وزیراعظم دا ڄڳ منیاں جامعات اچ پڑھݨ والے پاکستانی طلبہ دے پاکستان اچ انٹرن شپ دے فیصلے دا خیرمقدم

اسلام آباد۔ 17 جولائی (اے پی پی)وزیراعظم محمد شہباز شریف ڄڳ منیاں جامعات (یونیورسٹیاں) اچ پڑھݨ والے پاکستانی طلبہ دے پاکستان اچ انٹرن شپ دے فیصلے دا خیرمقدم کریندے زور ݙتے جو سکالرز اپݨی تعلیم، تحقیق اتے عالمی تجربے کوں پاکستان دی ترقی اتے خوشحالی کیتے کم اچ گھن آوݨ۔ وزیراعظم محمد شہباز شریف نال ’’اڑان اوورسیز پاکستان سمر سکالرز پروگرام‘‘ دے سکالرز ملین۔ اے سکالرز وزارتِ منصوبہ بندی و ترقیات دے تحت پاکستان کوں پیش مسائل تے تحقیق کیتے چھی ہفتیاں دی انٹرن شپ کریندے پئے ہن۔ وزیراعظم قومی ترقی اچ نوجواناں دا وݙا اتے اہم کردار اے، پوے ڄڳ اچ اڄ پاکستانی طلباء و طالبات ملک دا ناں اچا کریندے پئن۔ وزیراعظم سکالرز کوں حکومت دے اصلاحاتی ایجنڈے تے بریفنگ ݙتی اتے انھاں دے سوالاں دے جواب ݙتے۔ انھاں آکھیا جو ماضی اچ جݙاں ملک ڈیفالٹ دی کندھی تے پڄ چکیا ہئی، تݙاں ہنگامی معاشی اصلاحات نال استحکام دا حصول ممکن تھئے۔ جامع اصلاحات اچ ایف بی آر دی ڈیجیٹائزیشن اتے ٹیکس محاصل اچ اضافہ، کاروبار اچ آسانی، پیداواری صلاحیت اچ اضافہ، زرعی شعبے دی ترقی، نوجواناں کوں بااختیار بݨاوݨ، قابلِ تجدید توانائی دا فروغ اتے پائیدار معاشی ترقی شامل ہن۔ وزیراعظم آکھیا جو اثر دار انفورسمنٹ اقدامات دے نتیجے اچ پچھلے مالی سال اچ ایف بی آر 800 ارب روپے توں ودھ اضافی ٹیکس جمع کیتے۔ انھاں آکھیے جو حکومت دی معاشی اصلاحات دا مقصد مضبوط، خود کفیل اتے برآمدات تے مبنی معیشت دی بنیاد رکھݨ اے۔ وزیراعظم آکھیا جو فیلڈ مارشل دی قیادت تے قوم دی بھرپور حمایت نال پاکستان مئی 2025ء اچ بھارت کوں شکست ݙتی۔ امریکہ اتے ایران وچال جاری جنگ رکواوݨ اچ پاکستان دی ثالثی دا کردار پاکستان دی سفارتی تاریخ دا ہک نمایاں باب اے۔ وزیراعظم ݙسایا جو پاکستان دی سفارتی کوشِشاں دے نتیجے اچ اسلام آباد مفاہمتی یادداشت طے پائی جیہڑی عالمی امن کیتے ہک اہم پیش رفت اے۔ وزیراعظم سکالرز تے زور ݙتے جو او اپݨی تعلیم، تحقیق اتے عالمی تجربے کوں پاکستان دی ترقی اتے خوشحالی کیتے استعمال اچ گھن آوݨ۔ اجلاس اچ طلباء و طالبات مختلف شعبیاں اچ بہتری دے حوالے نال اپݨے خیالات دا اظہار کیتا۔ ایں اجلاس اچ وفاقی وزراء احسن اقبال، عطاء اللہ تارڑ، علی پرویز ملک، وزیرِ مملکت برائے خزانہ بلال اظہر کیانی، وزیرِ مملکت برائے قومی تعلیم و پیشہ ورانہ تربیت وجیہہ قمر تے متعلقہ اداریاں دے اعلیٰ افسران شریک ہن۔