نائب وزیراعظم سینیٹر محمد اسحاق ڈار شنگھائی دا دورہ مکمل کر تے وطن واپس روانہ

اسلام آباد۔17جولائی (اے پی پی) نائب وزیراعظم تے وزیرخارجہ سینیٹر محمد اسحاق ڈار آکھیے جو چین دے شہر شنگھائی دا ہک نہایت نتیجہ خیز دورہ مکمل کرتے وطن واپس روانہ تھیندا پیاں۔ سماجی رابطے دے پلیٹ فارم ایکس تے آپݨے پیغام اچ نائب وزیراعظم ایں مختصر مگر اہم دورے دے دوران عوامی جمہوریہ چین دی حکومت تے ایں دی قیادت ولوں پرتپاک مہمان نوازی تے شاندار انتظامات تے تشکر دا اظہار کیتا۔ نائب وزیراعظم عالمی مصنوعی ذہانت تعاون تنظیم دی افتتاحی تقریب اچ چین دے صدر شی جن پنگ دے بصیرت افروز خطاب دی تعریف کریندے آکھیے چین دے صدر بجا طور تے مصنوعی ذہانت کوں انسانیت دی اجتماعی دانش دا انمول سرمایہ قرار ݙتے۔نائب وزیراعظم سینیٹر محمد اسحاق ڈار آکھیا جو اے ایں حقیقت دی وقتی یاد دہانی اے جو اے انقلابی ٹیکنالوجی جتھاں بے پناہ امکانات رکھیندی اے اتھائیں ایں ڳالھ دی سانجھی ذمہ واری وی عائد کریندی اے جو ایں کوں انسانیت دی اجتماعی بھلائی کیتے بروئے کار گھن آیا ونڄے۔ نائب وزیراعظم آکھیا جو میں آپݨے دوست چین دے وزیر خارجہ وانگ ای دا انھاں دی پرتپاک میزبانی تے تعمیری مذاکرات تے خصوصی طور تے شکر گزار ہاں۔ انھاں آکھیا جو اساں پاکستان۔چین ہمہ موسمی آزمودہ سٹریٹجک تعاون تے مبنی شراکت داری کوں مزید تکڑا بݨاوݨ دے آپݨے سانجھےعزم دا اعادہ کیتا جیں اچ سی پیک 2.0 دے تحت اعلیٰ معیار دی ترقی تے خصوصی توجہ ݙتی ڳئی۔ انھاں آکھیا جو ایں ضمن اچ سیاہ ڈک مائننگ پراجیکٹ، قراقرم ہائی وے ری الائنمنٹ پراجیکٹ سودھا ݙوپاسے تعاون دے ٻئے ترجیحی شعبیں تے پیش رفت دا جائزہ ڳھدا ڳیا جنھاں تے مئی 2025 اچ وزیراعظم محمد شہباز شریف دے سرکاری دورہِ چین دے دوران ݙوہیں ملکاں وچال اتفاق تھیا ہئی۔نائب وزیراعظم آکھیا جو میں آپݨے رلے وفد دے ارکان دی خدمات دی وی تعریف کرینداں جنھاں اچ وفاقی وزیرانفارمیشن ٹیکنالوجی و ٹیلی کمیونیکیشن شزہ فاطمہ خواجہ، وزیراعلیٰ پنجاب دے مشیر مصنوعی ذہانت و خصوصی اقدامات علی مصطفیٰ ڈار، پاکستان ورچوئل اثاثہ جات ریگولیٹری اتھارٹی دے چیئرمین بلال بن ثاقب تے ایڈیشنل سیکرٹری (ایشیا پیسیفک) ڈاکٹر سید اسد علی گیلانی شامل ہن جنھاں دی محنت تے لگن ایں دورے کوں کامیاب تے نتیجہ خیز بݨاوݨ اچ اہم کردار ادا کیتا۔ انھاں آکھیا جو میں چین اچ پاکستان دے سفارتی مشن تے شنگھائی اچ پاکستانی قونصل خانے دے حکام دا وی آپݨے سرکاری دورے دے دوران بھرپور تعاون تے تہہ دل توں مشکور ہاں۔ نائب وزیراعظم آکھیا جو آندے ہفتے اہم سفارتی مصروفیات تے ٻئی سرکاری ذمہ واریاں دی انجام دہی کیتے اسلام آباد واپس روانہ تھیندا پیاں۔