ملک دی نینگر نسل اچ صلاحیتاں گھٹ کائنی، ڈاکٹر طارق فضل چوہدری

اسلام آباد۔16جولائی (اے پی پی) وفاقی وزیر پارلیمانی امور ڈاکٹر طارق فضل چوہدری آکھیے جو ملک دی نینگرنسل اچ صلاحیتاں گھٹ کائنی، حکومت نینگر نسل کوں ہرممکن سہولتاں ݙیسی تاں جو دنیا اچ او ملک دا نام روشن کرن۔اے ڳالھ انہاں نیشنل چیس چیمپئن شپ دی تقریبِ تقسیمِ انعامات توں خطاب کریندیں آکھی جیں اچ انھاں بطورِ مہمانِ خصوصی شرکت کیتی۔ انھاں آکھیا جو پاکستان دی نینگر نسل اچ صلاحیتاں گھٹ کائنی، ساݙے نینگر دنیا اچ کھیݙاں دے میداناں اچ آپݨا ناں روشن کریندے پئن۔ انھاں آکھیا جو شطرنج دے کھیݙ اچ ساݙے نامور کھلاڑیاں پاکستان دا ناں دنیا اچ روشن کیتا، جسمانی تے ذہنی صلاحیتاں مل تے ہی شطرنج دا کھلاڑی بݨیندن۔ ایں ٹورنامنٹ اچ جنھاں جنھاں کھلاڑیاں کامیابی حاصل کیتی او مبارخ دے مستحق ہن۔ انھاں خصوصی طور تے خاتون شطرنج چیمپئن صاحبہ شاہ کوں ایں واری وی چیمپئن بݨݨ تے مبارخ ݙتی۔انھاں آکھیا جو ٹورنامنٹ منعقد کراوݨ تے پاکستان چیس فیڈریشن مبارخ دی مستحق اے، حکومت دی طرفوں یقین ݙوینداں تے وزیراعظم ہمیشہ ایں ڳالھ دی ہدایت کیتی اے جو ملک دی نینگر نسل کوں ہر ممکن سہولتاں ݙتیاں ونڄن تاں جو او سارے کھیݙاں اچ ملک دا ناں بݨاون ۔ انھاں آکھیا جو ہک وقت ہئی جو ہاکی تے سکواش سودھا پاکستان کئی کھیݙاں دا دنیا اچ چیمپئن ہئی، وزیراعظم ملک اچ ٹیلنٹ ہنٹ پروگرام شروع کیتے جیں اچ صوبائی تے قومی سطح تے نینگراں کوں سلیکٹ کیتا ویندے۔ انھاں آکھیا جو نینگر نسل کوں ساریاں سہولتاں ݙیسوں۔ڈاکٹر طارق فضل چوہدری دا آکھݨ ہئی جو گزریل سال 9 تے 10 مئی کوں بھارت دے مقابلے اچ پاکستان کوں جیڑھی فتح نصیب تھئی ایں پوری قوم دا سرماݨ نال اچا کرݙتے۔ انھاں آکھیا جو وزیراعظم محمد شہباز شریف تے فیلڈ مارشل سید عاصم منیر دی قیادت اچ عالمی جھیڑے مکاوݨ اچ سفارتی سطح تے دنیا اچ جیڑھی عزت ملی اے او اساں ساریں کیتے قابلِ فخر اے۔ تقریب اچ ارکانِ پارلیمنٹ نزہت صادق، سیدہ نوشین افتخار، فرح ناز اکبر تے وزیراعظم دے کوآرڈینیٹر رانا احسان افضل وی شرکت کیتی۔ تقریب دے چھیکڑ اچ مہمانِ خصوصی ڈاکٹر طارق فضل چوہدری چیس چیمپئن شپ اچ کامیاب تھیوݨ آلے کھݙاریاں اچ انعامات تے شیلڈز وی ونڈیاں۔