اقوامِ متحدہ اچ پاکستان دا پائیدار، محفوظ تے جامع شہری ترقی دے عزم دا اعادہ

اقوامِ متحدہ۔18جولائی (اے پی پی) وزیراعظم یوتھ پروگرام دے چیئرمین رانا مشہود احمد خان اقوامِ متحدہ دی جنرل اسمبلی دے اعلیٰ سطحی اجلاس توں خطاب کریندیں پاکستان دے پائیدار، جامع تے موسمیاتی تبدیلی توں ہم آہنگ شہری ترقی دے عزم دا اعادہ کیتے۔انھاں نیو اربن ایجنڈا دے وسط مدتی جائزہ اجلاس توں خطاب کریندیں آکھیا جو تکھی رفتار شہری آبادی اچ ودھارے پاروں رہائش، ٹرانسپورٹ، عوامی تحفظ تے ماحولیات جیھے شعبیں تے دٻاؤ ودھدا پئے، جیں دے پیشِ نظر عالمی برادری کوں آپݨے وعدیں دی تجدید کرݨی پوسی۔ رانا مشہود احمد خان آکھیا جو پاکستان موسمیاتی تبدیلی توں پیدا تھیوݨ آلے چیلنجز نال نبڑݨ کیتے اقوامِ متحدہ دے ادارے یو این ہیبی ٹیٹ دے تعاون نال قومی شہری حکمتِ عملی (نیشنل اربن اسٹریٹجی) تیار کریندا پئے، تاں جو شہری منصوبہ بندی اچ ابتدا ہی توں موسمیاتی لچک کوں شامل کیتا ونڄ سڳے۔انھاں ݙسایا جو 2025 دے تباہ کن شہری تے دریائی چھل ، جنھاں اچ ملک اچ ہک ہزار توں ودھ لوک جان دی بازی ہر ڳئن، دے بعد حکومت متاثرہ خانداناں کیتے چار لکھ توں ودھ مکانات دی تعمیرِ نو دا عمل شروع کیتے، جیں اچ جدید تے محفوظ تعمیراتی معیار کوں ترجیح ݙتی ویندی پئی اے۔ چیئرمین وزیراعظم یوتھ پروگرام آکھیا جو حکومت گھٹ لاڳت تے ماحول دوست پبلک ٹرانسپورٹ دے ودھارے، بینظیر انکم سپورٹ پروگرام (بی آئی ایس پی) دے ذریعے نو ملین توں ودھ خانداناں کوں سماجی تحفظ ݙیوݨ تے سیف سٹی منصوبیں دے دائرہِ کار کوں وسعت ݙیوݨ کیتے وی اقدامات کریندا پئے ، جنھاں اچ جدید نگرانی دے نظام تے مربوط کمانڈ سینٹرز دا قیام شامل اے۔انھاں آکھیا جو پاکستان دی تقریباً 67 فیصد آبادی 30 سال توں گھٹ عمر نوجواناں تے مشتمل اے، ایں کیتے تعلیم، ہنر مندی، روزگار تے کاروباری موقع ݙیوݨ شہری ترقی دا بنیادی جزو بݨایا ویندا پئے تاں جو شہری آبادی اچ ودھارا معاشی خوشحالی دا ذریعہ بݨے۔ رانا مشہود احمد خان ایں موقع تے وزیراعظم شہباز شریف دی قیادت اچ شروع کیتے ڳئے “پُرعزم پاکستان” اقدام دا وی ذکر کیتا، جیں دے تحت قومی تے بین الاقوامی شراکت داراں دے تعاون نال نینگراں کوں ہنر، روزگار تے کاروباری موقع نال جوڑیا ویندا پئے۔ انھاں آکھیا جو پاکستان پائیدار شہری ترقی کیتے آپݨے تجربات عالمی برادری دے نال شیئر کرݨ تے عوام دوست عملی حل تلاش کرݨ کیتے سارے رکن ملکاں دے نال تعاون جاری رکھݨ کیتے تیار اے۔ انھاں امید ظاہر کیتی جو نیو اربن ایجنڈا دے وسط مدتی جائزے دے مثبت نتیجے موجودہ تے آندیاں نسلاں دے معیارِ زندگی کوں بہتر بݨاوݨ اچ مددگار ثابت تھیسن