اچ فورس دی پیشہ ورانہ کارکردگی دی تعریف کریندے آکھیا جو ریلوے پولیس عوامی خدمت، مسافراں دی سہولت، ریلوے املاک دے تحفظ تے بغیر ٹکٹ سفر دی روکݨ دے حوالے نال نمایاں کامیابیاں حاصل کیتن۔ انھاں آکھیا جو اڄوکیاں بھرتیاں دا عمل مکمل طور تے میرٹ تے انجام ݙتا ڳئے تے ایں اچ کہیں قسم دی سیاسی سفارش یا دٻاؤ کوں برداشت نی کیتا ڳیا۔انھاں پاس آؤٹ تھیوݨ آلے ریکروٹس تے انھاں دے والدین کوں مبارخ ݙیندے آکھیا جو نوجوان اہلکار آپݨی پیشہ ورانہ زندگی اچ دیانت داری، نظم و ضبط، انصاف تے عوامی خدمت کوں شعار بݨاون، مسافراں نال خوش اخلاقی نال پیش آون، بلاامتیاز قانون تے عملدرآمد یقینی بݨاون تے آپݨے فرائض پوری ذمہ واری نال ادا کرن۔انھاں یقین ݙیوایا جو ریلوے پولیس دی تربیت تے فلاح و بہبود متعلق سارے جائز مسئلیں کوں ترجیحی بنیاداں تے حل کیتا ویسی کیوں جو مسافراں تے ریلوے اثاثیں دے تحفظ اچ ایں فورس دا کردار ناگزیر اے۔ انھاں دہشت گردی دے خلاف جنگ اچ جاناں دا نذرانہ پیش کرݨ آلے شہداء کوں زبردست خراجِ تحسین پیش کریندیں آکھیا جو پاکستان ریلوے پولیس سودھا سکیورٹی اداریں دے ہزاراں اہلکاراں وطن دے امن کیتے قربانیاں ݙتیاں۔