پاکستان تے مصردے تعلقات سانجھی اقدار، احترام تے پراݨی دوستی تے قائم ہن،وفاقی وزیرِ تجارت جام کمال خان

اسلام آباد۔17جولائی (اے پی پی): وفاقی وزیرِ تجارت جام کمال خان آکھیے جو پاکستان مصر دے نال آپݨے تاریخی تے بھرپی دے تعلقات کوں خصوصی اہمیت ݙیندے، پاکستان تے مصر دے تعلقات سانجھی اقدار، احترام تے پراݨی دوستی تے قائم ہن، پاکستان تے مصر کوں روایتی تجارت توں اڳوں ودھ تے اسٹریٹجک اقتصادی شراکت داری قائم کرݨی پوسی۔اِے ڳالھ وفاقی وزیر جام کمال خان عرب جمہوریہ مصر دے قومی ݙینھ دے حوالے نال منعقدہ تقریب اچ آکھی ۔ وفاقی وزیر تقریب اچ بطورِ مہمانِ خصوصی شرکت کیتی ڄݙاں جو مختلف ملکاں دے سفرا، ہائی کمشنرز، اعلیٰ سرکاری حکام تے سفارتی برادری دے نمائندیں وی تقریب اچ شرکت کیتی۔وزارتِ تجارت ولوں جاری پریس ریلیز موجب تقریب توں خطاب دے دوران وفاقی وزیرِ تجارت جام کمال خان مصر دی حکومت تے عوام کوں قومی ݙینھ تے مبارخ ݙتی تے آکھیا جو پاکستان مصر دے نال آپݨے تاریخی تے برادرانہ تعلقات کوں خصوصی اہمیت ݙیندے، پاکستان تے مصر دے تعلقات مشترکہ اقدار، سانجھے احترام تے پراݨی دوستی تے قائم ہن۔ وزیرِ تجارت آکھیا جو پاکستان تے مصر کوں روایتی تجارت توں اڳوں ودھ تے اسٹریٹجک اقتصادی شراکت داری قائم کرݨی پوسی۔جام کمال خان مزید آکھیا جو ݙوہیں ملکاں سانجھی سرمایہ کاری، پیداوار تے ٹیکنالوجی تعاون کوں ودھارا ݙے سڳدن، پاکستان تے مصر مشترکہ ویلیو چینز دے ذریعے روزگار، صنعتی استعداد تے برآمدات اچ ودھارا کر سڳدن۔ انھاں آکھیا جو مصر افریقی، عرب تے بحیرۂ روم دیاں منڈیاں کیتے اہم پیداواری تے تقسیمی مرکز اے۔ وزیرِ تجارت آکھیا جو پاکستان جنوبی ایشیا نال منسلک ٻہوں وݙی پیداواری تے سرمایہ کاری منڈی فراہم کریندے۔ انھاں آکھیا جو مصری کمپنیاں دی پاکستان دے توانائی، رئیل اسٹیٹ، مالیاتی تے ٹیلی کمیونیکیشن شعبیں اچ سرمایہ کاری چنڳی ڳالھ اے۔جام کمال خان آکھیا جو پاکستانی کمپنیاں وی مصر اچ کاروبار تے سرمایہ کاری دے نویں موقع ڳولیندیاں پئن۔ انھاں آکھیا جو پاکستان مصر کوں خام مال، تیار مصنوعات، صنعتی سامان تے درمیانی اشیاء ݙے سڳدے، مصر توانائی، معدنیات، زرعی مصنوعات، کیمیکلز، کھاد تے طبی آلات دے شعبیں اچ اہم شراکت دار بݨ سڳدے۔ انھاں آکھیا جو ݙوطرفہ تعاون نال تریجھے ملکاں تے نویں علاقائی منڈیاں تئیں رسائی دے موقع پیدا تھیسن۔ وفاقی وزیر آکھیا جو مصر ولوں پاکستان دے صحت دے شعبے اچ تعاون قابلِ قدر اے۔