وفاقی وزیرِ داخلہ محسن نقوی دا فرضی فائر ایمرجنسی مشق دا جائزہ

اسلام آباد۔18جولائی (اے پی پی) وفاقی وزیرِ داخلہ محسن نقوی اسلام آباد اچ کیپٹل ایمرجنسی سروس ولوں منعقد کیتی ڳئی فرضی فائر ایمرجنسی مشق دا جائزہ ڳھدا جیں دے دوران فائر بریگیڈ تے ایمبولینس ٹیماں اطلاع ملݨ دے صرف اٹھ منٹ دے اندر وقوعے دی جاہ تے پڄ ڳئیاں۔وزیرِ داخلہ مقررہ ویلھے دے اندر وقتی رسپانس دی تعریف کریندے ایں کوں کیپٹل ایمرجنسی سروس دی پیشہ ورانہ صلاحیت تے آپریشنل تیاری دا مثبت ثبوت قرار ݙتا۔ مشق دے بعد محسن نقوی فائر فائٹرز تے ایمرجنسی اہلکاراں نال ملاقات کیتی۔ انھاں دی خدمات تے پیشہ ورانہ عزم کوں خراجِ تحسین پیش کیتا تے دورانِ ڈیوٹی درپیش اوکھ توں وی آگاہی حاصل کیتی۔ انھاں محدود وسائل تے پراݨے آلات دے باوجود اہلکاراں دی کارکردگی کوں قابلِ تعریف قرار ݙتا۔معائنے دے دوران وزیرِ داخلہ ایں ڳالھ تے تشویش دا اظہار کیتا جو کیپٹل ایمرجنسی سروس دیاں گاݙیاں تے آلات 2009 دے بعد تبدیل نئی کیتے ڳئے۔ انھاں کوں ݙسایا ڳیا اگرچہ موجودہ فلیٹ کوں بہتر انداز اچ فعال رکھیا ڳئے تاں جو کجھ فائر ٹینڈر 1993 دے ماڈل دے ہن تے ہݨ وی استعمال اچ ہن۔ وزیرِ داخلہ کوں اے وی بریفنگ ݙتی ڳئی جو ایمرجنسی اہلکاراں کوں کئی سالاں توں کتھائیں باقاعدہ تربیت یا ریفریشر کورس دا موقع نئی ملیا جیں پاروں جدید تقاضیں توں ہم آہنگ تربیت دی وی وقتی لوڑھ اے۔ محسن نقوی وقتی طور تے تے چیئرمین کیپیٹل ڈویلپمنٹ اتھارٹی (سی ڈی اے) سہیل اشرف کوں ہدایت کیتی جو ست ݙینھ دے اندر کیپٹل ایمرجنسی سروس دی مکمل اپ گریڈیشن دا جامع منصوبہ پیش کیتا ونڄے۔ انھاں واضح کیتا جو منصوبے اچ نویں فائر بریگیڈ گاݙیاں، ایمبولینسز، ریسکیو آلات تے ٻئیاں جدید سہولتاں دی خریداری کوں شامل کیتا ونڄے تاں جو وفاقی دارالحکومت دی ایمرجنسی رسپانس صلاحیت کوں مزید مؤثر بݨایا ونڄ سڳے۔اے فرضی مشق ایں ویلھے شروع کیتی ڳئی جݙاں قائم مقام ڈپٹی کمشنر صاحبزادہ یوسف ریسکیو 1122 تے فرضی بھاہ لگݨ دی اطلاع ݙے تے ایمرجنسی سروس دی عملی استعداد دا جائزہ ڳھدا۔ ایں موقع تے وزیرِ داخلہ آکھیا جو او رات کوں تھیوݨ آلی ایں مشق اچ کیپٹل ایمرجنسی سروس دے وقتی رسپانس تے مطمئن ہن۔ انھاں دا آکھݨ ہئی جو کہیں وی حقیقی ایمرجنسی اچ فوری ردِعمل انسانی جاناں دے تحفظ تے ضیان کوں گھٹ توں گھٹ رکھݨ اچ بنیادی کردار ادا کریندے۔ انھاں یقین ݙیوائے جو حکومت کیپٹل ایمرجنسی سروس کوں جدید گاݙیاں، ضروری آلات تے درکار وسائل ݙیسی تاں جو اسلام آباد اچ ہنگامی صورتحال نال نبڑݨ دی استعداد کوں مزید تکڑا بݨایا ونڄ سڳے۔ ایں موقع تے چیئرمین سی ڈی اے سہیل اشرف تے قائم مقام ڈپٹی کمشنر صاحبزادہ یوسف وی وزیرِ داخلہ دے رلے موجود ہن