اوگرا روزانہ پٹرولیم مصنوعات دیاں قیمتاں مقرر تے ویب سائٹ تے جاری کریسی، ساݙی قیادت خطے دی صورتحال اچ بہتری کیتے کامیاب کوشِشاں کیتن، وفاقی وزیرِ علی پرویز ملک

اسلام آباد۔ 17 جولائی(اے پی پی)وفاقی وزیرِ پٹرولیم علی پرویز ملک آکھیے جو وزیراعظم محمد شہباز شریف تے کابینہ اے فیصلہ کیتے جو اوگرا روزانہ دی بنیاد تے قیمتاں دا تعین کریسی اتے قیمتاں ویب سائٹ تے شائع کریسی، ساݙی قیادت خطے دی صورتحال اچ بہتری کیتے کامیاب کوشِشاں کیتن، عالمی منڈی اچ توانائی دیاں قیمتاں اچ ولا اضافہ تھیندا پئے، پٹرولیم قیمتاں تے سبسڈی دا پروگرام اج وی جاری اے۔ انھاں اے ڳالھ وفاقی وزیرِ اطلاعات و نشریات عطاء اللہ تارڑ دے کٹھے پٹرولیم مصنوعات دیاں قیمتاں بارے الیندے پئے ہن۔ وفاقی وزیرِ پٹرولیم آکھیا جو وزیراعظم شہباز شریف تے فیلڈ مارشل سید عاصم منیر پہلے جنگ بندی تے ول مستقل امن کیتے بھرپور کوشِشاں کیتن موجودہ صورتحال پاروں عالمی منڈی اچ ڈیزل اتے پٹرول دیاں قیمتاں اچ ولا ودھارا تھیندا پئے، بین الاقوامی منڈی اچ ڈیزل دا پلیٹس ریٹ تقریباً 110 ڈالر توں ودھ تے 140 ڈالر ڄݙاں جو پٹرول دا پلیٹس ریٹ تقریباً 89 ڈالر توں ودھ تے تقریباً 100 ڈالر تئیں پڄ چکیے جیندے نال توانائی دیاں قیمتاں ول ودھݨ شروع تھی ڳئن۔ انھاں آکھیا جو حکومت عوام دیاں مشکلاں ڄاݨدی اے اتے وزیراعظم شہباز شریف دی ہدایت تے وفاقی حکومت تقریباً 130 ارب روپے دے وسائل نال عوام کوں سہارا ݙیوݨ دی کوشِش کیتی اتے صدرِ مملکت آصف علی زرداری تے سارے صوبائی وزرائے اعلیٰ دے تعاون نال ٹارگٹڈ سبسڈی دا پروگرام وی کئی سو ارب روپے دی سطح تے اج وی جاری اے۔ انھاں آکھیا جو وفاقی کابینہ پٹرولیم مصنوعات دیاں قیمتاں دے تعین دے نظام اچ شفافیت گھن آوݨ دا فیصلہ کیتے جیندے تحت ہݨ اوگرا روزانہ دی بنیاد تے بین الاقوامی منڈی دے مطابق قیمتاں دا تعین کریسی۔ اوگرا نہ صرف پلیٹس ریٹ اپݨی ویب سائٹ تے شائع کریسی ٻھل پٹرولیم مصنوعات دی قیمت اچ شامل سارے عناصر وی عوام دے سامݨے پیش کریسی تاں جو شہری آپ ڄاݨ سڳن جو قیمتاں اچ ردوبدل کیہڑے عوامل دی بنیاد تے کیتا ویندا پئے اتے اے فیصلے کیوں ضروری ہین، حکومت عوام نال کیتے ڳئے اپݨے وعدے تے قائم اے اتے بین الاقوامی منڈی اچ قیمتاں اچ کمی آوݨ تے ایندا فائدہ عوام تئیں منتقل کیتا ڳیا۔ انھاں آکھیا جو ڈیزل دی قیمت 520 روپے توں گھٹ تھی تے تقریباً 300 روپے دے دائرے اچ آ چکی اے ڄݙاں جو پٹرول دی قیمت اچ وی تقریباً 70 توں 80 روپے تئیں کمی عوام کوں منتقل کیتی ڳئی۔ انھاں واضح کیتا جو لیوی دے حوالے نال بین الاقوامی معاہدیاں توں ودھ تے عوام تے کوئی اضافی بوجھ نئیں سٹیا ڳیا اتے 27 اتے 28 فروری دی سطح دے مقابلے اچ موجودہ لیوی وی ایندے توں گھٹ اے۔ انھاں آکھیا جو حکومت ہک پاسے شفافیت ودھیندی پئی اے، ݙوجھے پاسے ان ڈائریکٹ ٹیکسیشن (بالواسطہ ٹیکس) دا ٻھار ڳھٹاوݨ کیتے وی اقدامات جاری ہن۔ انھاں آکھیا جو حکومت قیمتاں دے تعین دے نظام توں اپݨا کردار محدود کریندے ہوئیں ریگولیٹر کوں مؤثر کردار ݙیندی پئی اے تاں جو صارفین، حکومت اتے آئل سیکٹر دے سارے شراکت داراں دے مفادات اچ توازن برقرار رکھیا ونڃ سڳے۔ انھاں دا آکھݨ ہئی جیڑھے شعبے اچ حکومت اپݨا کردار محدود کیتے، اتھاں عوام کیتے بہتری آئی اے۔ وفاقی وزیر ݙسایا جو آئندہ ست ورکنگ ݙینہاں دے پلیٹس ریٹ دی اوسط دی بنیاد تے روزانہ قیمتاں دا تعین کیتا ویسی تاں جو بین الاقوامی منڈی اچ قیمتاں اچ اضافے یا کمی دا اثر فوری طور تے عوام تئیں منتقل تھی سڳے۔ انھاں ایکوں پٹرولیم سیکٹر دی ڈی ریگولیشن کیتے ہک اہم قدم قرار ݙتے۔ علی پرویز ملک آکھیا جو وزیراعظم دی ہدایت تے انھاں دی سربراہی اچ اعلیٰ سطح دی کمیٹی پٹرولیم سیکٹر دی ڈی ریگولیشن، انرجی پرائسنگ تے انرجی سکیورٹی آرکیٹیکچر تے کم کریندی پئی اے جیندے چار اجلاس تھی چکین ڄݙاں جو آئندہ 15 توں 20 ݙینہاں اچ سفارشات مکمل کر تے عوام دے سامݨے پیش کیتاں ویسن۔ انھاں آکھیا جو وزیرِ اعظم شہباز شریف اتے فیلڈ مارشل سید عاصم منیر انھاں کوں پاکستان دے انرجی سکیورٹی آرکیٹیکچر تے کم دی ذمہ داری ݙتی اے، ایں سانڳے سٹریٹجک پٹرولیم ریزرو دے قیام کیتے بین الاقوامی شہرت یافتہ کنسلٹنٹس دے ذریعے مطالعاتی کام شروع کر ݙتا ڳئے تاں جو ایں بارے فیصلہ کیتا ونڃ سڳے جو آیا حکومت 5 سال اچ 500 ملین توں ہک ارب ڈالر تئیں دی سرمایہ کاری کر تے آئندہ نسلاں کیتے سٹریٹجک پٹرولیم ذخائر قائم کر سڳدی اے یا نئیں۔ وفاقی وزیر ݙسایا جو کمرشل بانڈڈ سکیم دے تحت سعودی آرامکو، کویت پٹرولیم، قطر انرجی، امریکی اتے چینی کمپنیاں سسودھا ٻنھاں بین الاقوامی اداریاں دے نال مشاورت مکمل کر گھدی ڳئی اے تاں جو او اپݨے تیل دے ذخائر پاکستان اچ رکھ سڳن اتے ہنگامی یا جنگی صورتحال اچ حکومت کوں انھاں ذخائر توں خریداری دا حق حاصل ہووے۔ ایں حوالے نال سمری آئندہ ہفتے وفاقی کابینہ اچ پیش کیتی ویسی، مقامی سطح تے تیل و گیس دی دریافت ودھاوݨ کیتے وی اقدامات جاری ہین اتے ترک پٹرولیم تقریباً 20 سالاں بعد اکتوبر اچ سمندر اچ تیل و گیس ڳولݨ کیتے اپݨا جہاز پاکستان گھن آسی۔ انھاں آکھیا سرکلر ڈیٹ (گردشی قرضے) دے مسئلے دے حل، ای اینڈ پی کمپنیاں کوں ادائیگیاں، ریفائنری اپ گریڈ پالیسی، گیس سیکٹر دی اَن بنڈلنگ، آئل مارکیٹنگ کمپنیاں دی کنسولیڈیشن اتے توانائی دے شعبے دے انتظامی ڈھانچے اچ بہتری تے وی کم جاری اے۔ علی پرویز ملک آکھیا جو حکومت محدود وسائل دے باوجود عوام اتے بوجھ گھٹ کرݨ اتے توانائی دے شعبے اچ دیرپا اصلاحات کیتے اقدامات جاری رکھیسی تاں جو مستقبل اچ ملک دی انرجی سکیورٹی مزید مضبوط تھی سڳے، وزیراعظم شہباز شریف ایف آئی اے، آئی بی اتے ٻئے قانون نافذ کرݨ والے اداریاں کوں ہدایت جاری کر ݙتی اے جو آئل سیکٹر اچ ناجائز منافع خوری دی کہیں وی کوشِش دے خلاف سخت کارروائی کیتی ونڃے اتے قانون دے مطابق فوری اقدامات کیتے ونجن ڄݙاں جو حکومت عوام دے تحفظات دے ازالے کیتے ہر ممکن اقدامات جاری رکھیسی۔