چینی سرمایہ کاراں دے تعاون نال پاکستان دے شعبہِ صحت اچ انقلابی تبدیلیاں گھن آئیاں ونڄ سڳدن، مصطفیٰ کمال

اسلام آباد۔18جولائی (اے پی پی) وفاقی وزیر قومی صحت مصطفیٰ کمال آکھیے جو چینی سرمایہ کاراں دے تعاون نال پاکستان دے شعبہِ صحت اچ انقلابی تبدیلیاں گھن آئیاں ونڄ سڳدن ، حکومت سرمایہ کاراں پیش آندیاں رکاوٹاں کوں دور کریندیں سرمایہ کاری دے عمل کوں مزید سوکھا تے شفاف بݨا ݙتے۔ اِے ڳالھ انہاں اتھاں پاکستان چین فارماسیوٹیکل اینڈ ہیلتھ کیئر بی ٹو بی انویسٹمنٹ کانفرنس توں خطاب کریندیں آکھی۔ وفاقی وزیر چینی سرمایہ کاراں تے زور ݙتا جو او پاکستان اچ موجود وسیع سرمایہ کاری دے موقع توں بھرپور فیدہ چاون۔ انھاں آکھیا جو حکومت سرمایہ کاراں کوں ہر ممکن سہولت ݙیوݨ کیتے پرعزم اے تاں جو سانجھے منصوبیں دے ذریعے صحت دے شعبے کوں جدید خطوط تے استوار کیتا ونڄ سڳے۔مصطفیٰ کمال آکھیا جو پاکستان اچ طبی آلات (میڈیکل ڈیوائسز) دی مقامی سطح تے تیاری دا عمل تکھے ودھدا پئے، جیں توں نہ صرف درآمدی انحصار اچ کمی آسی بلکہ برآمدات تے روزگار دے نویں موقع وی پیدا تھیسن۔ انھاں مزید آکھیا جو نویں کاروبار دی رجسٹریشن، لائسنسنگ تے ٻئے حکومتی امور کوں سوکھا بݨایا ڳئے تاں جو سرمایہ کاراں کوں کاروبار دے آغاز تے توسیع اچ غیر ضروری اوکھ دا سامݨا نہ کرݨا پووے ۔ وفاقی وزیرِ صحت ایں ڳالھ تے زور ݙتا جو پاکستان سرمایہ کاری کیتے ہک سازگار تے پرکشش ماحول ݙیندے پئے، جتھاں حکومتی تعاون، معاشی اصلاحات تے ݙوطرفہ شراکت داری دے ذریعے سرمایہ کاراں کیتے روشن امکانات موجود ہن