خطے اچ امن کیتے آپݨی فعال ثالثی دیاں کوششاں توں پِچھوں ہٹݨ دا تاثر درست کائنی، اسلام آباد مفاہمتی یادداشت امن، سانجھےاحترام تے مشترکہ خوشحالی دے ودھارے کیتے دیرپا تے ٻہوں موثر نمونہ اے، ترجمان دفترِ خارجہ

اسلام آباد۔16جولائی (اے پی پی) پاکستان ایں تاثر کوں مسترد کر ݙتے جو او خطے اچ امن کیتے آپݨی فعال ثالثی دیاں کوششاں توں پچھوں ہٹدا پئے تے ایں ڳالھ تے زور ݙتے جو ایران تے امریکا وچال ول ودھدی کشیدگی دے باوجود اسلام آباد مفاہمتی یادداشت (ایم او یو) امن، سانجھے احترام تے مشترکہ خوشحالی دے ودھارے کیتے ہک دیرپا تے انتہائی موثر نمونہ اے۔ ترجمان دفترِ خارجہ طاہر اندرابی اتھاں ہفتہ وار پریس بریفنگ دے دوران آکھیا جو اے حقیقت اے جو ثالثی دا عمل ایں ویلھے شدید چیلنجز دا شکار اے کیوں جو کشیدگی ودھاوݨ دی سوچ غالب اے، تاں جو اساکوں امید اے جو بالآخر امن تے مذاکرات دی لوڑھ ایں رجحان تے غالب آویسی، امن دا عمل کݙہیں ختم نئی تھیندا، بھانویں جو ایں کوں وقتی طور تے پسِ منظر اچ رکھیا ونڄ سڳدے لیکن او ہمیشہ قابلِ عمل رہندے۔ انھاں آکھیا جو جݙاں متعلقہ فریق ایں نتیجے تے پڄسن جو کشیدگی دا اے سلسلہ آپݨی حد کوں پڄ چکے تاں امن ݙے واپسی دی رہنمائی اسلام آباد مفاہمتی یادداشت اچ ݙتے ڳئے فریم ورک تے 22 جون 2026ء دے پاکستان-قطر مشترکہ اعلامیے اچ ݙتے ڳئے روڈ میپ توں حاصل کیتی ویسی۔پاکستان ولوں ودھدی کشیدگی تے گہری تشویش دا اعادہ کریندیں ترجمان آکھیا جو پاکستان خطے دے جھیڑیں دے حل کیتے مذاکرات، کشیدگی اچ کمی تے سفارتی ذرائع کوں ودھارا ݙیوݨ دی غرض نال اعلیٰ ترین سطح تے مسلسل متحرک سفارتی کوششاں جاری رکھیاں ہوئیاں ہن ۔ انھاں آبنائے ہرمز دی صورتحال دے عالمی معیشت تے توانائی دے تحفظ خصوصاً ترقی پذیر ملکاں تے منفی اثرات دا ذکر کریندیں حالات کوں وقتی معمول تے گھن آوݨ تے بین الاقوامی بحری آونڄ دی آزادانہ بحالی تے زور ݙتا۔ترجمان طاہر اندرابی میڈیا کوں پاکستان دیاں اعلیٰ سطح دی سفارتی سرگرمیاں توں وی آگاہ کیتا۔ انھاں ݙسایا جو وزیراعظم محمد شہباز شریف قطر تے اڄوکے حملیں دے بعد امیرِ قطر شیخ تمیم بن حمد آل ثانی نال ٹیلی فون تے اظہارِ یکجہتی کیتا ڄݙاں جو ایران دے صدر ڈاکٹر مسعود پزشکیان نال ڳالھ مہاڑ اچ اڄوکی امن کوششاں دے ثمرات کوں محفوظ رکھݨ کیتے تحمل نال کم گھنݨ تے زور ݙتا تے صدر مسعود پزشکیان دے اڄوکے دورہ پاکستان دے دوران تھیوݨ آلی پیش رفت تے وی ڳالھ مہاڑ کیتی۔روچڈیل گرومنگ گینگ دے سربراہ شبیر احمد دی برطانیہ توں رہائی تے ممکنہ بے دخلی متعلق سوال دے جواب اچ ترجمان ٻالاں دے جنسی استحصال دی شدید الفاظ اچ مذمت کریندیں آکھیا جو اے مکمل طور تے برطانیہ دا داخلی معاملہ اے۔ انھاں آکھیا جو متعلقہ شخص برطانوی شہری اے، برطانیہ اچ ہی رہندا ہئی تے ایں کوں برطانوی عدالت سزا سݨائی ہئی۔ ترجمان موجب ایں معاملے دی ذمہ داری ایں ہی معاشرے تے عائد تھیندی اے جتھاں او پروان چڑھیا، ایں دی تربیت تھئی تے بدقسمتی نال او گمراہ تھیا۔ انھاں واضح کیتا جو حکومتِ پاکستان دا ایں معاملے نال کہیں وی نوعیت دا کوئی تعلق کائنی، ایں شخص دی رہائی یا برطانوی قانون دے تحت ایں دے نال کیتے ونڄݨ آلے آندے کہیں وی قانونی اقدام نال پاکستان کوں کہیں صورت منسلک نئی کیتا ونڄ سڳدا۔ہک سوال دے جواب اچ ترجمان دفترِ خارجہ طاہر اندرابی بھارتی نیشنل انویسٹی گیشن ایجنسی (این آئی اے) ولوں 1996ء دے ہک مقدمے اچ سینئر حریت رہنماواں دے خلاف ہݨے ہی دائر کیتی ڳئی چارج شیٹ کوں مسترد کریندیں ایں کوں کشمیری عوام دی حقِ خودارادیت دی جدوجہد کوں بدنام کرݨ دی غرض نال تیار کیتا ڳیا سیاسی محرکات تے مبنی اقدام قرار ݙتا۔فنانشل ٹائمز ولوں بلوچستان اچ چینی کمپنیاں دی سکیورٹی متعلق رپورٹ تے ردعمل ݙیندیں ترجمان آکھیا جو پاکستان تے چین وچال ایں حوالے نال مسلسل تے فعال رابطہ موجود اے تے میزبان ملک دی حیثیت نال پاکستان آپݨے چینی مہماناں، ماہرین تے کارکناں کوں فول پروف سکیورٹی ݙیوݨ دا پابند اے۔ترجمان سعودی عرب دی خودمختاری تے علاقائی سالمیت کیتے پاکستان دے غیر متزلزل عزم دا اعادہ کریندیں آکھیا جو پاکستان ستمبر 2025ء اچ طے پاوݨ آلے سانجھے تزویراتی دفاعی معاہدے سودھا سارے ݙوطرفہ معاہدیں تے عمل درآمد کیتے مکمل طور تے تیار اے۔امریکہ دے نال تجارتی مذاکرات متعلق سوال تے ترجمان جو پاکستانی وفد دا حصہ وی ہن، ݙسایا جو واشنگٹن اچ امریکی تجارتی نمائندے تے امریکی محکمہ تجارت دے حکام دے نال تھیوݨ آلے تجارتی مذاکرات اچ نمایاں پیش رفت تھئی۔ اِنھاں مذاکرات دا مقصد پاکستانی برآمدات کوں متنوع بݨاوݨ تے انھاں اچ مزید ودھارا کرݨ اے۔افغانستان دے حوالے نال ڳالھ کریندے ترجمان آکھیا جو پاکستان طورخم سرحد دے رستے اقوامِ متحدہ دی تقریباً 45 توں 50 امدادی گاݙیاں کوں افغانستان ونڄݨ اچ سہولت ݙتی ڄݙاں جو اتھاں پھتے ہوئے پاکستانی طلبہ دی وطن واپسی وی ممکن بݨائی۔ تاں جو انھاں واضح کیتا جو پاکستان تے افغان عبوری حکومت وچال تعلقات اچ حقیقی پیش رفت ایں ویلھے تئیں ممکن کائنی ڄݙاں تئیں افغان عبوری حکام تحریری تے قابلِ تصدیق دا یقین نی ݙویندے جو افغان سرزمین پاکستان دے خلاف دہشت گرد حملیں دی منصوبہ بندی یا معاونت کیتے استعمال نہ تھیسی۔ترجمان افغانستان دی شنگھائی تعاون تنظیم (ایس سی او) اچ شمولیت دے رستے اچ پاکستان ولوں کہیں رکاوٹ دی تردید کریندیں آکھیا جو تنظیم دی رکنیت کیتے ساریں توں پہلے رکن ملکاں دے نال باضابطہ سفارتی تعلقات دا ہووݨ ضروری اے۔بلوچستان اچ دہشت گرد حملیں دی بھارتی میڈیا ولوں کھلے عام تعریف تے تشہیر تے تنقید کریندیں ترجمان آکھیا جو بھارت نہ صرف پاکستان اچ دہشت گردی دی کھلم کھلا حمایت کریندے بلکہ ایں تے خوشی وی منیندے ڄݙاں جو ݙوجھے پاسے افغانستان اچ امریکہ دی مبینہ خفیہ حمایت دے بے بنیاد الزامات وی لیندا رہندے۔جاپان تے بھارت دے مشترکہ اعلامیے اچ پاکستان توں مبینہ سرحد پار دہشت گردی دا ذکر کیتے ونڄݨ متعلق سوال تے ترجمان آکھیا جو پاکستان سفارتی ذرائع توں جاپانی حکومت کوں باضابطہ تے سخت احتجاج (ڈیمارش) ریکارڈ کرائے تے آپݨی شدید تشویش دا ݙسائے ۔ انھاں آکھیا جو پاکستان تے جاپان وچال طویل عرصے توں دوستانہ، خوشگوار تے کثیر جہتی تعلقات قائم ہن جیڑھے بین الاقوامی امن تے ترقی دے مشترکہ عزم تے مبنی ہن، بھارت دے نال ݙوطرفہ ملاقاتاں دے دوران بھارتی فریق مسلسل دٻاؤ پا تے ایجھے یکطرفہ تے بدنیتی تے مبنی الفاظ مشترکہ اعلامیں اچ شامل کراوݨ دی کوشش کریندے تے ایہو حربہ او ٻئے ملکاں دے نال وی اختیار کریندے۔ ترجمان آکھیا جو جاپانی حکومت کوں واضح طور تے آگاہ کر ݙتا ڳئے جو ایں نوعیت دی زبان زمینی حقائق توں مکمل طور تے الٹ اے تے دہشت گردی دے خلاف عالمی جنگ اچ پاکستان دی بے مثال قربانیاں تے خدمات کوں یکسر نظر انداز کریندی اے۔بھارت دے ساریں توں وݙے جوہری ری ایکٹر اچ مبینہ حفاظتی خرابی متعلق بین الاقوامی میڈیا رپورٹس تے ترجمان آکھیا جو ایجھی اطلاعات حیران کن کائنی، کیوں جو پاکستان طویل عرصے توں بھارت دے جوہری تحفظ، سلامتی دے معیارات تے عدم پھیلاؤ (نان پرو لیفریشن) دے ریکارڈ تے سوالات چویندا پئے، خصوصاً بھارتی بلیک مارکیٹ اچ غیر قانونی جوہری مواد دی ول ول برآمدگی دے واقعات دے تناظر اچ۔ہک ٻئے سوال دے جواب اچ انھاں ݙسایا جو حکومت پنٹ لینڈ اچ صومالی قزاقاں دے یرغمال بݨائے ڳئے پاکستانی شہریاں دی رہائی کیتے مختلف قومی اداریں، ݙوطرفہ تے کثیرالجہتی سفارتی ذرائع دے ذریعے سرگرم کوششاں کریندی پئی اے، بھانویں جو ایں سلسلے اچ آپریشنل تے انتظامی نوعیت دے نمایاں چیلنجز موجود ہن۔ترجمان ݙسایا جو پاکستان 30 جون کوں اقوامِ متحدہ دی سلامتی کونسل دی قرارداد 1540 تے عمل درآمد متعلق آپݨی ستویں قومی رپورٹ اقوامِ متحدہ اچ جمع کرائی، جیڑھی ہک ذمہ وار جوہری ریاست دے طور تے پاکستان دے مضبوط قانونی ڈھانچے، موثر جسمانی تحفظ تے برآمدی کنٹرول دے نظام دی عکاسی کریندی اے۔ٻئی سفارتی سرگرمیاں دا ذکر کریندیں انھاں ݙسایا جو وزیراعظم محمد شہباز شریف، سابق وزیراعظم محمد نواز شریف تے نائب وزیراعظم تے وزیر خارجہ سینیٹر محمد اسحاق ڈار 13 جولائی کوں دوحہ دا دورہ کیتا جتھاں انھاں قطر دے سابق امیر شیخ حمد بن خلیفہ آل ثانی دے انتقال تے تعزیت دا اظہار کیتا۔ ترجمان مزید ݙسایا جو نائب وزیراعظم و وزیر خارجہ سینیٹر محمد اسحاق ڈار ایں ویلھے چین دے ݙو ݙینھ دے دورے تے ہن جتھاں او پاکستان دی طرفوں چین دے تعاون نال قائم تھیوݨ آلی ورلڈ آرٹیفیشل انٹیلیجنس کوآپریشن آرگنائزیشن (ڈبلیو اے آئی سی او) دے قیام دے معاہدے تے دستخط کریسن۔